2 Kings 25

Quechuan QXO (Biblia en Quechua del sur de Conchucos)

← Chapter 24 Jump to:

1Tsaymi rey Nabucodonosor llapan soldädunkunawan Jerusalén frentinman chaykur campamentuta rurayarqan. Tsaypitanam marka murälla waqtanpa allpata muntunatsiyarqan tsaypa yarkur atacayänanpä. Tsaynö päsarqan Sedequías puwaq wata rey kaykaptinmi. Nabucodonosor Jerusalénman chanqan junaq chunka kaq killachö chunka kaq junaqmi karqan.

2Jerusalénta tsaynö jiruruypa tsaparäyarqan hasta Sedequías chunka juk wata mandar qallanqanyaqmi.

3Runakuna mikuyänanpä imapis mana kaptinmi chusku kaq killachö isqun junaq kaykaptin

4marka murällata uchkuskiyarqan. Babilonia soldädukuna markata jiruruypa tsaparäyaptinmi Jerusalénchö soldädukuna paqaspa qeshpirnin reypa huertanpa päsar ishkay murälla punkupa yarquyarqan. Tsaypitanam Arabá pampaman aywaq nänipa aywayarqan.

5Tsaynö qeshpiykäyaptinmi Babilonia soldädukuna rey Sedequíasta taripaykur Jericó pampachö tsariyarqan. Tsaymi Sedequíasta soldädunkuna dëjaskir wakpa kaypa qeshpir aywakuyarqan.

6Rey Sedequíasta tsaynö prësu tsariykurmi Babilonia nacionpa mandaqnin rey Nabucodonosorman apayarqan. Nabucodonosorqa Ribla markachömi kaykarqan. Tsaychö juzgarmi

7rey Sedequías rikaraykaptin tsurinkunata wanutsiyarqan. Kikin Sedequíastanam ishkan ñawinkunata jipiskir cadënawan watarkur Babiloniaman prësu apayarqan.

8Nabucodonosor chunka isqun watana Babiloniapa mandaqnin rey kaykaptinmi pitsqa kaq killachö y qanchis junaqchö Nabuzaradán Jerusalénman charqan. Nabuzaradánqa Nabucodonosorpa wardiankunapa capitanninmi karqan.

9Jerusalénchömi Tayta Diospa templunta, reypa palaciunta, llapan wayikunata y autoridäkunapa despächunkunatapis kayar ushayarqan.

10Tsaypitanam Jerusalén markapa murällankunatapis soldädukuna juchutsiyarqan.

11Tsaypitanam Jerusalénchö quëdaq runakunata Babiloniaman Nabuzaradán prësu aparqan. Tsaynöllam aparqan Babilonia reypa janan shäriq runakunata y ñöpata mana apayanqan artesänukunatapis.

12Mas pobri runakunatanam sïqa jinallanchö dëjarqan chakrakunata aruyänanpä y üvakunata uryayänanpä.

13Tsaynöllam pakiyarqan templuchö broncipita rurashqa jatunkaray columnakunata, carrëtakunata y lamar niyanqan jatunkaray lavatoriuta. Tsaypitanam tsay pakiyanqan broncita Babiloniaman apayarqan.

14Tsaynöllam apayarqan uchpa qorikuyänankunata, pälakunata, llipta jipikuyänankunata, wishllakunata y wakin manëjukunatapis. Tsay manëjukunam broncipita rurashqa sacrificiukunata rupatsir manijayänanpä karqan.

15Tsaynöllam capitán Nabuzaradán aparqan inciensiu qoshnitsikuyänankunata, tazonkunata y llapantapis qoripita y qellaypita kaqkunata.

16Apayanqan broncita manam pësaytapis puëdiyarqantsu. Tsay broncikunam karqan ishkay columnakunapita, lamar niyanqan jatunkaray lavatoriupita y carrëtakunapita. Tsaykunataqa rey Salomónmi Tayta Diospa templunpä ruratsirqan.

17Templu punkuchö columnakunaqa puwaq metrunö largum karqan. Columna puntanchömi ishkay metrunö broncipita rurashqa tumaypa adornun karqan. Tsay adornum entëru kuchunpa awashqa shikra niraq karqan. Shikrapita warkuränanpämi broncipita rurashqa granadïllakunapis karqan. Jukaq columnapis tsaynöllam karqan.

18Mandaq sacerdöti Seraíastanam wardiakunapa capitannin Nabuzaradán prësu tsarirqan. Payta mandar yanapaqnin sacerdöti Sofoníasta y templu punkuta cuidaq kimsa runakunatapis prësu tsarirqan.

19Tsaynöllam prësu tsarirqan soldädukunapa capitanninta, reyta yätsiq pitsqa runakunata, soldädu kayänanpä tsariq capitanta y joqta chunka (60) mayor runakunatapis.

20Babilonia nacionpa mandaqnin rey Nabucodonosor Ribla markachö kaptinmi wardiakunapa capitannin Nabuzaradán llapan tsay prësu tsarinqan runakunata Riblaman aparqan.

21Tsaychömi Nabucodonosor nirqan tsay runakunata wanutsiyänanpä. Tsaynöpam Judá runakunata wakinta wanutsiyarqan y wakintana juklä nacionman apayarqan.

22Tsaypitanam rey Nabucodonosor Judáchö quëdaq runakunapa gobernadornin kananpä Gedalíasta churarqan. Gedalíaspa papäninmi Ahicam karqan y awilunnam Safán karqan.

23Gobernadornin kananpä churanqanta musyaskirmi Gedalíaswan parlayänanpä Judá soldädukunapa capitanninkuna Mizpaman aywayarqan. Tsay capitankunam kayarqan Netaníaspa tsurin Ismael, Careapa tsurin Johanán, Netofapita Tanhumetpa tsurin Seraías y Maacapita Jaazanías. Paykunam soldädunkuna pushashqa aywayarqan.

24Tsaynö chaykuyaptinmi Gedalías nirqan: «Ama mantsashuntsu Babilonia nacionpita shamuq capitankunata. Babilonia nacionpa mandaqnin reyta cäsurqa allim kawashun».

25Tsaypita qanchis killa päsaskiptinnam Ismael jutiyuq runa chunka runakunata pushashqa Mizpa markaman charqan. Ismaelqa Elisamapa willkan y Netaníaspa tsurinmi karqan. Tsaynöllam Judá nacionpa mandaqnin reykuna casta karqan. Chaykurmi gobernador Gedalíasta, paywan kaykaq Judá runakunata y tsaychö kaykaq Babilonia runakunatapis wanutsiyarqan.

26Tsaynö wanuskatsiyaptinmi Babilonia runakunata mantsar Judáchö quëdaq runakunaqa wamrapis rukupis y soldädukunapis llapan qorikaskir Egiptuman qeshpir aywakuyarqan.

27Babiloniapa mandaqnin rey Evil-merodac mandayta qallanqan watam Judá nacionpa mandaqnin rey Joaquínta kuyapar carcelpita jipitsirqan. Tsaynö jipitsirqan Babiloniaman prësu apayanqan kimsa chunka qanchis (37) watata ushaykaptin chunka ishkay killachö ishkay chunka qanchis (27) junaqchömi.

28Alli shimillanpa parlaparmi Joaquíntaqa Babiloniachö prësu kaykaq reykunapita mas alli rikarqan.

29Tsaynöpam rey Joaquínqa carcelchö kanqan röpanta trocakuskir Babilonia nacionpa mandaqnin reywan imaypis juntu mikurqan.

30Tsaynöllam wanunqanyaq gastunkunapä qoyay qoyay qellayta reypita chaskirqan.

← Chapter 24 Jump to: