2 Kings 18

Quechuan QXO (Biblia en Quechua del sur de Conchucos)

← Chapter 17 Jump to: Chapter 19 →

1Elapa tsurin Oseas kimsa wata Israel nacionchö rey kaykaptinmi Acazpa tsurin Ezequías Judá nacionchö rey kayta qallaykurqan.

2Mandayta qallanqan witsanmi ishkay chunka pitsqa (25) watayuq karqan. Payqa ishkay chunka isqun (29) watam Jerusalénpita mandarqan. Mamanmi Zacaríaspa tsurin Abi karqan.

3Tayta Diosta cäsur unay castan David kawanqannömi Ezequíaspis kawarqan.

4Paymi markakunachö kaq altarkunata juchutsirqan y runakuna adorayanqan juytu rumikunatapis pakirqan. Tsaynöllam Asera diösapä jawiyanqan raku qerukunatapis tseqtarqan. Moisés ruranqan broncipita culebratapis pakirqan. Tsaynö pakirqan Israel runakuna adorar inciensiuta qoshnitsiyaptinmi. Tsay broncipita rurashqa culebrapa jutinmi Nehustán karqan.

5Israel runakunata kuyaq Tayta Diosmanmi rey Ezequías llapan shonqunwan yärakurqan. Judá nacionchö punta y qepa kaq reykunapis manam paynöqa Tayta Diosman yärakuyarqantsu.

6Ezequíasqa Tayta Dios munanqannö kawarmi wanunqanyaqpis Moisés chaskinqan mandamientukunata llapanta cumplirqan.

7Tayta Dios yanapaptinmi llapan ruranqankunapis allilla karqan. Tsaymi Asiria nacionpa mandaqnin reypa poderninchö kaykanqanpita yarqukurqan.

8Tsaynöllam filisteo runakunawan pelyar vincirqan rikachakuna törrikunachö täyaptinpis y murallashqa jatun markakunachö täyaptinpis. Tsaynö vincirqan Gaza markayaq y lädunkunachö kaykaq markakunayaqmi.

9Tsaypitanam Asiria nacionpa mandaqnin rey Salmanasar Samaria markata jiruruypa corralaskir soldädunkunawan atacayarqan. Tsayqa karqan Ezequías chusku wata Judá nacionpa mandaqnin rey kaykaptin y Elapa tsurin Oseas qanchis wata Israel nacionpa mandaqnin rey kaykaptinmi.

10Kimsa wata tsaynö atacarmi Israel runakunata vinciyarqan. Tsayqa karqan Judá nacionchö Ezequías joqta wata rey kaykaptin y Oseas isqun wata Israel runakunapa mandaqnin rey kaykaptinmi.

11Israel runakunata vinciskirmi Asiriaman soldädunkunawan apayarqan. Asiriaman chaykurmi Halah markaman y Gozánchö kaykaq Habor mayu lädunchö kaykaq markakunaman tsaychö täyänanpä churarqan. Tsaynöllam Media runakunapa markankunaman tsaychö täyänanpä churarqan.

12Tsaynö apayarqan Tayta Dioswan pactu ruranqanta manakaqman churayanqanpita, mandanqankunata mana wiyakuyanqanpita y Tayta Diospa sirviqnin Moisés ninqankunata mana cäsuyanqäpitam.

13Chunka chusku wata Ezequías rey kaykaptinmi Asiria nacionpa mandaqnin rey Senaquerib Judá nacionman soldädunkunawan chäyarqan. Chaykurmi alli murallashqa markakunata atacar qechuyarqan.

14Judá nacionchö kaykaq Laquis markata atacaykäyaptinmi rey Ezequías juk willakuqta mandarqan Senaqueribta ninanpä: «Taytay, rey Ezequías impuestuta mana pägashunqaykipitash perdonaykunki. Kaypita yarqukuptikiqa aykatapis mañanqaykitash impuestuta pägashunki». Tsaymi rey Senaquerib nirqan: «Tsayöraqa isqun waranqa isqun pachak (9,900) kïlu qellayta y isqun pachak isqun chunka (990) kïlu qorita pägamätsun».

15Tsaynö niptinmi Ezequíasqa palaciunpita y Tayta Diospa templunpita llapan qellayta qoriskir entregarqan.

16Rey Senaqueribta pägananpämi templupa punkunkunapita y marcunkunapitapis kikin enchapatsinqan qorikunata jipitsirqan.

17Tsaynö entregaptinpis Senaqueribqa Laquis markapita tsaytsika soldädunkunatam Jerusalénta atacayänanpä Ezequíasman mandarqan. Tsay soldädukunata pushakurkurmi soldädukunapa capitannin y ishkay yärakunqan mandayiqninkunapis aywayarqan. Jerusalénman chaykurmi jana kaq pözuman aywaq sikya lädunchö campamentuta rurayarqan. Tsayqa taqshakuna pampaman aywaq nänichömi karqan.

18Tsaypitanam qayatsiyarqan Ezequíasta. Qayatsiyaptinmi paykunawan parlayänanpä rey Ezequías mandarqan Hilcíaspa tsurin Eliaquimta, Sebnata y Asafpa tsurin Joata. Eliaquimmi palaciuchö kaqkunata cuidaq, Sebnanam secretariu y Joanam Judáchö ima päsanqankunatapis qellqaq karqan.

19Paykunatam mandaq capitán nirqan: «Ezequíasman kutiykur Asiriapa mandaqnin rey ninqanta willar niyay: «¿Piman yärakurtä qam yarpanki vinciyämänaykipä kanqanta?

20¿Imanirtä yarpaykanki alli parlaq kanqaykipita guërrachö vinciyämänaykipä kanqanta? ¿Piman yärakurtä noqakunapa conträ shäriykanki?

21Egipto runakunaman yärakuptikipis paykunaqa manam yanapayäshunkitsu. Mandaqnin rey Faraónpis carrïzupa astïllan maki paltaykiman yaykuqnömi qamkunapä kanqa. Payman yärakuqkunapäqa imaypis tsaynöllam kaykan.

22«Tayta Diosnïmanmi yärakuyä» nimaptikipis manam paypis yanapashunkitsu. Markakunachö kaq altarkunata juchutsir Judá runakuna Jerusalénllachö Tayta Diosta adorayänanpä ninqaykipitam payqa rabyashqa kaykan».

23«Noqakunawan pelyayta munarqa mandamaqnï rey Senaqueribwan parlay. Caballu muntaq soldäduykikuna kaptinqa noqam ishkay waranqa (2,000) caballukunata pelyanantsikpä alistapäshayki.

24Guërra carrëtakunata y caballu muntakuqkunata Egiptupita apamurpis tsayrä yachakuq capitannïkuna mandanqan soldädunkunallatapis manam vinciyta puëdiyankitsu.

25Tsaynöllam kikin Tayta Dios nimashqa kay nacionta ushakätsiq shayämunäpä. Ama yarpäyaytsu kikïlläpa yarpaylläpita kay nacionta ushakätsiq shayämunqäta».

26Tsaynö niptinmi Hilcíaspa tsurin Eliaquim, Sebna y Joa Asiria soldädukunapa mandaqnin capitanta niyarqan: «Murälla jananchö kaykaq runakuna niyanqaykita mana tantiyayänanpä hebreo idiömapa ama parlayaytsu. Tsaypa rantinqa arameo idiömachö parlapäyämay. Noqakunaqa arameo idiömatam tantiyayä».

27Tsaynam Asiria nacionpa capitannin nirqan: «Manam patronllaykita ni qamkunallata willayänäpätsu Asiria nacionpa mandaqnin rey mandayämashqa, sinöqa murälla jananchö kaykaq runakunatapis willayänäpämi. Atacayaptïmi qamkunaqa pasaypa mallaqar rakchaykikunata mikuyanki y yakunarmi ishpaynikikunatapis upuyanki».

28Tsaypitam Asiria nacionpa capitannin shärirkur hebreo idiömachö jinchipa parlarqan: «Shumaq wiyakuyay Asiria nacionpa mandaqnin rey ninqanta.

29Paymi nin: «Rey Ezequías niyäshunqaykita ama cäsuyaytsu. Podernïpita manam pay salvayäshunkitsu.

30Tayta Diosllaman yärakuyänaykipä niyäshuptikipis ama criyiyaytsu. Tayta Dios salvayäshunaykipä niyäshuptikipis ni kay markata pay tsapänanpä kanqanta niyäshuptikipis

31ama criyiyaytsu». «Asiria nacionpa mandaqnin reymi nin: «Conträ shäriyänaykipa rantinqa alli chaskiyämay. Noqapa podernïchö karqa jukniki juknikipis üvaykikunata y hïgusnikikunatam tranquïlu mikuyanki. Tsaynöllam kikikikuna uchkutsiyanqayki pözupita yakutapis tranquïlu upuyanki.

32Tsaynö kawayänaykipämi juk nacionman apayäshayki. Tsay nacionqa kay nacionnikinömi kaykan. Tsaychöqa tantata rurayänaykipä trïgupis allim wayun. Üvapis vïnuta rurayänaykipä allim wayun. Tsaychöqa olïvus aceiti y abëjapa mishkinpis tsaytsikam kaykan. Kaychö wanuyänaykipa rantin kushishqam tsaychö kawayanki. «Ezequías ninqantaqa ama cäsuyaytsu. «Tayta Diosmi salvamäshun» niyäshurnikim engañayäshunki.

33Manam mayqan nacionpa diosninkunapis mayjina mañakuyaptinpis podernïpita salvashqatsu.

34Hamat runakunata atacaptï ¿maychötä diosninkuna karqan? Tsaynölla Arfad runakunata, Sefarvaim runakunata, Hena runakunata y Iva runakunata atacaptï ¿maychötä diosninkuna karqan? Samaria markata atacaptïpis manam mayqan diospis salvashqatsu.

35Tsay nacionkunapa diosninkunapis manam salvayta puëdiyashqatsu. Tsaynö kaykaptinqa kanan ¡imanöpash Jerusalénta makïpita Diosniki salvanqa!»

36Tsaynö niptinpis murälla jananchö kaykaq runakuna imatapis manam parlakuyarqantsu. Paykunataqa rey Ezequíasmi yätsirqan imatapis mana parlakuyänanpä.

37Tsaymi Hilcíaspa tsurin Eliaquim, Sebna y Asafpa tsurin Joa pasaypa llakikur röpankunatapis rachir ushayarqan. Eliaquimqa palaciuchö kaqkunatam imatapis cuidaq. Sebnanam secretariu karqan. Joanam Judáchö ima päsanqankunatapis qellqaq karqan. Tsaypitam rey Ezequíasman aywayarqan Asiria nacionpa mandaqnin runa imata ninqantapis willayänanpä.

← Chapter 17 Jump to: Chapter 19 →