Revelation 8

Ilonggo (Ang Biblia (1982))

← Chapter 7 Jump to: Chapter 9 →

1Sang paghukas sang Cordero sang ikapito nga pat-in, may kalinong sa langit sing mga tunga sa takna.

2Niyan nakita ko ang pito ka manugtunda nga nagatindug sa atubangan sang Dios, kag ginhatagan sila sing pito ka budyong.

3Kag nag-abut ang isa na man ka manugtunda kag nagtindug sa luyo sang halaran nga may incensario nga bulawan; kag ginhatagan sia sing madamung incienso nga idugang sa mga pangamuyo sang tanan nga balaan sa halaran nga bulawan sa atubangan sang trono;

4kag ang aso sang incienso nagtub-ok upud sang mga pangamuyo sang mga balaan gikan sa kamut sang manugtunda sa atubangan sang Dios.

5Niyan ginkuha sang manugtunda ang incensario kag ginpuno niya ini sang kalayo gikan sa halaran kag ginpilak ini sa duta; kag may mga tonog sang mabaskug nga daguub, mga kagahud, mga idlab sang kilat, kag linog.

6Karon ang pito ka manugtunda nga may pito ka budyong naghanda sa pagpatonog sa ila.

7Ang nahaunang manugtunda nagpatonog sang iya budyong, kag nag-ulan sang hielo kag kalayo, nga nasamoan sang dugo, nga nagtupa sa duta; kag ang ikatlong bahin sang duta nasonog, kag ang ikatlong bahin sang kakahoyan nasonog, kag ang tanan nga hilamon nga hilaw nasonog.

8Ang ikaduhang manugtunda nagpatonog sang iya budyong, kag daw isa ka daku nga bukid, nga nagadabdab sa kalayo, gintagbung sa dagat;

9kag ang ikatlong bahin sang dagat nahimo nga dugo, nagkalamatay ang ikatlong bahin sang mga tinuga nga buhi sa dagat, kag nawagwag ang ikatlong bahin sang mga sakayan.

10Ang ikatlong manugtunda nagpatonog sang iya budyong, kag may naholog gikan sa langit nga dakung bitoon, nga nagadabdab subong sang isa ka sulo, kag naholog ini sa ikatlong bahin sang mga suba kag sa mga tuburan sang tubig.

11Ang ngalan sang bitoon amo ang Ajenjo. Ang ikatlong bahin sang mga tubig nahimo nga ajenjo, kag madamung tawo ang nagkalamatay bangud sang mga tubig, bangud nga nagpait ini.

12Ang ikap-at nga manugtunda nagpatonog sang iya budyong, kag ginhampas ang ikatlong bahin sang adlaw, kag ang ikatlong bahin sang bulan, kag ang ikatlong bahin sang mga bitoon, agud nga magdulum ang ikatlong bahin sang ila kapawa; walay kasanag ang ikatlong bahin sang adlaw, kag subong man ang ikatlong bahin sang gab-i.

13Niyan nagtolok ako, kag akon nabatian ang aguila, nga nagalupad sa tunga sang langit, nga nagasiling sa mabaskug nga tingug, “Kailo, kailo, kailo sa mga nagapuyo sa duta, sa mabaskug nga mga pagpatonog sang iban nga mga budyong nga buut patonggon sang tatlo ka manugtunda!”

← Chapter 7 Jump to: Chapter 9 →