Jeremiah 28

Sukuma 2019

← Chapter 27 Jump to: Chapter 29 →

1Mu ng'waka gwa kanè ng'weji gwa katanò ū ng'waka gwenūyo, Sedekia ntemi wa Yuda ataalī mu shikū ja wandījo wa būsugi bokwe, ng'hangi Hanania ng'witūnja o ng'wa Azuli, munhū wa Gibeoni, akaniwīla mhayo tūlī mu numba ya ng'wa SEEBA; na bagabīji baalīho, na a banhū a bangī pye a bose; ūhaya:

2“Ū SEEBA wa mabità, ū Mulungu u wa Isilaeli, alīhaya gīkī, ‘Ī lijoki lya ntemi wa Babuloni nakūlībīnzagūla.

3Aho myaka ibīlī ītaalī kūshila, nakūbiza naashishokije hangī ng'wipandī lyenīlī ī shiseme sha mu numba ya ng'wa SEEBA, īsho Nebūkadineza ntemi wa Babiloni akashīnja a henaha ūshitwala Babuloni.

4Nū Yekoniya, ū ng'witūnja o ng'wa Yehoyakimu ū ntemi wa Yuda nakūnshosha a henaha; pye na a banhū ba Yuda abo basaamījiwa Babuloni,’ alīhaya SEEBA, ‘Nguno nakūlībīnzagūla ī lijoki lya ntemi wa Babuloni.’”

5Ū ng'hangi Yelemia ūnshokeja ū ng'hangi Hanania, mu būtongi wa bagabīji na a banhū a bangī abo baalī bīmīīla ū mu numba ya ng'wa SEEBA;

6ūng'wīla, Alichene! Ū SEEBA ni ītage chene! Ū SEEBA ni ayīshikīlīje ī mihayo yako īyo wīhanga yenīyī, ī shiseme sha mu numba ya ng'wa SEEBA ashishoshe aha kūfuma ī Babuloni, pye na a banhū abo baasaamījiwe kwenūko.

7Gwike degelekaga gūūyū mhayo nakūwīle ūgwigwe na a banhū a bangī pye a bose bagwigwe.

8Kūfuma kale a bahangi abo baatūtonga a bise, ū nene nū bebe, baajihangīlaga ī sī na a mabūtemi a mataale mihayo ya būlūgū, mayanga na mahūūya.

9Alīyo ū ng'hangi wa kūhanga mihayo ya mhola, ū ng'wene akamanīkaga gīkī atūmilwe na SEEBA ūlū yūshikīīla ī mihayo īyo alīyīhanga.”

10Hūna ū ng'hangi Hanania ūng'wīngīja ū ng'hangi Yelemia ī lijoki īlo walī itungīīlile mu nhingo yakwe; ūlībīnzagūla.

11Hanuma ūhaya mu būtongi wa banhū bose, “Ū SEEBA alīhaya gīkī, ‘Ī lijoki lya ng'wa Nebukadineza, ū ntemi wa Babuloni nakūlyīta gīkī, aho myaka ibīlī ītaalī kūshila, nakūbiza naalībīnzagūlile; lyīnge ū mu nhingo ja mahanga.’” Ī likanza lyenīlo ū Yelemia wīnga ho a henaho.

12Ū ng'hangi Hanania aho wang'wīngīja ū ng'hangi Yelemia ī lijoki ū mu nhingo yakwe, ūlībīnzagūla. Lītabītile ikanza ilīhu ū mhayo go ng'wa SEEBA gwiza ū kūlī Yelemia;

13gūhaya, “Jaga ūkang'wīle ū Hanania, ‘Ū SEEBA alīhaya gīkī, Ū bebe wabīnzagūlaga ijoki lya mantī, alīyo a ha ng'wanya gwalyo mukūbeegejiwa lya chūma.

14Ū SEEBA wa mabità, ū Mulungu wa Isilaeli alīhaya gīkī, Pye a mahanga genaya nakūgatunga ijoki lya chūma mu nhingo; nagīte gantūmamīle Nebukadineza, ū ntemi wa Babuloni; na ng'hana gakūntūmamīla. Nīyo nakūng'wīta kūbiza ntaale nū kū ndimu pyī ī jose.’”

15A henaho ū ng'hangi Yelemia ūng'wīla ū ng'hangi Hanania gīkī, “Bebe Hanania, alidegelekaga! Ū SEEBA atakūtūmile, alīyo ī haha walīhūmbūūlaga pyī ī lihanga mu nzīla ja kūsanya mihayo ya būlomolomo.

16Alilūūlū, ū SEEBA alīhaya gīkī, ‘Nalī hihī kūkwīnja ū mu sī ū bebe; ūkūcha ī mokoono yenīyī, kūlwa nguno walomeelaga mihayo ya kūngomele SEEBA.’”

17Na ng'hana ū ng'hangi Hanania ūcha ū ng'waka gwenūyo dūhū, mu ng'weji gwa mpungatī.

← Chapter 27 Jump to: Chapter 29 →