Revelation 22

Ilonggo (Ang Biblia (1982))

← Chapter 21 Jump to:

1Niyan ginpakita niya sa akon ang suba sang tubig sang kabuhi, nga matin-aw subong sang katya, nga nagailig gikan sa trono sang Dios kag sang Cordero

2sa tunga sang dalan sang banwa; subong man, sa tagsa ka pangpang sang suba, yara ang kahoy sang kabuhi nga nagadala sing napulog duha ka sari sang bunga, nga nagapatubas sang iya bunga sa tagsa ka bulan; kag ang mga dahon sang kahoy bulong sa mga pungsud.

3Wala na sing pagpanghimalaut, apang ang trono sang Dios kag sang Cordero mangindidto, kag ang iya mga ulipon magasimba sa iya;

4makita nila ang iya nawung, kag ang iya ngalan manginsa ila mga agtang.

5Kag wala na sing gab-i; wala sila sing kinahanglan sang kapawa sang suga ukon sang adlaw, kay ang Ginoong Dios mangin-ila kapawa, kag magahari sila sa katuigan kag katuigan.

6Kag nagsiling sia sa akon, “Ining mga polong salaligan kag matuud. Kag ang Ginoo, ang Dios sang mga espiritu sang mga manalagna, nagpadala sang iya manugtunda sa pagpakita sa iya mga ulipon sang kinahanglan mahanabu sing madali.

7Kag yari karon, nagakari ako sing madali.” Bulahan ang nagabantay sang mga polong sang tagna sining tolon-an.

8Ako nga si Juan amo ang nakabati kag nakakita sining mga butang. Kag sang pagkabati kag pagkakita ko sa ila, nagyaub ako sa pagsimba sa tiilan sang manugtunda nga nagpakita sini sa akon;

9apang nagsiling sia sa akon, “Dili ka gid maghimo sina! Ako masigkaulipon mo kag sang imo mga kauturan nga mga manalagna, kag sang mga nagabantay sang mga polong sining tolon-an. Simbaha ang Dios.”

10Kag nagsiling sia sa akon, “Dili pagpat-ini ang mga polong sang tagna sining tolon-an, kay ang tion malapit na.

11Ang malauton maghimo sing malaut gihapon, kag ang mahigko magmahigko gihapon, kag ang matarung maghimo sing matarung gihapon, kag ang balaan magbalaan gihapon.”

12“Yari karon, nagakari ako sing madali, nga nagadala sang akon balus, sa paghatag sa tagsa ka tawo sono sa iya buhat.

13Ako ang Alpha kag ang Omega, ang nahauna kag ang naolihi, ang ginsuguran kag ang katapusan.”

14Bulahan ang mga nagabunak sang ila mga panapton nga malaba, agud nga may kinamatarung sila sa kahoy sang kabuhi kag makasulud sa mga gawang sang banwa.

15Sa gowa yara ang mga ido kag ang mga manugbabaylan kag ang mga makihilawason kag ang mga manugpatay kag ang mga diwatahan, kag ang tagsatagsa nga nagahigugma kag nagahimo sang butig.

16“Ako si Jesus nagpadala sang akon manugtunda sa inyo sa pagsaksi sini sa mga iglesia. Ako amo ang gamut kag kaliwat ni David, ang masiga nga kabugwason.”

17Ang Espiritu kag ang Nobya nagasiling, “Kari.” Kag ang nagapamati magsiling, “Kari.” Kag ang ginauhaw magkari, ang buut magkuha sang tubig sang kabuhi sa walay bayad.

18Ako nagapaandam sa tagsa ka tawo nga nagapamati sang mga polong sang tagna sining tolon-an: kon ang bisan sin-o nga tawo magdugang sa ila, ang Dios magadugang sa iya sang mga kalalat-an nga nasulat sa sining tolon-an,

19kag kon ang bisan sin-o nga tawo mag-iban sa mga polong sang tolon-an sining tagna, ibanon sang Dios ang iya bahin sa kahoy sang kabuhi kag sa balaan nga banwa, nga nasulat sa sining tolon-an.

20Ang nagapamatuud sining mga butang nagasiling, “Sa pagkamatuud nagakari ako sing madali.” Kabay pa. Kari, Ginoong Jesus!

21Ang bugay ni Ginoong Jesus manginkaupud sang tanan nga balaan. Kabay pa.

← Chapter 21 Jump to: