Revelation 17

Ilonggo (Ang Biblia (1982))

← Chapter 16 Jump to: Chapter 18 →

1Niyan nag-abut ang isa sang pito ka manugtunda nga may pito ka yahong kag nagsiling sa akon, “Kari ka, ipakita ko sa imo ang paghukom sang dakung makihilawason nga babayi nga nagalingkod sa ibabaw sang madamung tubig,

2nga sa iya nagapakighilawas ang mga hari sang duta, kag ang mga nagapuyo sa duta nahobog sang alak sang iya pagkamakihilawason.

3Kag sa Espiritu gindala niya ako sa kamingawan, kag nakita ko ang babayi nga nagasakay sa sapat nga mapula nga nalipus sang mga ngalan sang pagpasipala, kag may pito ka olo kag napulo ka sungay.

4Ang babayi napanaptan sing purpura kag escarlata, kag napunihan sing bulawan kag mga uluyason kag mga mutya, nga may tagayan nga bulawan sa iya kamut nga puno sang mga kangil-aran, kag sang mga kahigkoan sang iya pagkamakihilawason;

5kag sa iya agtang nasulat ang ngalan nga tinago: “Babilonia nga daku, iloy sang mga makihilawason kag sang mga kangil-aran sang duta.”

6Kag nakita ko ang babayi, nga nahobog sang dugo sang mga balaan kag sang dugo sang mga tigbatas ni Jesus. Sang nakita ko sia natingala ako sing daku.

7Apang ang manugtunda nagsiling sa akon, “Ngaa bala natingala ka? Isiling ko sa imo ang tinago sang babayi, kag sang sapat nga may pito ka olo kag napulo ka sungay nga nagadala sa iya.

8Ang sapat nga nakita mo amo sia anay, kag indi na karon, kag buut na magsaka gikan sa kadadalman kag magkadto sa kalaglagan; kag ang mga nagapuyo sa duta nga wala masulat ang ila mga ngalan sa tolon-an sang kabuhi kutub sa pagpasad sang kalibutan, matingala sila sang ila makita ang sapat, bangud nga amo sia anay kag indi na karon kag amo ang magaabut.

9Ini nagatawag sang hunahuna nga may kaalam: ang pito ka olo amo ang pito ka bukid nga ginalingkoran sang babayi;

10sila man pito ka hari, ang lima sa ila napukan, ang isa amo karon, ang isa wala pa mag-abut, kag kon mag-abut sia kinahanglan nga magpabilin sia sing malip-ot nga tion lamang.

11Nahanungud sa sapat nga amo sia anay kag indi na karon, amo sia ang ikawalo apang iya sia sang pito, kag nagakadto sia sa kalaglagan.

12Kag ang napulo ka sungay nga nakita mo amo ang napulo ka hari nga wala pa makabaton sang gahum, apang magabaton sila sing pagbulut-an subong nga mga hari sing isa ka takna, kaupud sang sapat.

13Ini sila may isa ka hunahuna kag ginahatag nila ang ila gahum kag pagbulut-an sa sapat;

14sila magapakig-away batok sa Cordero, kag ang Cordero magadaug sa ila, kay Ginoo sia sang mga ginoo kag Hari sang mga hari, kag sila nga kaupud niya mga pinanawag kag pinili kag matutum.”

15Kag nagsiling sia sa akon, “Ang mga tubig nga nakita mo, nga ginalingkoran sang makihilawason nga babayi, mga katawohan kag mga kadam-an kag mga pungsud kag mga hambal.

16Kag ang napulo ka sungay nga imo nakita, ini sila kag ang sapat magadumut sa makihilawason nga babayi; magapamingaw kag magapahubo sila sa iya, kag magakaon sang iya unud kag magasonog sa iya sa kalayo,

17kay ginbutang sang Dios sa ila tagiposoon ang paghimo sang iya katuyoan paagi sa paghiliusa sa painoino kag sa paghatag sang ila harianon nga gahum sa sapat, tubtub nga matuman ang mga polong sang Dios.

18Kag ang babayi nga imo nakita amo ang dakung banwa nga nagahari sa mga hari sang duta.”

← Chapter 16 Jump to: Chapter 18 →