1 Chronicles 15

Chuvash (CHB) (БИБЛИ) 2009

← Chapter 14 Jump to: Chapter 16 →

1Хӑй хулинче Давид тата та ҫуртсем лартнӑ, Турӑ саккунӗн арчи валли вырӑн хатӗрленӗ, ун валли чатӑр тунӑ.

2Ҫавӑн чухне Давид каланӑ: Турӑ арчине, левитсемсӗр пуҫне, никамӑн та ҫӗклемелле мар, мӗншӗн тесессӗн вӗсене Турӑ арчине ҫӗклеме тата ӗмӗр-ӗмӗр Хӑйшӗн ӗҫлесе тӑма Ҫӳлхуҫа Хӑй суйласа илнӗ, тенӗ.

3Турӑ саккунӗн арчине ун валли хатӗрленӗ вырӑна куҫарса килме Давид Израиль ҫыннисене пурне те Иерусалима пуҫтарнӑ.

4Давид ӗнтӗ Аарон ывӑлӗсемпе левитсене чӗнсе илнӗ:

5унта Кааф ывӑлӗсенчен ҫӗр ҫирӗм ҫын пулнӑ, вӗсен пуҫлӑхӗ Уриил пулнӑ;

6Мерари ывӑлӗсенчен — икҫӗр ҫирӗм ҫын, вӗсен пуҫлӑхӗ Асаия;

7Гирсон ывӑлӗсенчен — ҫӗр вӑтӑр ҫын, вӗсен пуҫлӑхӗ Иоиль;

8Елисафан ывӑлӗсенчен — икҫӗрӗн, вӗсен пуҫлӑхӗ Шемаия;

9Хеврон ывӑлӗсенчен — сакӑрвуннӑн, вӗсен пуҫлӑхӗ Елиел;

10Узиил ывӑлӗсенчен — ҫӗр вуниккӗн, вӗсен пуҫлӑхӗ Аминадав.

11Давид вара Садокпа Авиафар священниксене тата Уриил, Асаия, Иоиль, Шемаия, Елиел, Аминадав левитсене чӗнсе илнӗ те

12вӗсене ҫапла каланӑ: эсир, левит тӑхӑмӗсен пуҫлӑхӗсем, хӑвӑр та тасалӑр, тӑванӑрсем те тасалччӑр, вара Ҫӳлхуҫанӑн, Израиль Туррийӗн, арчине эпӗ ун валли хатӗрленӗ вырӑна куҫарса килӗр,

13леш хутӗнче эпир ҫакна мӗнле тумаллине Турӑран ыйтмарӑмӑр та, ҫав ӗҫе эсир тумарӑр та, Ҫӳлхуҫа Туррӑмӑр пире ҫапса ӳкерчӗ, тенӗ.

14Вара священниксемпе левитсем Ҫӳлхуҫанӑн, Израиль Туррийӗн, арчине ҫӗклесе килмешкӗн тасалса тӑнӑ.

15Моисей Ҫӳлхуҫа сӑмахне пӗлтерсе хушса хӑварнӑ пек, левитсен ывӑлӗсем Турӑ арчине хулпуҫҫи ҫинче шалчасем хурса ҫӗклесе пынӑ.

16Давид ӗнтӗ левитсен пуҫлӑхӗсене хӑйсен юрӑҫӑ тӑванӗсене кӗвӗ сӑпрайӗсемпе тӑратса тухма хушнӑ, лешӗсен псалтирь, цитра, кимвал тытса савӑнӑҫ кӗввине янӑравлӑн каламалла пулнӑ.

17Левитсем вара Иоиль ывӑлне Емана, унӑн тӑванӗсене тата Верехия ывӑлне Асафа, Мерари йӑхӗн ҫыннине Ефана, Кушаия ывӑлне, уйӑрса илнӗ;

18вӗсене ҫак тӑванӗсем пулӑшса тӑмалла пулнӑ: Захария, Бен, Иаазиил, Шемирамоф, Иехиил, Унний, Елиав, Ванея, Маасей, Маттафия, Елифлеуй, Микней, Овед-Эдом тата Иеиел, кусем хапха хуралҫисем пулнӑ.

19Еман, Асаф тата Ефан пӑхӑр кимвал ҫапса янӑраттарнӑ.

20Захария, Азиил, Шемирамоф, Иехиил, Унний, Елиав, Маасей, Ванея вара псалтирь каласа ҫинҫе сасӑпа юрланӑ.

21Маттафия, Елифлеуй, Микней, Овед-Эдом, Иеиел тата Азазия цитра каласа хулӑн сасӑпа юрланӑ.

22Левитсен пуҫлӑхӗ Хенания юрӑ-кӗвӗшӗн явапли пулнӑ, мӗншӗн тесессӗн вӑл юрӑ ӑсти пулнӑ.

23Верехия тата Елкана Турӑ саккунӗн арчине хуралласа пынӑ.

24Шевания, Иосафат, Нафанаил, Амасай, Захария, Ванея, Елиезер священниксем Турӑ саккунӗн арчи умӗнче трупа кӑшкӑртса пынӑ. Овед-Эдом тата Иехия вара Турӑ арчине хуралласа пынӑ.

25Ҫапла Давидпа Израилӗн аслӑ ҫыннисем тата пинпӳсем Ҫӳлхуҫа халалӗн арчине Овед-Эдом ҫуртӗнчен хаваслӑн куҫарса килме тухнӑ.

26Ҫӳлхуҫа халалӗн арчине ҫӗклесе пыракан левитсене Турӑ пулӑшнӑ, вӗсем вара ҫичӗ пӑру тата ҫичӗ така пусса парне кӳнӗ.

27Давид виссон тум тӑхӑннӑ пулнӑ, ҫавӑн пекех Турӑ саккунӗн арчине ҫӗклесе пыракан левитсем те, юрӑҫӑсем те, кӗвӗ калакансемпе юрӑҫӑсен пуҫлӑхӗ Хенания та ҫавӑн йышши тумпах пулнӑ. Давид ҫинче тата йӗтӗн ефод пулнӑ.

28Ҫапла пӗтӗм Израиль, хавассӑн кӑшкӑрса, мӑйракапа трупа кӑшкӑртса, кимвал ҫапса, псалтирь тата цитра каласа, Ҫӳлхуҫа халалӗн арчине куҫарса килнӗ.

29Ҫӳлхуҫа халалӗн арчине Давид хулине илсе кӗнӗ чухне Мелхола, Саул хӗрӗ, чӳречерен пӑхса тӑнӑ пулнӑ, савӑнса сиккелесе пыракан Давид патшана курсассӑн, вӑл ӑна хӑйӗн ӑшӗнче хурланӑ.

← Chapter 14 Jump to: Chapter 16 →