Deuteronomy 13

Sukuma 2019

← Chapter 12 Jump to: Chapter 14 →

1Ūlū ng'hangi nūūlū munhū nooti wa shilooti wilonga, hūna wandya kwigīmba gīmba akoolechaga shimanīkījo na mihayo ya kūkumya, na ya kūkamaaja;

2hama ng'hana ū mhayo gwa kūkumya nūūlū ū gwa kūkamaaja ūyo wagūhayaga gūshikīīla, hanuma ya henaho ūkūwīla, “Bebe tūbalondeelage bamulungu bangī”, (bamulungu abo ūtabamanile); na, “Twandyage kūbatūmamīla benabo.”

3Yaya ū kwīdegeleka ī mihayo ya ng'hangi ng'wenūyo, nūūlū ū nooti wa shilooti ng'wenūyo. Nguno ū SEEBA Mulungu wing'we alīmugema, amulole ūlū muntogilwe na ng'holò ying'we yose na būpanga wing'we bose.

4A bing'we īng'wigeleelile kūnondeela SEEBA Mulungu wing'we, na kūntūmamīla we wike. Ī shilagīlo shakwe shidimagi, hama nīyo mung'wigwe we. Ntūmamīlagi we wike, na mudimane nang'hwe mu welwa ng'holò.

5Ū ng'hangi ng'wenūyo nūūlū ū nooti wa shilooti, shiigelile abūlagwe. Nguno walomeelaga mihayo ya kūngomela ū SEEBA Mulungu wing'we, ūyo wang'wīnja mu sī ya Misili, ūmukomoola kūfuma mu sī ya būsese. Ū munhū ng'wenūyo alī na ng'hūmbū ja kūmugalūcha ng'wīleke ī nzīla īyo SEEBA Mulungu wing'we wamulagīla kwīlondeela. Shiigelile muwīnje gete ū būsoso ū mu bing'we.

6Ūlū ndūgūyo nūūlū ng'witūnja wako, nūūlū nshīke wako; pye nūūlū ni akabiza ū nke wako ūyo ūntogilwe gete, nūūlū nwani ng'wiyo ūyo mutalekanaga, hūna ūkooba kūkūhūmbūūla alīkūwīla, “Tūjage kūūnū tūkabalamye bamulungu bangī,” (bamulungu abo ūtabamanile bebe, nūūlū bakūlūgenji bako;

7bamulungu ba banhū abo mukwikalaga hamò nabo, bamò babo bazenganwa biching'wi, bangī ba kūle, basambaalile hose ū mu sī; kwandīja ipandī īlī kūshisha ipandī līngī,)

8ū munhū ng'wenūyo ūtizūneka akūhūmbūūle, nīyo yaya nū kūndegeleka; hama ūtizūnsaatwa nūūlū hado, yaya ū kūneka alī mpanga, nūūlū ūtizūmisa gīkī atizinhwa nsango.

9Mūlagage gete ū ng'wenūyo; nīyo ū nkono gwako hū gūbize gwa kwandya ū mu kūmūlaga, hūna na a banhū a bangī batūūle ho a makono gabo.

10Mūlagage bo kūmponda mawe, nguno walī na ng'hūmbū ja kūkūgalūcha ūneke ū SEEBA Mulungu wako, ūyo wakwīnja mu sī ya Misili, ūkūfunya mu sī ya būsese.

11Ū mu gīko a Baisilaeli a bose bakwigwa bogohe; na lūūlū atigela ūngī hangī ū mu bing'we wa kwīta mhayo gwabūbi gīko.

12Ū mu mizengo īyo SEEBA Mulungu wako alīkwinha kwikala mo, ūlū wigwa īlīhayiwa mu gūmò gwaho gīkī,

13bigelile mo banhū ba nhūngwa ja malofu ū mu bing'we, bakūjaga būbahūmbūūla a banhū ba mu nzengo gwenūyo būbawīla, “Tūjagi tūkabalamye bamulungu bangī,” (bamulungu abo mutabamanile);

14a henaho īkūkwigeleela kūkooba mu būkomeezu wa kūbūūgīlīja chiza, na kūgīsīlīja mu welwa ng'holò. Ūlū gūbiza gūlī gwa ng'hana gūtī gwa būlomolomo, ū gwa gīkī mhayo gwa malofu gīko gwītilwe ū mu sī ya ng'wing'we,

15a banhū ba mu nzengo gwenūyo ūkūbayagaja na būūgī bo līlūshū pye a bose. Ūkūgūkenaagūla pye gete ū nzengo gwenūyo, bashile a banhū nī mitugo ī jose.

16Ī shose īsho ūlashipandīke mo, shidimage ūshitūūge ha gatī gatī ya gwalugwa ya mu nzengo, hūna ūgūpembe moto pye ū nzengo nī shikolo shamo ī shose, shibize shakwinha sha kūpemva kūlī SEEBA Mulungu wako. Ū nzengo gwenūyo gūkwikala buyīkī gīko ilalī, atigela wa kūgūzenga hangī.

17Shitizūbonwa mu nkono gwako shikolo shose shose sha ng'wenūmo, īsho shizumilwe. Ūlū ng'wīta gīko ū SEEBA akūgalūka būng'wīngīle ū būpelanu wakwe, amusaatwe na kūmuchīla shigongo. Akūng'ongeja ū wingī wing'we mukwīle mubize gīt'ūmo wabisagīja mu kūbilahīlīla a bakūlūgenji bing'we.

18A bing'we ng'wigwa ū SEEBA Mulungu wing'we, mushidime nī shilagīlo shakwe ī shose īsho nalīng'winha lelo, ng'wīte nī yīyo ītūngīlīgije ū mu miso gakwe.

← Chapter 12 Jump to: Chapter 14 →