1 Kings 4

Ewe 2014 (EƲEGBE BIBLIA)

← Chapter 3 Jump to: Chapter 5 →

1Israel blibo la katã dzie Salomo ɖu fia ɖo,

2eye eƒe dziɖuɖudɔwɔla kɔkɔtɔwo nye esiwo gbɔna: Nunɔla nye Azarya, Zadok vi;

3fiasã me agbalẽŋlɔlawo nye Elixoref kple Axiya siwo tɔ́e nye Sisa; nyaléɖila nye Yehosafat, Axilud vi;

4aʋakɔ nunɔla nye Benaya, Yehoyada vi; nunɔlawoe nye Zadok kple Abyatar;

5nutome dziɖulawo ƒe tatɔ nye Azarya, Natan vi; fia xɔlɔ̃e nye nunɔla Zabud, Natan vi;

6fiasã me dɔlawo nunɔla nye Axisar; dzizizidɔwɔlawo dzikpɔla, Adoniram nye Abda vi.

7Salomo ɖo nutomedzikpɔla wui eve Israel-dukɔa nu; ame siawo dia nuɖuɖu na fia la kple eƒemetɔwo. Ɖe sia ɖe kpɔa fiasã la dzi alea le nuɖuɖu gome ɣleti ɖeka le ƒe ɖeka me.

8Woƒe ŋkɔwoe nye: Ben-Xur le Efrayim-tonyigba dzi;

9Ben-Deker le Makaz, Saalbim, Bet-Semes, Elon kple Bet-Xanan.

10Ben-Xesed le Arubot Soko kple Xerfer-nyigba blibo la nye etɔ)

11Ben-Abinadab le Dor-nyigba blibo la nu eyae ɖe Salomo ƒe vinyɔnu Tafat,

12Baana, Axilud vi le Taanax, Megido kple Bet-Sean gbɔ nutome katã le Zaretan-du gbɔ, Yezreel-du ƒe anyigbeme gome ʋuu keke yi Abel Mexola-du kple Yokmeam-du gbɔ nu.

13Bengeber le Ramot-du le Gilead nu, eyae xɔ Manase vi Yair ƒe kɔƒe siwo le Gilead kple Argob-nutowo me le Basan. Argob-nutome duawo de bla ade, eye wo katã nye du gãwo siwo woɖo gli ƒo xlã, eye akɔbligameti le woƒe agbowo ŋu.

14Axinadab, Ido vi le Maxanaim-nutome nu.

15Aximaaz le Naftali-nutome. Eyae ɖe Salomo vinyɔnu Basmat,

16Baana, Husai vi le Aser-nutome kple Bealot-du nu;

17Yehosafat, Paruah vi le Isaxar-nyigba nu.

18Simei, Ela vi le Benyamin-nyigba nu.

19Geber, Uri vi le Gilead-nyigba si nye Amoritɔwo ƒe fia Sixon kple Basan-fia Og ƒe anyigba tsã la nu. Nutomedzikpɔla ɖeka nɔ Yuda-nyigba nu.

20Yuda kple Israel-fiaɖuƒe me tɔwo sɔ gbɔ abe ƒutake ene. Woɖua nu, noa nu, eye wonɔ anyi le dzidzɔ me.

21Salomo ƒe dziɖuƒe keke tso Frat-tɔsisi ŋu yi Filistitɔwo ƒe liƒo kple Egipte-nyigba ƒe liƒo dzi ke. Elɔ fiaɖuƒe sue siwo katã nɔ afi mawo la ɖe me. Le Salomo ƒe agbenɔɣi la, fiaɖuƒe mawo katã nɔ ete; wodzɔa nu nɛ, eye wonɔ ete le eƒe agbenɔɣi katã.

22Nuɖuɖu vovovo siwo Salomo hiãna le eƒe fiasã me le ŋkeke ɖeka dzi la woe nye: wɔ memee ton wui enyi, wɔ ƒlatsa ton asieke,

23nyitsu ewo, gbeɖuƒenyi bla eve, alẽ alafa ɖeka, hekpe ɖe klatsa, zi, sãde kple xe damiwo ŋu.

24Anyigba si le Frat-tɔsisi ƒe ɣetoɖoƒe gome tso Tifsa yi keke Gaza ke la hã nye eƒe fiaɖuƒe ƒe akpa aɖe ale be fia siwo katã nɔ afi mawo la nɔ eƒe ŋusẽ te. Nuwo ƒe nɔnɔ alea wɔ be eya kple dukɔ siwo katã ƒo xlãe la nɔ anyi le ŋutifafa me.

25Ale Yuda-nyigba dzi tɔwo kple Israel-nyigba dzi tɔwo nɔ agbe le dziɖeɖi me bɔkɔɔ, tso Dan va se ɖe Beer-Seba gɔ̃ hã. Ame sia ame le eƒe wainkawo kple gbotiwo te le ŋutifafa me le Salomo ƒe agbenɔɣi katã.

26Salomo tu kpó akpe bla ene na eƒe tasiaɖam ŋu sɔwo. Eƒe sɔdzisrafowo de akpe wui eve.

27Ne nutomedzikpɔlaawo dometɔ aɖe ƒe ɣleti si woɖo nɛ ɖo ko la, edia nuɖuɖu si ahiã na fia Salomo kple ame siwo va ɖua nu le eƒe kplɔ̃ ŋu la katã vanɛ; womenana be nuɖuɖu vɔna ɣeaɖekeɣi o.

28Nenema ke ɖe sia ɖe dia ƒo kple gbe ale sinu woɖo nɛ la yia teƒe si wotia nɛ hena tasiaɖam ŋu sɔawo kple lã bubuawo dzi kpɔkpɔ.

29Mawu na nunya kple nugɔmesese Salomo wòwu gbɔgblɔ, eye nu siwo me eƒe sidzedze yi ŋgɔ le ʋĩi ŋutɔ la sɔ gbɔ abe ƒutake ene.

30Eƒe nunya ƒo nunyala gã siwo le ɣedzeƒe kple esiwo le Egipte la tɔ ta.

31Enya nu wu amegbetɔ ɖe sia ɖe. Enya nu wu Etan, Ezraxitɔ la, nya nu wu Maxol viwo Yeman, Xalkol kple Darda. Eŋkɔ ɖi hoo le dukɔ siwo le xexeme ƒe akpa mawo la me godoo va kpe.

32Ekpa lododo akpe etɔ̃, kpa ha akpe ɖeka kple atɔ̃.

33Egblɔ nya detowo le atiwo kple gbewo ŋu, tso sederti si wɔna le Lebanon va ɖo hisɔp si miena ɖe gli ŋu la dzi; nenema ke wòhe nyateƒe vovovowo ɖe go le lãfɔnewo, xewo, nutatawo kple tɔmelãwo ŋu.

34Amewo tsoa dukɔ geɖewo me vana koŋ ko be yewoava se Salomo ƒe nunya. Fia siwo katã se eƒe nunya ŋkɔ la va be yewoase eƒe nunya.

← Chapter 3 Jump to: Chapter 5 →