bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
2 Kings 6
2 Kings 6
Quechuan QXO (Biblia en Quechua del sur de Conchucos)
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 7 →
1
Juk kutim profëta mayinkuna Eliseuta niyarqan: «Taytay, kay juntu taykanqantsik sitiuqa pasaypa kichkim.
2
Mejor Jordán mayu kuchunman aywaykur qeruta mutuyämushä wayita ruraskir tänantsikpä». Tsaynö niptinmi Eliseo nirqan: «Aywayay ari».
3
Eliseutanam juk profëta nirqan: «Taytay, qamwanpis aywashun». Tsaynö niptinmi Eliseo nirqan: «Aywashun ari».
4
Paykunawan Eliseo aywarmi Jordán mayuman chaykur qeruta mutuyarqan.
5
Juk profëta qeruta mutuykaptinmi jächan jipikaskir mayuman wikapakaskirqan. Tsaymi nirqan: «¡Taytay, kayrächi kayllaqa! ¡Kay jächaqa mañakuyllam karqan!»
6
Eliseunam tapurqan: «¿Mayninmantä jitarpukashqa?» Tsaynö tapuptinmi rikatsirqan mayninman jitarpukanqantapis. Tsaymi takshalla qeruta mutuskir jächa jitarpukanqan kaqpa jitaykuptin jächa aynarkamurqan.
7
Tsaymi Eliseo nirqan: «Ras tsariy». Tsaynö niptinmi lamkaykur jächata jipiskamurqan.
8
Siria nacionpa mandaqnin reyqa Israel nacionwan guërrachö karmi soldädunkunapa capitanninkunawan willanakuyarqan mayqan partichöpis campamentunta rurayänanpä.
9
Tsayta musyaskirmi profëta Eliseuqa Israel nacionpa mandaqnin reyta willakatsir nirqan: «Siria soldädukunam tsayman shamuykäyan. Tsaypaqa ama päsayaytsu».
10
Profëta Eliseo cada vezlla tsaynö willaptinmi Israel nacionpa mandaqnin reyqa cercanchö markakunaman soldädunkunata mandarqan Israel nacionta defiendiyänanpä. Tsaynöpam atska kuti Israel runakuna salvakuyarqan.
11
Tsaynö päsaptinmi Siria nacionpa mandaqnin rey pasaypa rabyar capitanninkunata qayaykur nirqan: «¿Mayqaykikunatä maypa atacanantsikpä willanakunqantsikta Israel nacionpa mandaqnin reyta willaykäyanki?»
12
Tsaynö niptinmi juk capitán nirqan: «Taytay, noqakunaqa manam pitapis willayarqütsu. Israelchö kaykaq profëta Eliseum cuartuykichö pakayllapa ninqaykitapis mandaqnin reyta willan».
13
Tsaynö niptinmi nirqan: «Tsay runa maychö kanqantapis musyayämuy prësu tsaritsimunäpä». Tsaynö niptinmi Dotán markachö profëta Eliseo kaykanqanta willayarqan.
14
Tsaymi caballunkunawan y carrëtankunawan atska soldädunkuna paqaspa aywarnin Eliseo täranqan Dotán markaman chaykur jiruruypa tsapaskiyarqan.
15
Patsa waraskiptinmi Eliseupa sirviqnin waqtapa yarqunqanchö rikarqan atska soldädukuna caballun muntashqa y carrëtankunawan markata tumaypa jiruruparaykaqta. Tsaymi Eliseuta nirqan: «¡Taytay, imanötä kaykullantsik! ¡Kanan imatatä rurashun!»
16
Eliseunam nirqan: «Ama mantsariytsu. Tayta Dios mandamunqan angelkunaqa paykunapa soldädunkunapita mas atskam kaykäyan».
17
Tsaynö niskirmi Tayta Diosta mañakur Eliseo nirqan: «Tayta Dios, sirvimaqnïta yanapaykullay mandamunqayki angelkunata rikananpä». Tsaynö mañakuptinmi Eliseupa sirviqninta Tayta Dios rikatsirqan tsaytsika angelkunata. Tsay angelkunam caballunkunawan y ninanö atsikyaykaq carrëtankunawan Eliseuta tsapäyänanpä jirkanchö kaykäyänä.
18
Siria soldädukuna prësu tsariyänanpä aywayaptinmi Eliseuqa Tayta Diosta mañakur nirqan: «Tayta Dios, kay soldädukunata qaprayaykatsillay». Tsaynö nir mañakuptinmi jinan höra soldädukunata Tayta Dios qaprayätsirqan.
19
Tsaymi tsay soldädukunata Eliseo nirqan: «Qamkunaqa llutan nänipam shayämurquyki. Ashiykäyanqayki runa manam kay markachötsu. Aku pay kaqman pushayäshayki». Tsaynö nirmi Samaria markaman pusharqan.
20
Samaria markaman chaykatsirnam Tayta Diosta mañakur nirqan: «Tayta Dios, kay soldädukuna rikayänanpä ñawinkunata alliykatsillay». Tsaymi tsay soldädukunaqa ñawinkuna alliskiptin tantiyayarqan Samaria pläzachö kaykäyanqanta.
21
Pläzachö kaykäyaqta rikaykurmi Israel nacionpa mandaqnin reyqa Eliseuta tapurqan: «Taytay, kay soldädukunata ¿rasku wanutsishä?»
22
Tsaynö niptinmi Eliseo nirqan: «Ama wanutsiytsu. Manam imaypis guërrachö tsarinqantsik prësukunata wanutsintsiktsu. Wanutsinaykipa rantinqa mikuytapis yakutapis qaraykur mandaqnin rey kaqman kutikuyänanpä despachay».
23
Tsaynö niptinmi alli allita kusinaskatsir qararqan. Mikur upur ushaskiyaptinnam mandaqnin reyman kutikuyänanpä despacharqan. Tsaypitaqa Israel nacionta Siria nación runakuna mananam atacayarqannatsu.
24
Tsaypita juk ishkay wata päsaskiptinnam Siria nacionpa mandaqnin rey Ben-adad llapan soldädunkunawan qorikaskir Samaria markata atacayänanpä aywayarqan. Chaykurmi soldädunkunawan tumaypa tsapaskiyarqan.
25
Tsaymi Samaria markachö pasaypa hambrüna kaptin ashnupa umanta rantikuyarqan puwaq chunka (80) yuraq qellaychö. Tsaynöllam palumapa wänunta juk pucilluwan tupuskir rantikuyarqan pitsqa yuraq qellaychö.
26
Juk junaqmi Israel nacionpa mandaqnin rey murälla jananpa puriykaqta rikaykur juk warmi qayar nirqan: «Taytay, yanapaykallämay».
27
Tsaynö qayaptinmi rey nirqan: «Manam trïgüpis ni vïnüpis qaranäpä kantsu. Tayta Dios mana yanapashuptikiqa ¿imanöpatä noqa ayudäman?»
28
Tsaypita mastam nirqan: «¿Imachötä ayudäman?» Tsaynö niptinmi nirqan: «Kay warmiwanmi wamräkunata mikuyänäpä willanakuyarqä. Tsaymi paywan ninakuyarqä noqapa wamräta puntata mikuskir paypa wamrantana mikuyänäpä.
29
Tsaynö nimaptinmi wamräta mikuyarqü. Waraynin junaq paypa wamrantana mikuyänäpä willanakushqa kaykäyaptïmi payqa wamranta pakashqa».
30
Warmi tsaynö ninqanta wiyarmi reyqa pasaypa llakikur röpanta rachirqan. Murälla jananpa puriptinmi runakuna röpan rurinchö lütu röpan jatishqa kaykanqanta rikayarqan.
31
Puriykanqanchömi fuertipa nirqan: «¡Tayta Dios castigamätsun Safatpa tsurin Eliseupa umanta kanan junaq mana roqutsiptïqa!»
32
Tsaynö nirmi Eliseuta wanutsinanpä juk runata mandarqan. Tsayyaqmi Israel mayor runakunawan Eliseo wayinchö jamaraykäyarqan. Rey mandanqan runa Eliseupa wayinman manarä chaptinmi Eliseo nirqan: «Mandamaqnintsik rey wanutsikuq karmi wanutsimänanpä runata mandaykämun. Maya mayalla kaykäyay. Tsay runa chaykämuqta rikar punkuta jinchipa trancayanki. Paypa qepantanam patronninpis shamuykan».
33
Tsaynö parlaykäyaptinmi rey mandanqan runa Eliseupa wayinman chaykur nirqan: «Tsayläya desgraciaman Tayta Diosmi jitarpamarquntsik. Tsaynö kaykaptinqa ¿imapänatä payman yärakushunpis?»
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25