bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
2 Kings 2
2 Kings 2
Quechuan QXO (Biblia en Quechua del sur de Conchucos)
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 3 →
1
Shukukuy vientuwan Elíasta Tayta Dios apakunanpä tiempu chämuptinmi Gilgal markapita Eliseuwan yarquyarqan.
2
Yarquykarnam Eliseuta Elías nirqan: «Bet-elman aywanäpämi Tayta Dios mandaykäman. Qamqa kayllachö quëdakuy». Eliseunam nirqan: «Taytay, maypa aywaptikipis mana dëjaypam qatiräshayki». Tsaynö niptinmi Bet-elman ishkan aywayarqan.
3
Bet-elman chaykuyaptinmi tsaychö täraq profëtakuna tinkuskir Eliseuta niyarqan: «¿Musyankiku yachatsishuqniki Elíasta Tayta Dios kanan junaq pushakunanpä kanqanta?» Eliseunam nirqan: «Awmi, musyämi. Tsaytaqa ama pitapis willayaytsu».
4
Tsaypitanam Eliseuta yapay Elías nirqan: «Jericóman aywanäpämi Tayta Dios mandaykäman. Qamqa kayllachö quëdakuy». Eliseunam nirqan: «Taytay, mana dëjaypam maypapis qatiräshayki». Tsaynö niptinmi Jericóman ishkan aywayarqan.
5
Tsaychöpis profëtakuna paykunata chaskiq yarqurmi Eliseuta niyarqan: «¿Musyankiku yachatsishuqniki Elíasta Tayta Dios kanan junaq pushakunanpä kanqanta?» Eliseunam nirqan: «Awmi, musyämi. Tsaytaqa ama pitapis willayaytsu».
6
Elíasnam yapay nirqan: «Jordán mayuman aywanäpämi Tayta Dios mandaykäman. Qamqa kayllachö quëdakuy». Eliseunam nirqan: «Taytay, mana dëjaypam maypapis qatiräshayki». Tsaynö niptinmi Jordán mayuman ishkan aywayarqan.
7
Jericóchö täraq profëtakunapitam pitsqa chunka (50) profëtakuna paykunawan aywayarqan. Jordán mayu kuchunman Elíaswan Eliseo chaykur ichiskiyaptinmi tsay profëtakuna karullapita rikaräyarqan.
8
Tsaychö kaykarnam Elíasqa mantunta shumaq doblarkur mayuta tsapiskirqan. Tsaynö tsapiskiptinmi mayuqa janaman y uraman rakikaskirqan. Tsaymi tsakipana ishkan päsayarqan.
9
Mayuta päsaskirnam Eliseuta Elías nirqan: «Manarä aywakunqäyaq imatapis munanqaykita ras mañakamay». Tsaynö niptinmi Eliseo nirqan: «Qam poderyuq kanqaykipita mas poderyuq kaytam munä».
10
Elíasnam nirqan: «Tsaytaqa alläpa ajatam mañakamarquyki. Imanö kaptinpis apamanqanta rikamarqa noqapita mas poderyuqmi kanki. Peru mana rikamarqa kanqaykinöllam kanki».
11
Tsaynö parlar aywaykäyaptinmi illaqpita nina lunyaykaq carrëta y nina lunyaykaq caballukuna paykunapa chawpinpa päsar rakiskirqan. Elíastanam shukukuy vientu ciëlupa apakurqan.
12
Tsayta rikaykurmi Eliseo mantsakar nirqan: «¡Ay taytallay tayta! ¡Israel runakunapa guërra carrëtankunata y caballunkunatam rikaykä!» Tsaypitaqa Elíasta manam rikarqannatsu. Elías aywaskiptinnam Eliseo pasaypa llakirnin röpanta ishkayman rachirqan.
13
Elíaspa cäpan shushunqanta qoriskirmi Jordán mayu lädunman Eliseo kutirqan.
14
Tsaypitam Elíaspa cäpanwan mayuta tsapiykur nirqan: «Elías yärakunqan Tayta Dios, noqatapis yanapaykallämay». Tsaynö nir tsapiykuptinmi yakuqa janaman y uraman rakikaskirqan. Tsaymi tsakillapana Eliseo päsarqan.
15
Tsayta rikaykurmi Jericópita shamuq profëtakuna niyarqan: «¡Elíastanömi kananqa Eliseutana Tayta Dios yanapaykan!» Tsaynö nir tinkupaykurmi urkunkunapis patsaman töpayanqanyaq qonqurikuyarqan.
16
Eliseutanam niyarqan: «Taytay, munaptikiqa noqakunachö kaykaq pitsqa chunka (50) mas kallpasapa runakuna Elíasta ashiyämunanpä aywayätsun. Quizasmi Tayta Diospa espïritun may jirkamanpis o may raqramanpis dëjaykushqa». Tsaynö niyaptinmi Eliseo nirqan: «Ama wallälla yarpachakur pitapis mandayaytsu».
17
Tsaynö niptinpis kutin kutin ashiq aywayänanpä niyaptinmi Eliseo mana munaykar awnirqan. Tsaymi pitsqa chunka (50) runakuna aywar kimsa junaq ashirpis Elíasta tariyarqantsu.
18
Mana tarir Jericóman kutiykuyaptinmi Eliseo nirqan: «Willaykaptïmi aywayarqayki».
19
Tsaypita juk kutinam Jericó runakuna Eliseuta niyarqan: «Taytay, rikanqaykinömi kay markaqa alli sitiuchö kaykan. Peru pochquq yaku kaptinmi chakrakunapis wayuntsu».
20
Tsaynö niyaptinmi Eliseuqa mañakurqan mushuq tazonta y kachita. Apaykuyaptinmi
21
pukyuman aywaykur tsay kachita wiñar nirqan: «Tayta Diosmi nin: «Noqam kay yakuta alli yakuman tikratsirqü. Kananpitaqa manam pipis kay yakuta upur wanunqatsu y chakrakunapis allinam wayunqa».
22
Eliseo ninqannöllam kananyaqpis tsay yaku pochqunnatsu.
23
Tsaypitanam Bet-elman Eliseo aywakurqan. Cuestata witsaykaptinmi markapita yarqamur jövinkuna burlakur niyarqan: «¡Qara putum witsaykämun! ¡Qara putum witsaykämun!»
24
Tsaynö burlakuyaptinmi Eliseuqa paykuna kaqman tumaykur Tayta Diospa jutinchö maldicionarqan. Tsaymi muntipita ishkay ösukuna yarqaskamur chusku chunka ishkay (42) jövinkunata wanutsiyarqan.
25
Eliseunam Carmelo jirkaman aywarqan. Tsaypitanam Samaria markaman kutikurqan.
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 3 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25