bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Deuteronomy 31
Deuteronomy 31
Sukuma 2019
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 32 →
1
Hūna ū Musa ūfuma hanze, ūbawīla a Baisilaeli a bose ī mihayo īyī.
2
Ūhaya, “Ī haha nalī na myaka igana na makūmi abīlī, natūdūla ū kongeja kūmutongeela. Nguno nīyo nū SEEBA waniwīlile gīkī, ‘Ū bebe yaya ū kūgūkīla ū mongo gwa Yolodani.’
3
Ū SEEBA Mulungu wako akūkīla hamò nang'ho, atonge ko; aje ū kū būtongi wako akūgakenaagūlaga a mahanga genaya. Hūna ū bebe ūkwīsola ī sī yabo; nū Yoshwa akūkīla hamò nang'ho kūkūtongeela gīt'ūmo SEEBA wahayīlile.
4
Nīyo a banhū benabo, ū SEEBA akūbīītīla gīt'ūmo akabīītīla ba Sihoni na Ogi, a batemi ba Baamoli, abo akabakenaagūla hamò nī sī jabo.
5
Ū SEEBA akūbatūūla mu makono ging'we, na lūūlū shiigelile mubīītīle gīt'ūmo naamulagīīlīlile.
6
Ipandagi chanda mubize bashisha ng'holò, yaya ū kūbogoha a benabo, nūūlū batizūmudetemya, nguno ū SEEBA Mulungu wing'we alīja hamò ning'we, atūmulekanīja nūūlū atūng'wība yaya.”
7
Hūna ū Musa ūng'witana ū Yoshwa ūng'wīla mu būtongi wa Baisilaeli bose, “Ipandage chanda, hangī ūbize nshisha ng'holò, nguno shikwigeleelilwe ūje nabo a banhū benaba mushike ū mu sī īyo SEEBA wabilahīlīla bakūlūgenji babo kūbinha. Ūkūbagabanhya būlī bene bapandīke wingīji wabo.
8
Ū SEEBA alītonga ko wei ng'wenekīlī, na akūbiza hamò ning'we koi; atūmuleka nūūlū atūng'wība. Yaya ū kogoha, nū kūsusanya yaya.”
9
Hūna ū Musa ūshandīka ī shilagīlo īshi, ūbina bagabīji, a ba lūganda lwa Lawī, abo baalī babūūcha b'isandīko ly'ilagane lya ng'wa SEEBA; na a banamhala a bose a ba Baisilaeli ūbinha.
10
Hanuma ū Musa ūbalagīla alīhaya, “Būlī myaka mpungatī ūlū yūshika ha būkalīkījo, ū mu ng'waka gwa kūlekeja banhū būgasa wabo, ū ng'wikanza lya shigukulu sha maduku,
11
Ī likanza īlo Baisilaeli bose bakizaga kwiyoolecha kū būtongi bo ng'wa SEEBA Mulungu wako kwipandī īlo wei ng'wenekīlī alalīsole, ūkūshisoma ī shilagīlo shenīshi ūlī kū būtongi wabo badegelekile.
12
Ūkūbabilinga pye a banhū, bagosha, bakīma, na a banīgīnī, pyī nū ngeni ūyo akwikalaga hamò nang'ho ū mu mizengo yako; bize badegeleke, bilange kūnkūja ū SEEBA Mulungu wing'we, na kwīlondeela mu welwa ng'holò pyī ī mihayo ya shilagīlo shenīshi.
13
A baana babo abo batashimanile ī shilagīlo, shibigelile kūdegeleka, bilange ū kūng'ogoha ū SEEBA Mulungu wing'we, ū mu shikū jing'we jose ī ja kwikala ū mu sī īyo mulīkīla mongo gwa Yolodani kūja kwīsola.”
14
Hūna ū SEEBA ūng'wīla ū Musa, “Ī likanza lyako lya kūcha lyashikaga, na lūūlū ng'wīlage ū Yoshwa ize hamò nū bebe ū ng'wiheema lya kwibilingīla, nize nanagīle milīmo ya kwīta.” Na ng'hana ū Musa nū Yoshwa biza ū ng'wiheema lya kwibilingīla.
15
Ū SEEBA wiza a hiheema lya kwibilingīla, wiyoolecha mu nzīla ya ng'hīngī yilunde, lyīmīīla a ha nyango gwa kwingīlīla ū ng'wiheema.
16
Ū SEEBA ūng'wīla ū Musa, “Lyashikaga ī likanza lyako ū bebe ī lya kūja kwifuula na bataale bako, alīyo a banhū benaba bakwandya kwisosohaja na bamulungu bageni, ū mu sī īyo balīja kwikala. Ū nene bakūnīība, balīkenaagūle nī lilagane īlo naabeeja nabo.”
17
Alīyo ū lūshikū lwa kwīta mhayo gūlī gīko, bakūnisayīcha no nabalekanīje gete. Nakūbibisa bayagaale, nguno ū būshū wane batūbūbona. Mihayo mingī yabūbi na ya kūbakoya īkūbagwīla. Ū ng'wikanza lyenīlo bakwibūūja balīhaya, “Ī mihayo yabūbi yose yenīyī ītūūtūgwīlaga īkī ū SEEBA Mulungu wise atī hamò nise?
18
Alīyo ū nene nakwibisa gete ū ng'wikanza lyenīlo; batūbūbona ū būshū bone, kūlwa nguno ya būhūbi wabo bose ūbo balawīte mu nzīla ya kūbagalūkīla bamulungu bangī.
19
Alilūūlū, ī haha andīkaga līīlī lyīmbo lyako; ūbalange kūlyīmba a Baisilaeli, lībize būkaanīji wane kūbo kūlwa kūbakaanīla.
20
Nguno ūlū nūbashisha ū mu sī ya būhondo ī ya kūsūlūlūka būkī na mabeele, īyo naabisagīja bakūlūgenji babo mu kwilahīla, hūna būlya bigūta būgīna, bakūbagalūkīla bamulungu bangī bandye kūbalamya banidalahe ū nene, nī lilagane lyane balīkenaagūle.
21
Na lūūlū ī mihayo yabūbi nī ya kūbakoya ūlū yūbagwīla, ī lyīmbo lyenīlī līkūbiza būkaanīji ū kūbo; nguno lītīīwa ū mu shibyalīlwe shabo. Ū nene nīmanile īyo bakwīyideedeng'hanyaga nūūlū aho nataalī ū kūbashisha ū mu sī īyo nabisagīja mu kwilahīla.”
22
Na ng'hana ū lūshikū lwenūlo ū Musa ūlyandīka ī lyīmbo īlī, ūbalanga a Baisilaeli.
23
Ū SEEBA ūnkomeleja ū Yoshwa ū ng'witūnja o ng'wa Nuni alīng'wīla, “Handatīlaga na hangī ūbize nshisha ng'holò. Nguno ū bebe hū ūkūbashisha a Baisilaeli ū mu sī īyo nabisagīja mu kwilahīla, nū nene ng'wenekīlī nakūbiza hamò nang'ho.”
24
Ū Musa aho wamala kūyandīka mu shitabo ī mihayo ya shilagīlo shenīshi, kūfuma wandījo wayo kūshisha kū būkalīkījo wayo,
25
ūbalagīla a Balawī, abo babūūchaga isandīko ly'ilagane lya ng'wa SEEBA. Ūbawīla gīkī,
26
“Shisolagi ī shitabo īshi, ī sha shilagīlo, mushitūūle shiihele nī lisandīko ly'ilagane lya ng'wa SEEBA Mulungu wing'we, shiikale henaho kūlwa būkaanīji kūlī bebe.
27
Nguno nabūmanile ū būshitiigwa wako nū būdimu bo ntwe gwako ūmo būlī. Īkī ī haha mulī bashitiigwa gīkī alīyo hū nataalī hamò ning'we; al'ūlū nalaache, angū mmho mukūkīlanīja no a hene!
28
Na lūūlū, ī haha babilingangi pye a banamhala ba ng'anda jing'we na a bagunanhi babo, baneegeele aha nīhayī ī mihayo yenīyī badegelekile; nabakaanīle kū būtongi wigūlū na sī.
29
Nguno namanile hape gīkī, ūlū nūcha mukwisosohaja no mugalūke ng'wīleke ī nzīla īyo naamulagīlile. A bing'we mukūgwīlwa mayanga mataale ū kū shikū ja kū būtongi, nguno mukwīta ya malofu ū kū būtongi bo ng'wa SEEBA, mumpelanye kūlwa milīmo īyo mukūyūbeeja na makono ging'we.”
30
Hūna ū Musa wīhaya ī mihayo ya lyīmbo īlī kū būtongi wa kwibilinga kwa Baisilaeli a bose, kūfuma kū wandījo walyo kūshisha kū būkalīkījo walyo.
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 32 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34