Jeremiah 35

Sukuma 2019

← Chapter 34 Jump to: Chapter 36 →

1Ū mhayo ūyū gūkiza kūlī Yelemia kūfuma kūlī SEEBA mu shikū ja būsugi bong'wa Yehoyakimu, ng'witūnja o ng'wa Yosia ū ntemi wa sī ya Yuda; gūng'wīla:

2“Jaga ū kū banhū ba numba ya ng'wa Lekabu, ūkabawīle bize ū mu numba ya ng'wa SEEBA, mu chumba shimò shaho, hūna ūbatengele walwa bo kūng'wa.”

3Nūja kūng'wenha Yazania ng'wana Yelemia ng'witūnja o ng'wa Habasinia, na baana ba ng'wawe; na a bitūnja bakwe a bose pye, nīyo pyī ī numba ya Balekabu.

4Nūbenha ū mu numba ya ng'wa SEEBA, mu chumba sha bitūnja ba ng'wana Hanaani, ng'wana Igidalia, munhū o ng'wa Mulungu. Ī chumba shenīsho shalī hihī na chumba sha bataale, na shalī higūlya ya chumba sha ng'wa Maaseya, ng'witūnja o ng'wa Shalumu, nang'hani wa nyango.

5Hūna nokaja divai mu mabakuli na shikombe, nūbenhela a banhū ba numba ya ng'wa Lekabu benabo; niza nūbinha nalībawīla, “Yīyī divai mung'we.”

6Nabo būnishokeja balīhaya, “A bise tūtang'waga ī divai, nguno ū sīswe nkūlū ū Yonadabu, ng'wana Lekabu watwinha shilagīlo ūtūwīla, ‘A bing'we nū būbyīle wing'we mutī ba kūng'wa divai ilalī.

7Yaya nūūlū kūzenga numba, nūūlū kūlīma gīkī mubībe mbīyū; nī migūnda ya mizabibu yaya ū kūbiza nayo. Yaya gete a bing'we ū kūbiza nasho ī shenīshi; nī numba jing'we jikūbiza ja maheema pyī ī shikū. Ū mu gīko hū mukūlama shikū ningī ū mu sī ūmo mukwikalaga mu mbika ya kūsaama saama ī haha.’

8Nise twīdima pyī īyo watūlagīla ū sīswe nkūlū Yonadabu, ng'wana Lekabu. Tūtaalī kūgema kūng'wa divai; a bise benekīlī na a bake bise, na a bitūnja bise pye na a bshīke bise.

9Tūtaalī nūūlū kūzenga numba ja kwikala mo, nūūlū kūbiza na migūnda ya mizabibū, nūūlū malaale; nūūlū ni shilīwa sha kūlīma tūtaalī kūbiza nasho.

10A bise tūlī bikaji ba mu mahema kūlwa nguno ya kūshikīlīja pyī īyo watūlagīla ū sīswe nkūlū Yonadabu.

11Alīyo ū Nebukadineza, ū ntemi wa Babuloni aho wiza kwīyūūbūkīla ī sī yenīyī, tūkiwīla; ‘Bing'we tūjagi Yelusalemu tūgapeele a mabità ga Bakalidayo, na a ga Baalamu.’ Hūna tūbiza bazengi ba mu Yelusalemu.”

12Hanuma ya yenīyo ū mhayo go ng'wa SEEBA gwiza ū kūlī Yelemia; gūhaya,

13“Ū SEEBA wa mabità, ū Mulungu wa Isilaeli alīhaya, ‘Jaga ūkabawīle a banhū ba Yuda na a bazengi ba Yelusalemu gīkī, A bing'we, ni kinehe mutadūgije ū kwilangīla henaho mubize bigwi ū kū mihayo yane?’ Alīhaya SEEBA.

14Ū Yonadabu ng'witūnja o ng'wa Lekabu wabinha shilagīlo a baana bakwe, gīkī batizūng'wa divai; na ng'hana ī shilagīlo shenīsho shilang'hanilwe. Kūshisha lelo batang'waga divai nguno ya kūdima shilagīlo sha ng'wa saabo nkūlū. Alīyo ū nene gwa ū kūmukomeleja, ning'we biya ū kūniigwa.

15Naamutūmīla no pye a batūmami bane a bahangi; bikalaga būmuwīla gwa gwa gwa, ‘Bing'we galūkagi, būlī ūmò wing'we īnge ū mu nzīla jing'we ī jabūbi, mugalūche nī nhūngwa jing'we; lekagi ū kwikala ng'ūlondeela bamulungu bangī na kūbalamya. Ū mu gīko hū mukwikala ū mu sī īyo nang'winha bing'we na bakūlūgenji bing'we.’ Alīyo ng'walī mulemile ū kūnidegeleka nūūlū ū kūniigwa.

16A baana ba ng'wa Yonadabu ng'witūnja o ng'wa Lekabu, bashidimile ī shilagīlo īsho wabinha nkūlūgenji wabo; alīyo a banhū aba balemile ū kūniigwa ū nene.’

17Alilūūlū, ū SEEBA wa mabità, ū Mulungu wa Isilaeli, nalīhaya gīkī, ‘Degelekai! A banhū ba Yuda na a bazengi ba mu Yelusalemu pye a bose nalī hihī kūbenhela pye a mayanga ayo naagahaya kūlwa nguno yabo. Nguno naabawīla no, alīyo balemile ū kūniigwa; naabitana no, alīyo ū kūniidīka biya.’”

18Hūna ū Yelemia ūbawīla a banhū ba numba ya ng'wa Lekabu, “Ū SEEBA wa mabità, ū Mulungu wa Isilaeli, alīhaya gīkī, ‘A bing'we mushiigwile ī shilagīlo sha nkūlūgenji wing'we Yonadabu, na mukashimīzīlaga mu katongeelele kakwe kose, nī yīyo amulagīlile mukīyītaga pye.’

19Alilūūlū, ū SEEBA wa mabità, ū Mulungu wa Isilaeli alīhaya gīkī, ‘Ū Yonadabu ng'witūnja o ng'wa Lekabu atalagayiwa munhū wa kūnitūmamīla.’”

← Chapter 34 Jump to: Chapter 36 →