Revelation 3

Ilonggo (Ang Biblia (1982))

← Chapter 2 Jump to: Chapter 4 →

1“Kag sa manugtunda sang iglesia sa Sardis isulat: ‘Ang mga polong sang may pito ka espiritu sang Dios kag pito ka bitoon. “‘Nakilala ko ang imo mga buhat; may ngalan ikaw nga nagakabuhi ka, kag ikaw patay.

2Magmata ka, kag lig-ona ang nabilin nga malapit na lamang mapatay, kay wala ako sing nakita sang mga buhat mo nga nahimpit sa atubangan sang akon Dios.

3Dumduma niyan ang imo nabaton kag nabatian; bantayan mo ina, kag maghinulsul ka. Kon indi ka magmata, magkara ako subong sang makawat, kag indi ka makahibalo kon sa ano nga takna magaabut ako sa imo.

4Apang may pila ikaw ka ngalan sa Sardis, katawohan nga wala magdagta sang ila mga panapton; kag magalakat sila upud sa akon sa maputing panapton, kay mga takus sila.

5Ang nagadaug panaptan sing mga panapton nga maputi, kag indi ko pagpanason ang iya ngalan sa tolon-an sang kabuhi; itu-ad ko ang iya ngalan sa atubangan sang akon Amay kag sa atubangan sang iya mga manugtunda.

6Ang may idulungug, magpamati sang ginasiling sang Espiritu sa mga iglesia.’

7“Kag sa manugtunda sang iglesia sa Filadelfia isulat: ‘Ang mga polong sang balaan, ang matuud, nga may iya sang yabi ni David, nga nagabukas kag wala sing magatakup, kag nagatakup kag wala sing nagabukas.

8“‘Nakilala ko ang imo mga buhat. Yari karon, ginbutang ko sa imo atubangan ang gawang nga nabuksan, nga wala sing makatakup; nakahibalo ako nga may diotay ka lamang nga gahum, kag walay sapayan nagbantay ka sang akon polong kag wala magpanghiwala sang akon ngalan.

9Yari karon, himoon ko ang mga sa sinagoga ni Satanas nga nagasiling nga sila mga Judio kag indi amo, kondi nagabutig—yari karon, pakarion ko sila kag payaubon sa imo tiilan, kag pakilalahon nga ginhigugma ko ikaw.

10Bangud nga ginbantayan mo ang akon polong sang mapailubon nga pagbatas, ako magabantay sa imo sa takna sang pagtilaw nga magaabut sa bug-os nga kalibutan, sa pagtilaw sa mga nagapuyo sa duta.

11Magakari ako sing madali; hupti ang yara sa imo, agud nga walay isa nga makakuha sang imo purungpurung.

12Ang nagadaug, himoon ko sia nga haligi sa templo sang akon Dios; indi na gid sia maggowa gikan sini, kag isulat ko sa iya ang ngalan sang akon Dios, kag ang ngalan sang banwa sang akon Dios, ang Bag-ong Jerusalem nga nagapanaug halin sa langit gikan sa akon Dios, kag ang akon bag-ong ngalan.

13Ang may idulungug, magpamati sang ginasiling sang Espiritu sa mga iglesia.’

14“Kag sa manugtunda sang iglesia sa Laodicea isulat: ‘Ang mga polong sang Kabay Pa, ang matutum kag matuud nga saksi, ang pamuno sang tinuga sang Dios.

15“‘Nakilala ko ang imo mga buhat: indi ka mabugnaw ukon mainit. Buut ko kuntani nga mabugnaw ka ukon mainit!

16Gani, bangud nga maalabaab ka, kag indi mainit ukon mabugnaw, ibuga ko ikaw sang akon baba.

17Kay nagasiling ka, Manggaranon ako, nagbugana ako, kag wala nagakinahanglan sing bisan ano; kag wala makahibalo nga ikaw ang kailo, makalolooy, imol, bulag, kag hubo.

18Busa nagalaygay ako sa imo sa pagbakal gikan sa akon sing bulawan nga inulay sang kalayo, agud nga magmanggaranon ka, kag sing mga panapton nga maputi agud nga mapanaptan mo ang imo kaugalingon kag ang kahuluy-an sang imo pagkahubo indi mapadayag, kag sing tambal nga ihaplas sa imo mga mata, agud nga makakita ka.

19Ang mga ginahigugma ko, ginasabdong kag ginasilotan ko; gani magmakugihon ka kag maghinulsul.

20Yari karon, nagatindug ako sa ganhaan kag nagapanuktuk; kon ang bisan sin-o magpamati sang akon tingug kag magbukas sang ganhaan, magasulud ako sa iya kag magapanihapon kaupud niya, kag sia kaupud nakon.

21Ang nagadaug, palingkoron ko sia kaupud nakon sa akon trono, subong nga ako nagdaug man kag naglingkod kaupud sa akon Amay sa iya trono.

22Ang may idulungug, magpamati sang ginasiling sang Espiritu sa mga iglesia.’”

← Chapter 2 Jump to: Chapter 4 →