Jeremiah 13

Sinhala Bile - Revised Old Version (SROV)

← Chapter 12 Jump to: Chapter 14 →

1ස්වාමීන්වහන්සේ මට කථාකොට: ඔබ ගොස් හණ පටියක් මිලේටගෙන ඔබේ ඉඟටියෙහි බැඳගන්න, ඒක වතුරේ නොදමන්නැයි කීසේක.

2මමද ස්වාන්වහන්සේගේ වචනය ලෙස පටියක් මිලේටගෙන මාගේ ඉඟටියෙහි බැඳගත්තෙමි.

3දෙවෙනි වර ස්වාමීන්වහන්සේ ගේ වචනය මා වෙතට පැමිණ:

4ඔබ මිලේටගත්තාවූ ඔබේ ඉඟටියෙහි තිබෙන පටිය අරගෙන පිටත්වී, ප්‍රාත් ගංගාව ළඟට ගොස් එහි පර්වතයේ විවරයක ඒක සඟවා තබන්නැයි කීය.

5මමද ස්වාමීන්වහන්සේ මට අණකළ ලෙස ගොස් ප්‍රාත් ගංගාව ළඟ ඒක සඟවා තැබීමි.

6බොහෝ දවසකට පසු ස්වාමීන්වහන්සේ මට කථාකොට: ඔබ පිටත්වී ප්‍රාත් ගංගාව ළඟට ගොස්, එහි සඟවා තබන්ට මා විසින් ඔබට අණකළ පටිය එතැනින් ගන්නැයි කීසේක.

7මමද ප්‍රාත් ගංගාව ළඟට ගොස්, හාරා, මා විසින් පටිය සඟවා තැබූ තැනින් ඒක ගතිමි. එවිට පටිය නරක්ව වැදගැන්මකට නැතුව තිබුණේය.

8ස්වාමීන්වහන්සේ ගේ වචනයද මා වෙතට පැමිණ මෙසේ කීය:

9ස්වාමීන්වහන්සේ මෙසේ කියනසේක- මෙයාකාරයෙන් මම යූදා රටේ උඩඟුකමද යෙරුසලමේ මහත් උඩඟුකමද නරක්කරන්නෙමි.

10මාගේ වචන අසන්ට අකමැතිවූ, තමුන්ගේ සිත්වල මුරණ්ඩුකම ලෙස හැසිර අන් දෙවිවරුන්ට සේවයකරන්ටත් නමස්කාරකරන්ටත් ඔවුන් පස්සේ යන්නාවූ මේ නපුරු සෙනඟ වැදගැන්මකට නැති මේ පටිය මෙන් වෙනවා ඇත.

11පටිය මනුෂ්‍යයෙකුගේ ඉඟට ඇලෙන්නාක්මෙන් මට සෙනඟක්ද නාමයක්ද ප්‍රශංසාවක්ද තේජසක්ද වන පිණිස මුළු ඉශ්‍රායෙල් වංශයද මුළු යූදා වංශයද මට ඇලුම්වෙන්ට සැලැස්වීමි. නුමුත් ඔව්හු අසන්ට අකමැතිවූවෝයයි ස්වාමීන්වහන්සේ කියනසේක.

12තවද සියලු භාජන මුද්‍රිකපානයෙන් පිරී තිබෙන්නේයයි ඉශ්‍රායෙල්ගේ දෙවිවූ ස්වාමීන්වහන්සේ කියනසේක යන මේ වචනය ඔවුන්ට කියන්න. ඔවුන්ද: සියලු භාජන මුද්‍රිකපානයෙන් පිරී තිබෙන්නේය යන බව අපි නොදනිමෝදැයි ඔබට කියනවා ඇත.

13එවිට: ස්වාමීන්වහන්සේ මෙසේ කියනසේකැයි ඔවුන්ට කියන්න එනම්,--මේ දේශයේ සියලු වැසියන්ද දාවිත්ගේ සිංහාසනයෙහි ඉන්න රජවරුන්ද පූජකයන්ද ප්‍රොපේතවරුන්ද යෙරුසලමේ සියලු වැසියන්ද මත් ගතියකින් පුරවා,

14මනුෂ්‍යයෙකු හා ඔහුගේ සහෝදරයාද පියවරුන් හා පුත්‍රයන්ද එකට ගසන්නෙමි; ඔවුන් විනාශ නොකරන හැටියට මා දයාවෙන්නේවත් කරුණාකරන්නේවත් අනුකම්පාකරන්නේවත් නැතැයි ස්වාමීන්වහන්සේ කියනසේක.

15ඔබ සැම උඩඟු නොවී අසා කන්යොමුකරන්න. මක්නිසාද ස්වාමීන්වහන්සේ කථාකළසේක.

16උන්වහන්සේ අන්ධකාරකරන්ට පළමුවෙන්ද ඔබ සැමගේ පාද අඳුරු කඳුවල පැකිලෙන්ටත් ඔබ සැම එළිය ගැන බලා සිටිද්දී උන්වහන්සේ එය මරණයේ සෙවණට හරවා කළුවරකරන්ටත් පළමුවෙන්ද ඔබ සැමගේ දෙවිවූ ස්වාමීන්වහන්සේ ට ගෞරව දීපල්ලා.

17නුමුත් ඔබ සැම ඒක අසන්නේ නැත්නම්, මාගේ ආත්මය රහස් තැන්වලදී ඔබ සැමගේ උඩඟුකම ගැන අඬා, බොහෝසෙයින් කඳුළු වගුරුවනවා ඇත; ස්වාමීන්වහන්සේ ගේ රැළද වාලට ගෙනයනු ලැබූ නිසා මාගේ ඇස්වලින් කඳුළු ගලනවා ඇත.

18ඔබ සැම පහත ඉඳගන්න. මක්නිසාද ඔබ සැමගේ තේජවන්ත ඔටුන්න ඔබ සැමගේ හිස්වලින් වැටුණේයයි රජුටත් මවු බිසවටත් කියන්න.

19දකුණු දිශාවේ නුවරවල් වසා තිබේ, ඒවා අරින්ට කෙනෙක් නැත. මුළු යූදා රට වාලට ගෙනයනු ලැබීය; සහමුලින්ම ගෙනයනු ලැබීය.

20යෙරුසලම, ඔබේ ඇස් ඔසවා, උතුරුදිගින් එන්නන් බලන්න. ඔබට දුන් රැළ වන ඔබේ අලංකාර රැළ කොයිද?

21ඔබට යහළුවන් වෙන්ට ඔබම ඉගැන්වූ අයවලුන් උන්වහන්සේ ඔබ කෙරෙහි ප්‍රධානකමට පත්කරන විට ඔබ මක්කියන්නෙහිද? බිහිකරන ස්ත්‍රියෙකුට මෙන් ඔබට වේදනා අල්ලන්නේ නැද්ද?

22මේවා මම සිද්ධවුණේ මක්නිසාදැයි ඔබේ සිත තුළ ඔබ ඇසුවාම, ඔබේ අයුතුකමේ ඇඳුම් අහක්කරනු ලැබ, ඔබේ වහන්ද උදුරනු ලැබූ බව දැනගන්න.

23කූෂ් වැසියාට තමාගේ හමවත් අඳුන් දිවියාට උගේ තිත්වත් වෙනස්කරන්ට පුළුවන්ද? පුළුවන් නම්, නපුර කරන්ට පුරුදුව සිටින ඔබ සැමටත් යහපත කරන්ට පුළුවන්වේ.

24ඒ නිසා කාන්තාරයේ සුළඟට ගසාගන යන ඉපනැලි මෙන් ඔවුන් විසුරුවා දමන්නෙමි.

25ඔබ මා මතක නැතිකොට බොරුවක් කෙරෙහි විශ්වාසකළ නිසා මේක ඔබේ කොටසත් මා විසින් ඔබට මැනදෙන පංගුවත්යයි ස්වාමීන්වහන්සේ කියනසේක.

26එබැවින් මමත් ඔබේ ලජ්ජාව පෙනෙන පිණිස ඔබේ ඇඳුම ඔබේ මුහුණ පිට දැමුවෙමි.

27ඔබේ මිථ්‍යාචාරකම්ද ඔබේ හේෂාරවය කිරීම්ද පිටත හෙල් පිට ඔබ කරන ඔබේ දූෂ්‍ය වේශ්‍යාකම්ද යන ඔබේ පිළිකුල්කම් මම දුටිමි. යෙරුසලම, ඔබට දුක්වේ! ඔබ පිරිසිදුවෙන්ට අකමැතිය; තව කොපමණ කලකින් එය සිදුවන්නේද?

← Chapter 12 Jump to: Chapter 14 →