bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Deuteronomy 1
Deuteronomy 1
Sukuma 2019
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 2 →
1
Ī mihayo īyī akabawīla ū Musa pye a Baisilaeli aho balī ng'witogolo, kū kīya ya mongo gwa Yolodani; hū kūhaya mu mbūga ya Alaba īyo yalī yilolile na sī ya Sufu, yalī īpīndiwe na sī ja Palani, Tofeli, Labani, Hezeloti, na Dizahabu.
2
Ū kūfuma ī Holebu ū kūja ī Kadeeshi-balinea lūlīho lūgendo lwa shikū ikūmi na lūmò, ūlū ūbītīla nzīla ya kū lūgūlū lwa Seili.
3
Mu ng'waka gwa makūmi anè lūshikū lwa kwandya lwa ng'weji gwa ikūmi na gūmò, ū Musa akabawīla a Baisilaeli pyī ī mihayo īyo SEEBA walī wanagīīla kūlwa nguno yabo.
4
Ū ng'wikanza lyenīlo walī wamala kūmpyena ntemi Sihoni wa Baamoli, ūyo wikalaga Heshiboni; na Ogi ntemi wa Bashani, ūyo wikalaga Ashitaloti; ū ng'wene ūmpyenela ipandī lya Edilei.
5
Ū Musa aho alībahelela ī mihayo ya shilagīlo shenīshi, baalī bataalī kū nkīlo gwa kīya ya mongo gwa Yolodani. Ūbawīla alīhaya;
6
“Ū SEEBA Mulungu wise akatūwīla aho tūlī Holebu gīkī, ‘Lyang'wigelile lūūlū ī likanza īlo ng'wikalile a ha lūgūlū lwenūūlū.
7
Sambūlagi ī ng'hambī ng'wīnge ho, muje kū sī ya magūlya ya Baamoli; muje mukūsambaalaga hose pye ū mu sī ja banhū abo balī hihī hihī ū ng'witogolo lya Alaba, ī sī ja malūgūlū, nī jijo jilī hihī hihī nū lūgūlū, nī litogolo lya Negevu, nī ja kūjīlīīla kū mbalama ya nyanza, kū sī ya Bakanani, na Lebanoni, kūjīlīīla kū mongo ntaale, ū gwa Flaati.
8
Managi gīkī ī sī yenīyī ying'we, nang'winhile bing'we. Na lūūlū shikīīlagi mo, ng'wīdime ī sī īyo SEEBA wabisagīja babyaji bing'we, ba Abulahamu, Isaka na Yakobo, na būbyīlye wabo ūbo būliza hanuma yabo.’”
9
Ū ng'wikanza lyenīlo nakamuwīla, “Mulī bingī no mukūnilemeela ū kūmusuga nene iyene dūhū.
10
Nguno ū SEEBA Mulungu wing'we wang'ongegije no, kūshisha ī haha mulī bingī gītī sonda ja ng'wigūlū.
11
Nīyo ū SEEBA Mulungu wa babyaji bing'we ni ang'ongejage mukwīle ng'hangala mashihūmbī na mashihūmbī, hama amufuuhe gīt'ūmo kwisagīja kwakwe kūlī!
12
Alīyo ū nene iyene dūhū gīkī, nakūdūla kinehe ū kwiyūmīlīja nabo ū būdito wa makoye ging'we, nī yombo ying'we?
13
Na lūūlū solagi kūfuma ū mu ng'anda jing'we banhū ba masala na bitegeleja, abo bigelelilwe kūkūjiwa; nabatūūle kūbiza bataale bing'we.”
14
Ning'we mukanishokeja mulīhaya, “Ū mhayo ūyo ūlītūwīla gwenūyo gūlī gwawiza.”
15
Na lūūlū ū mu ng'anda jing'we nūbasolanhya abo baalī ba masala na bitegeleja, abo baalī bigelelilwe kūkūjiwa, būbiza batongeeji. A benabo hū nūbatūūla kūbiza bataale bing'we, būbiza batongeeji ba mabità ga banhū shihūmbī shihūmbī, na banhū igana igana, na makūmi atano tano, na kaya ikūmi ikūmi. Hū būbiza benabo a bataale ba ng'anda jing'we.
16
Ī likanza lyenīlo nūbawīla a balamuji bing'we, “Ng'wīdegeleka ī mihayo ya baana ba ng'wing'we, ng'wabalamula mu būtūngīlīja pye a bose; nūūlū būbiza ū wilemeelwa būlī hagatī ya Baisilaeli na Baisilaeli, nūūlū ha gatī ya Baisilaeli na balobeji.
17
Yaya ū kūtūūla būsolanhya ū mu kalamulīle; ng'ūbadegeleka pye a banhū, bado na bataale. Yaya ū kūbasolanhya, hama yaya kūng'ogoha munhū nūūlū ūmò, nguno ū būlamuji būlī bo ng'wa Mulungu. Ūlū mhayo gūbiza ndito ū kūbing'we, nenhelagi nene nakūgūdegeleka.”
18
Nīyo ī likanza lyenīlo nakamuwīla pyī ī mihayo īyo īng'wigelelilwe kwīyīta.
19
Na lūūlū tūkalwandya ū lūgendo lwise gīt'ūmo SEEBA Mulungu wise walī watūlagīīlīla; tūbūūka kwīng'ū kū lūgūlū lwa Holebu, tūshimīza kūjīlīīla kū sī ya magūlya ga Baamoli. Tūkabītīla ū ng'witogolo ī ligalī īlo mukalībona ī lya kogohya, hū tūūkashika ī Kadeeshi-balinea.
20
Hūn'ū nene nūmuwīla, “Ī haha lūūlū ng'washika ū mu sī ya Baamoli ī ya magūlya, īyo SEEBA Mulungu wise alītwinha.
21
Managi gīkī, ū SEEBA Mulungu wing'we wang'winhile ī sī yenīyī, na lūūlū jagi mo mukīdime ībize ying'we gīt'ūmo SEEBA Mulungu wa bakūlūgenji bing'we wamuwīlīla kūfuma kale. Mutizogoha, yaya nūūlū kwiganīlīja.”
22
Alīyo pye a bose mukiza ng'ūniwīla, “Ī gete tūtūme ko banhū tame batonge bakīdate ī sī, batwenhele ī mhola ja nzīla īyo ītwigelelilwe kūbītīla, nī mizengo īyo tūlīkashikīla twīmane ūmo īlī.”
23
Ū mhayo gwenūyo gūkabiza gwawiza ū kūlī nene, na lūūlū nūsolanhya banhū ikūmi na babīlī ū mu bing'we, munhū ūmò kūfuma būlī lūganda.
24
Būja būūkashika ū kū sī ya magūlya, būkatulumenha na kwilago lya Eshikooli, būlībona ūmo lyalī.
25
Būsola na matwajo gamò na gamò ga kūfuma kwenūko, būtwenhela ī mhola ja kwenūko balīhaya, “Ī sī īyo alītwinha ū SEEBA Mulungu wise īlī yawiza no.”
26
Alīyo mukalema ū kūja, ng'ūshilema ī shilagīlo sha ng'wa SEEBA Mulungu wing'we.
27
Muyūduguma ū mu maheema ging'we mulīhaya, “Ī get'ū SEEBA gashi atatūtogilwe, watwīngije ī Misili ūtwenha mu makono ga Baamoli kwiza kūtūmala.
28
Tūje halī lūūlū ī haha, īkī a badūgū bise batūgwisha ng'holò gīko? Balītūwīla gīkī, ‘A ming'wana genayo galī na nguzu no, hangī malīhu no kūtūtinda a bise kūle kūle. Nī mizengo nayo mitaale no, īpīndīlījiwe ndugu ndīhu kūshisha kwilunde. Nīyo twagabonile ko na ming'wana ga shibyalīlwe sha ng'wa Anaki!’”
29
Ū nene nūmuwīla nūhaya, “Bing'we mutilalīlage gīko, yaya ū kūbogoha;
30
Ū SEEBA Mulungu wing'we ūyo alītonga kū būtongi wing'we hū ng'wene akūmulwīlīīla, gīt'ūmo akītīla dūhū ū mu sī ya Misili mulolile gīkī.
31
Nū kwitogolo nū kwene mukabona ūmo akamubūūkīj'ū SEEBA Mulungu wing'we, gīt'ūmo myaji akamūūkījaga ng'wana wakwe; hū ūmo akang'wītīla hose pye kūshisha ng'ūshika ī lipandī īlī.”
32
Alīyo nūūlū īkī nakahaya gīko, nahene mutansanije ū SEEBA Mulungu wing'we,
33
ūyo wamutongeelaga pye a makanza ū mu lūgendo lwing'we; ī būjikū watūmamīlaga būpe wa moto, ī līīmi ilunde. Wajaga akūmukoobelaga mapandī ga kūtūūla ng'hambī, na kūng'oolekeja ī nzīla īyo yalī īng'wigelelilwe kwībītīla.
34
Na lūūlū ū SEEBA aho wigwa īyo mukīhaya, akapelana no kūshisha wilahīla alīhaya gīkī,
35
“Atīho munhū nūūlū ūmò ū mu shibyalīlwe shabūbi īshi, ūyo akwībona ī sī yawiza īyo naabilahīlīla kūbinha bakūlūgenji bing'we;
36
ūlū atī Kelebu dūhū, ū ng'witūnja o ng'wa Yefune. Ū ng'wenūyo akwībona, nīyo ī sī īyo mhambala jakwe jīpandile nakūng'winha ū wei nī shibyalīlwe shakwe, nguno akūshimīzaga hamò na SEEBA mu ng'holò īmò.”
37
Nīyo ū SEEBA akanipelanīla nū nene kūlwa nguno ying'we; ūniwīla, “Nū bebe ūtingīla ū mu sī yenīyo;
38
alīyo ū ngunanhi wako ū Yoshwa ng'witūnja o ng'wa Nuni hū ng'wene ūyo akūshika mo. Ntimbyage ng'holò, nguno hū ng'wene akūbatongeela a Baisilaeli bashikīīle mo.
39
Na a bado bado abo ng'wabahayaga gīkī bakūsolwa nding'wa, a bana bing'we abo bataalī kūmana kwīlekanya ī yawiza nī yabūbi, a benabo hū bene abo bakwingīla ū mu sī yenīyo. Nakūbinha bīdime ībize yabo.
40
Alīyo a bing'we, ī haha galūkagi mudime nzīla ya kūja kwitogolo lya kūjīlīīla kū nyanza yaza.”
41
Gwike a bing'we mukashosha mulīhaya, “Twang'hūbag'ū SEEBA. Tūkūja tūkalwe ū būlūgū gīt'ūmo SEEBA Mulungu wise watūlagīīlīla.” Na ng'hana būlī ūmò wing'we ūbūūcha shilanga shakwe, mukwiganikaga gīkī gūlī mhayo nogu ū kūlinha ko ū kū sī ya magūlya.
42
Alīyo ū SEEBA akaniwīla, “Bawīlage ‘Yaya ū kūja ko kūlwa būlūgū, nguno ū nene natūbiza hamò ning'we, bakūmupyena a banishi bing'we.’”
43
Nakamuwīla ī yenīyī alīyo ng'ūlema ū kūniigwa; ng'ūshilema ī shilagīlo sha ng'wa SEEBA, ng'ūgagabala kūlinha ū kū sī ya magūlya yenīyo kūnū mukwigīmba gīmbaga.
44
A Baamoli abo bikalaga ū mu sī ya magūlya yenīyo būmusūng'wana, būmupeeja gītī mulīpeejiwa nzūkī; būja bakūmubūlagaga nzīla ngima kūfuma sī ya Seili kūshisha Holima.
45
Ng'ūshoka ū kūlī SEEBA ng'wiza ng'wandya kūnīlīīla, alīyo nang'hwe wichibīja a matū gakwe, atamudegelekile ū kūlīla kwing'we.
46
Na lūūlū ng'wikala Kadeeshi shikū ningī, pyī ī shikū ījo mukikala ipandī lyenīlo.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34