2 Kings 8

Quechuan QXO (Biblia en Quechua del sur de Conchucos)

← Chapter 7 Jump to: Chapter 9 →

1Juk kutim kawatsinqan wamrapa mamanta Eliseo nirqan: «Qanchis wata alläpa hambrüna kananpämi Tayta Dios nimashqa. Tsaynö kananpä kaykaptinqa kay markapita maypapis castaykikunawan aywakuyay».

2Profëta Eliseo ninqanta cäsurmi warmiqa llapan castankunawan filisteo runakunapa nacionninman aywakuyarqan. Tsay nacionchömi qanchis wata täyarqan.

3Qanchis wata päsaskiptinnam markanman warmi kutikurqan. Chaykurmi wayinta y chakrankunata qorikunanpä rey kaqman rugaq aywarqan.

4Tsay warmi chänanpämi Eliseupa sirviqnin Gieziwan rey parlaykarqan. Tsaychömi Giezita tapupaykarqan Eliseo milagru ruranqanta willananpä.

5Tsaychö warmipa wamranta Eliseo imanö kawatsimunqanta willaykaptinmi wamran pushashqa tsay warmi reyta rugananpä charqan. Tsay warmita y wamranta rikaskirmi Giezi nirqan: «¡Taytay, paypämi willaykarqü! ¡Eliseo kawatsimunqan wamranpis paymi kaykan!»

6Tsaymi tsay warmita rey tapurqan wamranta imanö kawatsimunqanta. Tsaynö willaptinmi tsay warmipa wayinta y chakrankunata entregatsinanpä juk yanapaqninta rey nirqan. Tsaynöllam nirqan aywakur dëjanqan junaqpita chakranta murunqanpita tsay warmita pägananpä.

7Tsaypitanam Eliseuqa Damasco markaman aywarqan. Tsaychömi Siria nacionpa mandaqnin rey Ben-adad pasaypa antsa qeshyaykarqan. Tsayman Eliseo chanqanta willayaptinmi

8yanapaqnin Hazaelta rey Ben-adad nirqan: «Imallatapis qaranaykipä apakurkur profëta kaqman ayway. Chaykur ninki: «Tayta Diostash tapukuykullanki rey allïnanpä o mana allïnanpä kanqantapis».

9Tsaynö niptinmi Hazaelqa chusku chunka (40) camëllukunawan qarananpä kaqkunata apakurkur profëta kaqman aywarqan. Chaykurmi nirqan: «Siria nacionpa mandaqnin rey Ben-adadmi papänintanö respitashunki. Paymi mandamashqa qeshyaykanqanpita allïnanpä o mana allïnanpä kanqantapis willamänaykipä».

10Tsaynö niptinmi Eliseo nirqan: «Kanan aywar reyta willay qeshyanqanpita allïnanpä kanqanta. Peru tsay qeshyanqanpita allirpis wanunanpäna kanqantam Tayta Dios nimashqa».

11Tsaynö niskirmi Hazael pasaypa penqakunqanyaq profëta Eliseo rikararqan. Rikapaykanqanchömi Eliseuqa waqayta qallaskirqan.

12Tsaynö waqaptinmi Hazael tapurqan: «¿Taytay, imanirtä waqanki?» Eliseunam nirqan: «Musyämi Israel nacionchö murallashqa markakunata rupatsinaykipä kanqanta, jövinkunata espädaykiwan wanutsinaykipä kanqanta, wamrakunata tsapiypa wanutsinaykipä kanqanta y qeshyaq warmikunapa pachantapis qashar ushanaykipä kanqanta. Israel runakunapa contran shärir tsaynö ruranaykipä kanqanta musyarmi waqaykä».

13Tsaynö niptinmi Hazael nirqan: «Taytay, mana väliq allqunö kaykarqa ¿imanöpatä tsaykunata ruräman?» Tsaynö niptinmi Eliseo nirqan: «Tayta Diosmi musyatsimashqa Siria nacionpa mandaqnin rey kanaykipä kanqanta».

14Tsaypitanam Hazaelqa Eliseupita despidikuskir reyman kutirqan. Chaykuptinnam rey tapurqan: «¿Imatatä Eliseo nishurquyki?» Tsaynö tapuptinmi Hazael nirqan: «Allïnaykipä kanqantam nimashqa».

15Tsaypita waraynin junaqnam Hazaelqa juk frazädata ushmaskatsir reypa umanta wankuskiptin jamatsakaypa wanurqan. Tsaynö wanuskatsirmi Hazaelna Siria nacionpa mandaqnin rey karqan.

16Acabpa tsurin Joram pitsqa watana Israel nacionchö rey kaykaptinmi Judá nacionchö Josafatpa tsurin Joram rey kayta qallaykurqan.

17Mandayta qallanqan witsanmi kimsa chunka ishkay (32) watayuq kaykarqan. Payqa puwaq watam Jerusalénpita mandarqan.

18Rey Acabpa warmi tsurinwan tarmi Acabpa castankunanölla y Israel nacionpa mandaqnin reykunanölla Tayta Diosta mana cäsur jutsata rurarqan.

19Tsaynö kaptinpis sirviqnin Davidpita miraq runa Judáchö imaypis rey kananpä pactuta rurashqa karmi Judá nacionta Tayta Dios ushakätsirqantsu.

20Judá nacionchö Joram rey kanqan witsanmi Edom nación runakuna Judá nacionpa poderninchö kayanqanpita yarquskir kikinkunapa mandaqninkuna reyta churayarqan.

21Tsaymi Joramqa guërra carrëtakunawan Edomchö Zair markaman atacayänanpä aywayarqan. Edomita soldädukuna pelyayänanpä yarqurmi rey Joramta y carrëtakunawan aywaq capitankunata tumaypa tsapaskiyarqan. Tsaynö tsapaskiyaptinmi Israel soldädukunaqa imaykanöpapis paqaspa qeshpir wayinkunaman aywakuyarqan.

22Tsaypitam Edom nación runakunaqa kananyaqpis Judá nacionpa poderninchönatsu kayan. Tsay witsanllanam Libna marka runakunapis Judá nacionpa poderninpita yarqukuyarqan.

23Joram imata ruranqanpis llapanmi Judá nacionpa mandaqnin reykunapa acta librunchö qellqashqa kaykan.

24Joram wanuskiptinmi Davidpa Markanman unay castankuna pamparäyanqan kaqman pampayarqan. Paypa trokinnam tsurin Ocozías rey kananpä yaykurqan.

25Acabpa tsurin Joram chunka ishkay wata Israel nacionchö mandaq kaykaptinmi Judá nacionpa mandaqnin rey Jorampa tsurin Ocozías rey kayta qallaykurqan.

26Mandayta qallanqan witsan Ocozíasqa ishkay chunka ishkay (22) watayuqmi kaykarqan. Payqa juk watallam Jerusalénpita mandarqan. Mamanmi Atalía karqan. Atalíaqa Israel nacionpa mandaqnin rey Omripa willkanmi karqan.

27Ocozíaspis Omripa tsurin Acab castawan tarmi Tayta Diosta mana cäsur Acab y Acabpa castankuna jutsata ruranqannö jutsata rurarqan.

28Ocozíasmi Israel nacionpa mandaqnin rey Joramwan Siria nacionpa mandaqnin rey Hazaelta atacayänanpä willanakuyarqan. Rey Joramqa Acabpa tsurinmi karqan. Atacayänanpä awniptinmi Galaadchö kaykaq Ramot markaman soldädunkunawan aywayarqan. Tsaychö pelyar Siria soldädukuna rey Joramta flëchaskiyaptinmi

29Jezreel markaman jampikunanpä kutirqan. Qeshyar ujuraykaptinmi rey Ocozías payta watukaq aywarqan.

← Chapter 7 Jump to: Chapter 9 →