Revelation 5

Ilonggo (Ang Biblia (1982))

← Chapter 4 Jump to: Chapter 6 →

1Kag nakita ko sa kamut nga too sang nagalingkod sa trono ang tolon-an nga linokot nga nasulatan sa sulud kag sa likod, nga napat-inan sing pito ka pat-in;

2kag nakita ko ang makusug nga manugtunda nga nagabantala sa mabaskug nga tingug, “Sin-o bala ang takus sa pagbukad sang tolon-an nga linokot kag sa paghukas sang iya mga pat-in?”

3Kag walay isa sa langit ukon sa duta ukon sa idalum sang duta nga sarang makabukad sang tolon-an nga linokot ukon makabasa sini,

4kag naghibi ako sing tama bangud nga walay isa nga nakita nga takus makabukad sang tolon-an nga linokot ukon makabasa sini.

5Niyan ang isa sang mga tigulang nagsiling sa akon, “Dili ka maghibi; yari karon, ang Leon sang kabikahan sang Juda, ang Gamut ni David, nakadaug, agud nga makabukad sia sang tolon-an nga linokot kag sang pito ka pat-in sini.”

6Kag nakita ko sa tunga sang trono kag sang apat ka sapat nga buhi kag sa tunga sang mga tigulang, ang Cordero nga nagatindug, subong nga daw gin-ihaw, nga may pito ka sungay kag pito ka mata, nga amo ang pito ka espiritu sang Dios nga ginpadala sa bug-os nga duta;

7kag nagpalapit sia kag ginkuha ang tolon-an nga linokot sa kamut nga too sang nagalingkod sa trono.

8Kag sang nakuha niya ang tolon-an nga linokot, nagyaub sa atubangan sang Cordero ang apat ka sapat nga buhi kag ang duha ka pulo kag apat ka tigulang, nga ang tagsa may arpa, kag mga yahong nga bulawan nga puno sang incienso, nga amo ang mga pangamuyo sang mga balaan;

9kag nagaamba sila sing bag-ong ambahanon, nga nagasiling, “Takus ka sa pagkuha sang tolon-an nga linokot kag sa paghukas sang iya mga pat-in, kag gin-ihaw ka kag gintubus mo sa Dios sang imo kaugalingon nga dugo ang mga tawo sa tagsa ka kabikahan kag hambal kag katawohan kag pungsud,

10kag ginhimo sila nga ginharian kag mga sacerdote sa aton Dios, kag magagahum sila sa duta.”

11Niyan nagtolok ako, kag nabatian ko sa palibut sang trono kag sang mga sapat nga buhi kag mga tigulang ang tingug sang madamung manugtunda, nga ang kadamuon nila linaksa ka linaksa kag linibo ka linibo,

12nga nagasiling sa mabaskug nga tingug, “Takus ang Cordero nga gin-ihaw, sa pagbaton sang gahum kag manggad kag kaalam kag kusug kag dungug kag himaya kag pagpakamaayo!”

13Kag nabatian ko ang tagsa ka tinuga nga yara sa langit kag sa duta kag sa idalum sang duta kag sa dagat, kag ang tanan nga yara sa ila, nga nagasiling, “Sa nagalingkod sa trono kag sa Cordero ang pagpakamaayo kag dungug kag himaya kag kagamhanan sa katuigan kag katuigan!”

14Kag ang apat ka sapat nga buhi nagsiling, “Kabay pa!” kag ang mga tigulang nagyaub kag nagsimba.

← Chapter 4 Jump to: Chapter 6 →