Revelation 13

Ilonggo (Ang Biblia (1982))

← Chapter 12 Jump to: Chapter 14 →

1Kag nakita ko ang sapat nga nagatakas gikan sa dagat, nga may napulo ka sungay kag pito ka olo, nga sa iya mga sungay may napulo ka diadema kag sa iya mga olo may ngalan sang pasipala.

2Kag ang sapat nga akon nakita kaangay sang leopardo, ang iya mga tiil subong sang iya sang oso, kag ang iya baba subong sang baba sang leon. Kag ginhatag sa iya sang dragon ang iya gahum kag ang iya trono kag dakung pagbulut-an.

3Ang isa sang iya mga olo daw napilasan nga ikamatay, apang ang iya pilas nga ikamatay nag-ayo, kag ang bug-os nga duta nagsonod nga may katingala sa sapat.

4Nagsimba ang mga katawohan sa dragon, bangud nga ginhatag niya ang iya pagbulut-an sa sapat, kag nagsimba sila sa sapat, nga nagasiling, “Sin-o bala ang kaangay sa sapat, kag sin-o bala ang sarang makapakig-away batok sa iya?”

5Kag ginhatagan ang sapat sing baba nga nagahambal sang bugalon kag mapasipalahon nga mga polong, kag gintugutan ini sa paggamit sang pagbulut-an sing kap-atan kag duha ka bulan;

6ginbungat niya ang iya baba sa pagpasipala batok sa Dios, nga nagapasipala sang iya ngalan kag iya puluy-an, nga amo, ang mga nagapuyo sa langit.

7Subong man gintugutan sia sa pagpakig-away batok sa mga balaan kag sa pagdaug sa ila. Kag ginhatagan sia sing pagbulut-an sa tagsa ka kabikahan kag katawohan kag hambal kag pungsud,

8kag magasimba sa iya ang tanan nga nagapuyo sa duta, ang tagsatagsa nga ang iya ngalan wala masulat sa wala pa mapasad ang kalibutan, sa tolon-an sang kabuhi sang Cordero nga gin-ihaw.

9Kon ang bisan sin-o may idulungug, magpamati sia:

10Kon ang bisan sin-o bilihagon, makadto sia sa kabihagan; kon ang bisan sin-o magpatay sa espada, kinahanglan sa espada sia patyon. Yari ang panawag nga sa pagpailub kag pagtoo sang mga balaan.

11Niyan nakita ko ang isa na man ka sapat nga naggowa sa duta; may duha sia ka sungay kaangay sang sa cordero kag naghambal sia subong sang dragon.

12Nagahikot sia sang bug-os nga pagbulut-an sang nahaunang sapat sa iya atubangan, kag ginapasimba niya ang duta kag ang mga nagapuyo sa sini sa nahaunang sapat, nga ang iya pilas nga ikamatay nag-ayo.

13Nagahimo sia sing dalagkung mga tanda, bisan sa pagpapanaug sang kalayo sa duta gikan sa langit sa itololok sang mga tawo;

14kag ginadayaan niya ang mga nagapuyo sa duta paagi sa mga tanda nga gintugut sa iya sa paghimo sa itololok sang sapat, nga nagasiling sa ila sa pagbuhat sing larawan tungud sa sapat nga napilasan sang espada apang nabuhi pa;

15kag gintugutan sia sa paghatag sing ginhawa sa larawan sang sapat agud nga ang larawan sang sapat makahambal, kag sa pagpapatay sang indi magsimba sa larawan sang sapat.

16Subong man ginapapat-inan niya ang tanan, magamay kag dalagku, manggaranon kag imol, hilway kag ulipon, sa too nga kamut ukon sa agtang,

17agud nga wala sing sarang makabakal ukon makabaligya luwas kon sia may pat-in, nga amo, ang ngalan sang sapat ukon ang numero sang ngalan sini.

18Ini nagatawag sang kaalam: ang may paghangup mag-isip sia sang numero sang sapat, kay ini numero sang tawo, ang iya numero anum ka gatus kag kan-uman kag anum.

← Chapter 12 Jump to: Chapter 14 →