2 Kings 23

Quechuan QXO (Biblia en Quechua del sur de Conchucos)

← Chapter 22 Jump to: Chapter 24 →

1Tsaynö willayaptinmi rey Josíasqa Jerusalénchö y Judáchö täraq mayor runakunata qayatsirqan.

2Tsaymi Jerusalénchö y Judá nacionchö täraq runakuna, sacerdötikuna, profëtakuna y wakin runakunapis wamrapita qallaykur hasta rukuyaq Tayta Diospa templunman qorikäyarqan. Reypis chaykurmi tsaychö tarinqan Pactu Libruta jinchipa liyiparqan.

3Liyipaskirnam templupa paradornin ñöpanman ichiykur Tayta Diospa puntanchö rey Josías pactuta rurar awnirqan libruchö qellqashqa pactuta cumplir mandamientunkunata, yätsinqankunata y leyninkunata llapan shonqunwan imaypis cumplinanpä. Tsaynöllam tsaychö kaykaq llapan runakunapis awniyarqan pactuta cumpliyänanpä.

4Tayta Diospa templunchömi Baal diosta, Asera diösata, rupayta, killata y qoyllurkunata adorayänanpä manëjukuna karqan. Tsay manëjukunata templupita jipiskir llapanta kayayänanpämi reyqa mandaq sacerdöti Hilcíasta, wakin sacerdötikunata y punku cuidaqkunata mandarqan. Tsaymi Jerusalénpita Cedrón raqraman apaykur kayayarqan. Uchpantanam Bet-elman apatsirqan.

5Josías manarä rey kaptinmi Judá nacionchö wakin reykuna sacerdötikunata churayarqan markakunachö kaykaq altarkunachö inciensiuta qoshnitsiyänanpä. Tsay sacerdötikunam Judá markakunachö y Jerusalén cercankunachöpis qoshnitsiyaq Baalpä, rupaypä, killapä y qoyllurkunapä. Tsaynö rurayaptinmi sacerdöti kayanqanpita rey Josías qarqurqan.

6Tsaynöllam rey Josíasqa Asera diösapä jawiyanqan raku qeruta Tayta Diospa templunpita jipiskatsir Cedrón raqraman apaykur uchpayanqanyaq rupatsirqan. Tsay uchpatanam panteonman qotuyarqan.

7Tsay witsanmi wakin runakuna y warmikuna diosninkunata adorar altarkuna kanqanchö jukwan jukwan kakuyaq. Tsay runakunapa y warmikunapa cuartunkuna Tayta Diospa templunchömi karqan. Tsay cuartukunachömi Asera diösapä röpakunata warmikuna awayaq. Tsaymi llapan tsay cuartukunata rey Josías juchutsirqan.

8Tsaypitanam rey Josíasqa Judá nación markakunapita llapan sacerdötikunata qayatsimurqan Jerusalénchöna täyänanpä. Jerusalénchö manarä tarmi tsay sacerdötikunaqa markakunachö kaykaq altarkunachö inciensiuta qoshnitsiyaq. Tsaymi rey Josías Gebapita qallaykur hasta Beersebapa lindërunyaq llapan tsay altarkunata impüruyätsirqan. Tsaynöllam juchutsirqan Jerusalén markapa gobernadornin Josué ruratsinqan punkuchö kaykaq altarkunatapis. Tsay altarkunaqa markaman yaykuna itsuq kaq läduchömi karqan.

9Markakunachö kaykaq altarkunachö qoshnitsiq sacerdötikunataqa rey Josías manam dëjarqantsu Tayta Diospa altarninman aywayänanta. Peru sacerdöti mayinkunawan levadüraynaq tantata mikuyänanpämi sïqa dëjarqan.

10Ben-hinomchö kaykaq altartapis impüruyätsirqan Moloc diospä wamrankunata tsaychö pipis mana rupatsinanpämi.

11Judá nacionpa unay mandaqnin reykuna rupaypä bendisayanqan caballukunatapis llapantam wanutsirqan. Tsaynöllam rupaypä bendisayanqan carrëtakunatapis llapanta kayarqan. Tsaykunaqa karqan Tayta Diospa templunman yaykunan punku lädunchö y reypa yanapaqnin Natán-melecpa wayin lädunchömi.

12Tsaynöllam Acazpa sälan jananchö rurayanqan altarkunatapis llapanta juchutsirqan. Tsay altarkunataqa Judá nacionpa unay mandaqnin reykunam ruratsiyarqan. Tsaynöllam templupa ishkan patiunchö Manasés ruratsinqan altarkunatapis llapanta juchutsirqan. Tsay llapan juchutsinqankunatam Cedrón raqraman jitatsirqan.

13Tsaynöllam Jerusalén frentin Olivos jirkan sur kaq läduchö kaykaq altarkunatapis impüruyätsirqan. Tsaykunatam rey Salomón unay ruratsirqan Sidón runakuna adorayanqan Astoret diösata adorayänanpä, moabita runakuna adorayanqan Quemos diosta adorayänanpä y amonita runakuna adorayanqan Milcom diosta adorayänanpä.

14Tsaynöllam runakuna adorayanqan juytu rumikunata pakirqan y Asera diösata adorayänanpä jawiyanqan raku qerukunatapis mututsirqan. Tsaypitam tsay sitiukunata impüruyätsinanpä runakunapa tullunkunata jananman qotutsirqan.

15Tsaypitanam Bet-elchö kaykaq altarta juchuskatsir uchpayanqanyaq rupatsirqan. Tsay altartam Nabatpa tsurin Jeroboam ruratsirqan qoripita rurashqa torïtuta Israel runakuna adorayänanpä. Tsaynöllam rey Josías rupatsirqan Asera diösata adorayänanpä jawiyanqan raku qerukunatapis.

16Josíasqa Bet-elpita Jerusalénman kutirmi jirkanchö rikarqan runakuna pamparäyanqan sepultürakunata. Tsayta rikaykurmi sepultürakunapita tullukunata jipiskatsir Bet-elchö kaykaq altar jananchö rupatsirqan pipis tsaychö manana sacrificiuta rupatsinanpä. Tsaynöpam Tayta Diospa profëtan unay willakunqanta cumpliyarqan.

17Tsaypitanam juk monumentuta rikaskir tsay markachö täraq runakunata tapurqan: «¿Pipa monumentuntä taqaychö kaykan?» Tsaynam niyarqan: «Judápita shamuq profëtam tsaychö pamparaykan. Tsay profëtam unay willakurqan altar jananchö tullukunata rupatsinaykipä kanqanta».

18Tsaynö niptinmi rey Josías nirqan: «Paypa tullunkunataqa pipis ama yatatsuntsu». Tsaymi tsay tullukunata pipis yatarqantsu. Tsaynöllam Samaria profëtapa tullunkunatapis yatarqantsu.

19Bet-elchö kaykaq altarta juchutsinqannömi Samariachö kaykaq wakin markakunachöpis altarkunata wayintinta rey Josías juchutsirqan. Tsay altarkunata Israel nacionpa mandaqnin reykuna shäritsirmi Tayta Diosta pasaypa rabyatsishqa kayarqan.

20Manarä juchutsirmi tsaychö sirviq sacerdötikunatapis altar jananchö wanutsirqan. Tsaynöllam ayakunapa tullunkunata tsay altarkuna jananchö rupatsir impüruyätsirqan. Tsaypitanam Jerusalén markaman rey Josías kutirqan.

21Tsaypitanam rey Josías llapan runakunata nirqan: «Pactu Libruchö ninqannölla Tayta Diosnintsikta adorar llapantsik Pascua fiestata rurashun».

22Tsaymi Pascua fiestata rurayarqan. Juezkuna mandayanqan witsanpis ni Israel nacionta y Judá nacionta reykuna mandayanqan witsanpis rey Josías ruratsinqan Pascua fiestatanöqa manam rurayarqantsu.

23Rey Josías chunka puwaq watana rey kaykarmi Tayta Diospä tsay Pascua fiestata Jerusalénchö rurarqan.

24Brüjukunatapis y suerti qatiqkunatapis llapantam rey Josías qarqurqan. Tsaynöllam runakunapa wayinkunachö y maychö kaptinpis ïdulukunata ushakätsirqan. Tsaykunata sacerdöti Hilcías tarinqan libruchö qellqashqa kaykaq leykuna ninqannöllam Judá nacionchö y Jerusalénchö ushakätsirqan.

25Unay reykunapis y qepa reykunapis manam rey Josíasnöqa llapan shonqunwan, llapan voluntäninwan, llapan kallpanwan Tayta Dios munanqannötsu kawayarqan. Moisés qellqanqan leykunachö ninqannöllam payqa llapantapis cumplirqan.

26Tsaynö kaptinpis rey Manasés mana mantsaypa jutsata ruranqanpitam Judá nación runakunawan Tayta Dios pasaypa rabyashqa karqan.

27Tsaymi Tayta Dios nirqan: «Israel nación runakunata qarqunqänöllam Judá nación runakunatapis ñöpäpita qarqushä. Akranqä Jerusalénta y tänä templutapis mananam tsapäshänatsu».

28Rey Josías imata ruranqankunapis llapanmi Judá nacionpa mandaqnin reykunapa acta librunchö qellqashqa kaykan.

29Tsay witsanmi Egipto nacionpa mandaqnin rey Faraón Necao karqan. Paymi Éufrates mayu kaq lädupa soldädunkunawan aywayta munarqan Asiria nacionpa mandaqnin reyta yanapayänanpä. Peru yanapayänanta mana munarmi michänanpä rey Josíasqa soldädunkunawan yarquyarqan. Meguiduman chaykur Egipto runakunawan pelyaykäyaptinmi Josíasta Faraón Necao wanutsirqan.

30Rey Josíasta wanuskatsiptinmi ayanta soldädunkunapa capitanninkuna carrëtaman joqarkur Meguidupita Jerusalénman apayarqan. Tsayman chaykatsirmi ruratsinqan sepultüranman pampayarqan. Paypa rantinmi tsurin Joacaztana rey kananpä churayarqan.

31Joacazqa ishkay chunka kimsa (23) watayuq kaykarmi rey kayta qallaykurqan. Payqa kimsa killallam Jerusalénpita mandarqan. Mamanmi karqan Libna markapita Jeremíaspa tsurin Hamutal.

32Joacazpis unay castankunanömi Tayta Diosta mana cäsur jutsata rurarqan.

33Jerusalénchö rey mana kananpämi Joacazta Faraón Necao prësu tsariskir Ribla markaman aparqan. Riblaqa Hamat partichömi kaykan. Tsaypitam Judá runakunata nirqan kimsa waranqa kimsa pachak (3,300) kïlu yuraq qellayta y kimsa chunka kimsa (33) kïlu qorita qoriskir impuestuta pägayänanpä.

34Tsaypitanam Faraón Necaoqa Josíaspa tsurin Eliaquimta Jerusalénchö papäninpa rantin rey kananpä churarqan. Tsaypitam Eliaquimpa jutinta trocatsirqan Joacimta. Joacaztanam Egiptuman prësu apaykur wanunqanyaq tsarararqan.

35Rey Joacimnam Faraón mandanqannö multata pägananpä Judá nacionchö täraq runakunata qellaytapis qoritapis cobrarqan. Cobrakuskirnam Faraón Necaoman apatsirqan.

36Joacimqa ishkay chunka pitsqa (25) watayuq kaykarmi Judá nacionchö rey kayta qallaykurqan. Payqa chunka juk watam Jerusalénpita mandarqan. Mamanpa jutinmi Zebuda karqan. Payqa Rumapita Pedaíaspa wamranmi karqan.

37Unay castankuna jutsata rurar kawayanqannöllam Joacimpis Tayta Diosta mana cäsur jutsata rurarqan.

← Chapter 22 Jump to: Chapter 24 →