Revelation 1

Ilonggo (Ang Biblia (1982))

Jump to: Chapter 2 →

1Ang bugna ni Jesu-Cristo, nga ginhatag sang Dios sa iya nga ipakita sa iya mga ulipon ang butang nga dapat mahanabu sing madali; kag ginpadala niya kag ginpakilala ini paagi sa iya manugtunda sa kay Juan nga iya ulipon,

2nga nagsaksi sang polong sang Dios kag sang pagpamatuud ni Jesu-Cristo, bisan sang tanan nga iya nakita.

3Bulahan ang nagabasa sing mabaskug kag ang mga nagapamati sang mga polong sang tagna, kag nagabantay sang mga butang nga nasulat sa sini; kay malapit na ang tion.

4Si Juan sa pito ka iglesia nga yara sa Asia: Ang bugay sa inyo kag paghidait gikan sa iya nga amo karon kag amo anay kag nga magakari, kag gikan sa pito ka espiritu nga yadto sa atubangan sang iya trono,

5kag gikan kay Jesu-Cristo nga saksi nga matutum, ang panganay sang mga patay, kag ang manugdumala sang mga hari sa duta. Sa iya nga nagahigugma sa aton kag naghugas sa aton gikan sa aton mga sala bangud sang iya dugo

6kag naghimo sa aton nga ginharian, nga mga sacerdote sa iya Dios kag Amay, sa iya ang himaya kag ang kagamhanan sa katuigan kag katuigan. Kabay pa.

7Yari karon, nagakari sia kaupud sang mga panganud, kag ang tagsa ka mata makakita sa iya, ang mga naghandus sa iya; kag ang tanan nga kabikahan sang duta magahaya bangud sa iya. Hoo. Kabay pa.

8“Ako ang Alpha kag ang Omega,” nagasiling ang Ginoong Dios, nga amo karon kag amo anay kag nga magakari, ang Makaako.

9Ako si Juan, inyo utud kag umalambit upud sa inyo sa kapipit-an kag sa ginharian kag sa pagpailub sa kay Jesus, didto anay sa pulo nga ginatawag Patmos tungud sa polong sang Dios kag sa pagpamatuud ni Jesus.

10Sa Espiritu ako sa adlaw sang Ginoo, kag nabatian ko sa akon likod ang daku nga tingug nga daw budyong

11nga nagasiling, “Ang imo nakita isulat sa isa ka tolon-an kag ipadala sa pito ka iglesia, sa Efeso kag sa Smirna kag sa Pergamo kag sa Tiatira kag sa Sardis kag sa Filadelfia kag sa Laodicea.”

12Niyan nagbalikid ako sa pagtan-aw sang tingug nga nagpakighambal sa akon, kag sang nakabalikid nakita ko ang pito ka candelero nga bulawan,

13kag sa tunga sang mga candelero ang isa nga kaangay sang anak sang tawo, nga napanaptan sing malaba nga panapton kag nawagkusan sa dughan sing wagkus nga bulawan;

14ang iya olo kag ang iya bohok maputi kaangay sang bulbul nga maputi, subong sang nieve; ang iya mga mata subong sang dabdab sang kalayo,

15ang iya mga tiil kaangay sang saway nga ginpahining, linubus subong nga sa horno, kag ang iya tingug subong sang daganas sang madamu nga tubig;

16sa iya kamut nga too may pito ka bitoon, sa iya baba nagagowa ang isa ka espada nga matalum nga duha sing sulab, kag ang iya nawung subong sang adlaw nga nagasilak sa iya bug-os nga kasanag.

17Sang nakita ko sia, napukan ako nga daw patay sa iya tiilan. Apang ginpahamtang niya sa akon ang iya kamut nga too, nga nagasiling, “Dili magkahadluk, ako ang nahauna kag ang katapusan,

18kag ang nagakabuhi; napatay ako, kag yari karon nagakabuhi ako sa gihapon, kag yari sa akon ang mga yabi sang Kamatayon kag Hades.

19Karon isulat mo ang imo nakita, ang amo karon kag ang mahanabu sa olihi.

20Kon nahanungud sa tinago sang pito ka bitoon nga imo nakita sa akon kamut nga too, kag ang pito ka candelero nga bulawan, ang pito ka bitoon amo ang mga manugtunda sang pito ka iglesia kag ang pito ka candelero amo ang pito ka iglesia.

Jump to: Chapter 2 →