Jeremiah 22

Sukuma 2019

← Chapter 21 Jump to: Chapter 23 →

1Ū SEEBA alīhaya, “Jaga ū kwikūlū lya ntemi wa Yuda, ūkagūhaye ū mhayo ūyū:

2Ee, ntemi wa Yuda, gwigwage ū mhayo go ng'wa SEEBA, bebe ūyo ūlī h'isumbī lya būtemi lya ng'wa Daūdi; ū bebe na a batūmami bako, pye na a banhū bako abo bakabītaga ū mu mibità yenīyī.

3Ū SEEBA alīhaya gīkī, ‘Ng'ūlamula mu wīma na būtūngīlīja. Ū wa kūnyeekejiwa ngunagi apīle ū kūlī ng'wiboneeji wakwe. Yaya ū kūng'wītīla yabūbi nūūlū kūng'wiboneela ū nobeji nūūlū ūyo atī na ise, nūūlū nchīlwa, hama yaya kwita mininga gatī na shilingo ū ng'wipandī lyenīlī.

4Nguno ūlū ng'ūshidima ī shilagīlo shane shenīshi, a batemi abo balī h'isumbī lya būtemi lya ng'wa Daūdi, bakwingīla kūbītīla a ha mibità y'ikūlū lyenīlī, balī mu magogoteni ga būlūgū, na badamhīlile falasa, balī hamò na a bataale ba būsugi wabo, na a banhū babo.

5Alīyo ū SEEBA alīhaya gīkī, ūlū mutūyiigwa ī mihayo yenīyī, nalīlahīla mu lina lyane ng'wenekīlī, ī numba yenīyī īkūbiza nsaka.’”

6Nguno ī mihayo y'ikūlū lya ntemi wa Yuda, ū SEEBA alīyīhaya gīkī, nūūlū īkī ūbange gītī Gileadi ū kūlī nene, gītī wiza bo Lebanoni; alīyo nakūkūkenaagūla ng'hana, nakūkwīta ūbize gītī itogolo lītī na shose shose, gītī mizengo ītī na bikaji.

7Nakūkūbilingīla bayagaja, būlī ng'wene ize na shilanga shakwe; hūna ī mikoola yako ī misoga bakwībbutagūla bīponye mu moto.

8“Banhū ba mahanga na mahanga ūlū balībīta bbihī nū nzengo gwenūyū bakūyibūūja, ‘Nībūlī ū SEEBA wagwītīlile mhayo gūlī gīko ū nzengo gwenūyū?’

9Ī lishosho līkūbiza gīkī, ‘Īlī kūlwa nguno ya kūlīleka ī lilagane lya ng'wa SEEBA Mulungu wabo, būyūbalamya bamulungu bangī na kūbatūmamīla.’”

10Ū ntemi ūyo waacha yaya ū kūnīla, nūūlū kūpīnīhala īkī wang'wīnga. Alīyo nīlagi mu kūsaatwa kūtaale ūyo alītwalwa mu būding'wa, nguno atīko kūshoka; na atībona hangī ī sī ya ng'wawe.

11Nguno ū mu mihayo ya ng'wa Shalumu ng'witūnja o ng'wa Yosia, ū ntemi wa Yuda, ūyo akatema hanuma ya ng'wa ise Yosia, alīyo ī haha atīho a h'ipandī lyenīlī, ū SEEBA alīhaya, “Ū ng'wenūyo atūshoka hangī ū kūnū.

12Akūchīla mu būding'wa kūko bantwala kwenūko, atī wa kūlībona hangī ī lipandī lyenīlī.”

13Alī mu kwihīga ūyo akūzengaga numba yakwe mu nzīla jitī ja būtūngīlīja, ūyo akūsonganījaga chumba kwigūlya mu nzīla ja wiboneji, na kūbatūmamya dalali a bazenganwa biye; kūnū akūlemaga ū kūbalīpa ī mheela ja būtūmami wabo.

14Akwiwīlaga ng'wenekīlī gīkī, “Nakwizengela numba ngalī; nītūūlīle chumba shigalī ū kwigūlya.” Na ng'hana akwīzenga wītūūlīle na madilisha magalī, nī ndugu jayo ūjitūūlīla mbawa ja mikoola kūlwa būlenji, hūna wīchaaja na langi yaaza kūlwa būbeeleji.

15“Ū gwa kūkwīja mitī ya mikoola, hū gūkūkwīta ūbize ntemi? Ū so walī atapandīkaga ī shilīwa nī sha kūng'wa, kūnū akwītaga mu wīma na būtūngīlīja? H'ī nguno yene pyī ī mihayo yakwe yajaga chiza.

16A bahabī na a bagayiwa wabagunījaga, h'ī chene ī mihayo yakwe yajaga chiza. Ī gīko h'ītī kūnimana nene?” Alīhaya SEEBA.

17Alīyo a miso gako nī ng'holò yako shikalalīlile kū sabo ja būnyeecha na kwita mininga gatī na shilingo na wiboneeji, na kūhongwa.

18Alilūūlū, ū mu mihayo ya ng'wa Yehoyakimu ng'witūnja o ng'wa Yosia, ū ntemi wa Yuda, ū SEEBA alīhaya gīkī, “Ū ng'wenūyo batūnīla bakūhayaga, ‘Aī twaluha ng'wanong'wise!’ Nūūlū gīkī, ‘Aī twaluha ilūmbū lyane!’ Batūnīla bakūhayaga, ‘Aī baba ntaale wane!’ Nūūlū gīkī, ‘Aī baba nkūjiwa!’

19Akūjīkwa kajīkīlwe ka nyayobe, bo kūfunyiwa ī hanze ya mibità ya Yelusalemu akūgwesanjiagwa, ūūkaponyiwa kwenūko.”

20Jaga Lebanoni ūkalīle ng'hūngū, Ī lilaka lyako liigwiwe mu Bashani; nī Abalimu jaga ūkatandagūke; nguno pye a bitogwa bako baashikīlile shiki shiki.

21Ū nene naakūhūgūla no aho ūtaalī ūkwibonaga gīkī ūlī mhola, nang'ho washosha dūhū, “Yaya ū nene ū kūdegeleka!” H'ūmo ūlī ū bebe kwīngīīla ha walūki wako; ūlemile ū kūliigwa ī lilaka lyane.

22Ū nyaga gūkūbaheheeja pye a badīīmi bako bashile, a bitogwa bako bakūsolwa batwalwe mu būding'wa. Hūna ūkūgooka na kūding'wa minala kūlwa nguno ya būbi wako ū bose.

23Bebe ng'wikaji wa Lebanoni, ūyo chanjo shako ūzengellile mu mitī ya mikoola; līkūkūpandīka dūhū ī likanza lya kūlung'wa būsūngū; ūkūlīla no gītī nkīma alī ng'wikanza lya kūbyala!

24Ū SEEBA alīhaya, “Ūmo nene nalī mpanga, ū bebe Konia, ng'witūnja o ng'wa Yehoyakimu, ntemi wa Yuda, nūūlū ni wabiza pete ya lūmeng'ho kū lwala lwa nkono gwane gwa būlyo, nahene ni nakūchūūla nūkwīnja ho.

25Nakūkūtūūla mu makono ga banhū abo ūbogohile, abo bakūbūkoobaga ū būpanga wako; mu makono ga ng'wa Nebukadineza, ntemi wa Babuloni na ga Bakalidayo.

26Ū bebe nakūkūluuta kūle, pyī nū noko ūyo wakūbyala, mukūja kū sī yīngī ūko mutabyalīlilwe; bose mukūjūchīla kwenūko.

27Mutūdūla ū kūshoka hangī ū kū sī īyo mulī na ng'hūmbū ja kwīshokela.”

28Ū munhū ng'wenūyū ū Konia, adalahilwe no gītī nungū ībelekile, abange gītī līlūjo īlo atīho munhū wa kūlikūmvwa? Nibūlī ū wei na a baana bakwe aponyiwe kū sī īyo batīmanile?

29Ee sī! Bebe sī! Sī bebe! Gwigwage ū mhayo go ng'wa SEEBA.

30Ū SEEBA alīhaya gīkī, “Ū munhū ng'wenūyū ng'wisaabage gīkī atī na ng'wana, munhū ūyo atīko kūbbyedecha shose shose ū mu shikū jose ja būlamu wakwe. Nguno ū mu būbyīle wakwe atilonga wa kwīlūkīlwa nūūlū ūmò, atīho wa kwigasha a h'isumbī lya būtemi lya ng'wa Daūdi; nūūlū wa kūsuga hangī ū mu sī ya Yuda.”

← Chapter 21 Jump to: Chapter 23 →