Jeremiah 33

Sukuma 2019

← Chapter 32 Jump to: Chapter 34 →

1Ū Yelemia aho ataalī alugalīlilwe mu jeela ya ng'wibīndo lya balang'hani, ū mhayo go ng'wa SEEBA gūkang'wizīīla lūkangala lo kabīlī; gūlīhaya:

2“Ū SEEBA ū nseemi wa sī, ūyo wībeeja hūna wīyīta yīmīīle īdaame, ī lina lyakwe ng'wene SEEBA; alilūūlū, ū SEEBA ng'wenūyo alīhaya gīkī,

3‘Nitanage nene nakūkwidīka, hama nakūkūlanja mihayo mitaale īkīlile witegelegea, īyo ūtīmanile ū bebe.’

4Nguno ū SEEBA, ū Mulungu wa Isilaeli alījihaya ī numba ja mu nzengo gwenūyū, nī numba j'ikūlū lya mu Yuda, ījo jikūkambagūlagwa gīkī gabeejiwe mahangīgījo ga būdumīlwa kūlwa būlūgū,

5ū ng'wikanza lya kwilwisha na Bakalidayo; alīhaya gīkī, ‘Jikookala mibimba ya banhū abo nakūbabūlaga kūlwa būpelanu wane. Nakwibisa, ū nzengo gwenūyū gūtizūbūbona ū būshū bone, kūlwa nguno ya būbi waago.’

6“Alīyo nahene nakūgwenhela dūhū ī mhola na būpīji; a banhū bane nakūbapīja, nabinhe mhola na būlembeezu būtaale.

7A banhū ba Yuda na Isilaeli nakūbashosha ū kūfuma mu būding'wa wabo; hama ī sī jabo nakūjizenga hangī jibize gīt'ūmo jalī ī kwandya.

8Nakūbeeja pyī ī shibi shabo īsho baanīītīla, na nakūbalekeja pyī ī shibi shabo īsho bashīta kūlwa kūnigomela.

9Hūna ū nzengo gwenūyū gūkwenha lūkumo lwawiza ū kūlī nene, hamò na būyegi, na kūkumīlījiwa, n'ikūjo hose pyī ū mu mahanga ga mu sī ayo gakwīyigwa pyī ī yose ī yawiza, īyo nakūgwītīla. A mahanga gakogoha na kūdetema kūlwa wingī bo na mhola, īsho nakūgwinha ū nzengo gwenūyū.”

10Ū SEEBA alīhaya, “Ī lipandī lyenīlī mukūlīhayaga gīkī, ‘Ī lyenīlī itogolo dūhū lītī na shose shose; ndūhū mo banhū, nūūlū ndimu jitīmo.’ Alīyo ū mu mizengo ya Yuda nū mu mapanda ga mu Yelusalemu ayo gapeelwa, ūmo batīmo banhū nūūlū ndimu; gakūyiwigwiwa mo malaka;

11malaka ga būyegi, na kūsangabala, malaka ga batoolwa na ga batooji, na malaka ga benhi ba shakwinha sha kūlūmba mu numba ya ng'wa SEEBA; abo bakūyūyomba: ‘Nūmbagi ū SEEBA wa mabità, nguno ū SEEBA alī wawiza; ū būtogwa bokwe būlī bo kūshinga welelo na welelo.’ Nguno ī sī yenīyī nakwīshokeja ū wiza wayo ūbo yalī nabo kwīngīīla kale na kale,” alīhaya SEEBA.

12Ū SEEBA wa mabità alīhaya gīkī, “Ū ng'wipandī lyenīlī īlo līl'itogolo dūhū, lītī na shose shose; ndūhū mo banhū, nūūlū ndimu jitīmo; hose pyī ū mu mizengo yalyo gakūbiza mo madīīmīlo hangī, na badīīmi kūtūūgīja mo madaale ga ng'holo jabo.

13Ū mu mizengo ya kū sī ja magūlya ga mitulumenho ya ngūlū ja ng'weli, nī Negevu; nū mu sī ya Benjamini, nū mu magūngūli ga hihī hihī na Yelusalemu, nū mu mizengo ya Būyudaya, gakūbiza mo madaale ga ng'holo hangī, jikūyūbīta kū būtongi wa banhū bakūjibalaga,” alīhaya SEEBA.

14Ū SEEBA alīhaya gīkī, “Shīkū jikwiza nakūshikīlīje ū kwisagīja kwane ūko naabisagīja banhū ba numba ya Isilaeli na ba numba ya Yuda, kūlwa shigongo shane.”

15Ū mu shikū jenījo, nī likanza lyenīlo, ū Daūdi nakūmfulumīja Itambī itūngīlīja. Hū ng'wene akwīta ya būtūngīlīja na wīma ū mu sī.

16Ū mu shikū jenījo ī Yuda Īkūpījiwa, nū nzengo gwa Yelusalemu gūkūbiza mu mhola. Ū nzengo gwenūyo gūkwitanwa gīkī, “Ū SEEBA alī Būtūngīlīja wise.”

17Nguno ū SEEBA alīhaya, “Ū Daūdi atūgayiwa munhū wa kwigasha h'isumbī lya būtemi lya numba ya Isilaeli,

18Na a bagabīji ba lūganda lwa Lawī batalagayiwa munhū wa kwīmīīla kū būtongi wane kūnifunīja shitambò sha kūpemvwa na kūzuukīja shakwinha sha būsu, na kūfunya shitambò sha būlī lūshikū.”

19Ū mhayo go ng'wa SEEBA gwiza ū kūlī Yelemia; gūhaya:

20“Ū SEEBA alīhaya gīkī, ‘Ūlū ng'ūdūla kūlībūlaga ī lilagane lyane īlo līlīho a ha gatī yane na a makanza ga līīmi na a ga būjikū, kūshisha a makanza ga līīmi na a ga būjikū gooye ū kwiza ūmo galagīīlīlilwe,

21a henaho numho līkūcha nī lilagane lyane īlo nabeeja na ntūmani wane Daūdi, nī lilagane lyane īlo nabeeja na Balawī, a bagabīji abo bakanitūmamīlaga; nū Daūdi atūpandīka ng'wingīji wa kūsuga a h'isumbī lyakwe lya būtemi.

22Ūmo sonda ja ng'wigūlū jitūdūla kūbalwa, na a maseni ga ha nyanza gatūdūla kūping'wa, h'ūmo nakūbongegeja nū būbyīle bo ntūmami wane Daūdi, na a Balawī abo bakanitūmamīlaga.’”

23Ū mhayo go ng'wa SEEBA gwiza hangī ū kūlī Yelemia; gūhaya:

24Ūtaalī ū kwigwa ūmo bakūhayīlaga a banhū benaba; ī gīkī, “Ū SEEBA wajiponya ī kaya jenījo būbīlī wajo, nūūlū īkī wajikoma wei ng'wenekīlī? Hūna lūūlū babibengelegije a banhū bane; booya ū kūbisaaba gīkī nabo bal'ihanga.

25Alīyo ū SEEBA alīhaya gīkī, ‘Ūlū natī nene ūyo naabeeja ilagane ha gatī yane na līīmi nū būjikū, nūtūūla na shilagīlo sha kūlang'hana kajīle k'igūlū na sī,

26a henaho hū nakūbūponya ū būbyīle bo ng'wa Yakobo; nū ntūmami wane Daūdi natūkoma ūmò wa kūfuma mu baana bakwe abize nsugi wa shibyalīlwe sha ng'wa Ablahamu, Isaka na Yakobo. Alīyo ū gwa ng'hana gūlī gīkī, ū nene nakūbachīla shigongo, nabashoshe kūfuma ū kū būding'wa wabo.’”

← Chapter 32 Jump to: Chapter 34 →