Revelation 4

Ilonggo (Ang Biblia (1982))

← Chapter 3 Jump to: Chapter 5 →

1Sa tapus sini nagtolok ako, kag yari karon, ang ganhaan nga nabuksan sa langit! Kag ang nahauna nga tingug, nga akon nabatian nga nagapakighambal sa akon subong sang budyong, nagsiling, “Saka diri, kag ipakita ko sa imo ang mahanabu sa olihi sini.”

2Sa gilayon sa Espiritu ako, kag yari karon, may trono sa langit, kag may isa nga nagalingkod sa trono!

3Kag ang naglingkod didto kaangid sa dagway sang isa ka bato nga jaspe kag cornalina, kag may balangaw sa palibut sang trono kaangay sang esmeralda.

4Sa palibut sang trono may duha ka pulo kag apat ka trono, kag sa mga trono nagalingkod ang duha ka pulo kag apat ka tigulang, nga napanaptan sing mga panapton nga maputi, kag sa ila mga olo mga purungpurung nga bulawan.

5Sa trono nagagikan ang mga idlab sang kilat, kag mga tingug kag mga tonog sang daguub, kag may pito ka sulu sang kalayo nga nagadabdab sa atubangan sang trono, nga amo ang pito ka espiritu sang Dios;

6kag sa atubangan sang trono may daw subong sang lawud nga salaming, kaangay sang katya. Kag sa palibut sang trono, sa tagsa ka luyo sang trono, may apat ka sapat nga buhi, nga nalipus sang mga mata sa atubangan kag sa likod:

7ang nahaunang sapat nga buhi kaangay sang leon, ang ikaduhang sapat nga buhi kaangay sang baka, ang ikatlong sapat nga buhi may nawung sang tawo, kag ang ikap-at nga sapat nga buhi kaangay sang aguila nga nagalupad.

8Kag ang apat ka sapat nga buhi, nga ang tagsa sa ila may anum ka pakpak, nalipus sang mga mata sa palibut kag sa sulud, kag wala sila pag-untat sa pag-amba sa adlaw kag gab-i, “Balaan, balaan, balaan, ang Ginoong Dios nga Makaako, nga amo anay kag amo karon kag ang magakari!”

9Kag sang nagahatag sing himaya kag dungug kag mga pasalamat ang mga sapat nga buhi sa nagalingkod sa trono, sa nagakabuhi sa katuigan kag katuigan,

10ang duha ka pulo kag apat ka tigulang nagayaub sa atubangan sang nagalingkod sa trono kag nagasimba sa iya nga nagakabuhi sa mga katuigan kag katuigan; nagapilak sila sang ila mga purungpurung sa atubangan sang trono, nga nagaamba,

11“Takus ka, Ginoo kag Dios namon, sa pagbaton sang himaya kag dungug kag gahum, kay ikaw ang nagtuga sang tanan nga butang, kag bangud sang imo kabubut-on nangin-amo kag gintuga sila.”

← Chapter 3 Jump to: Chapter 5 →