Revelation 7

Ilonggo (Ang Biblia (1982))

← Chapter 6 Jump to: Chapter 8 →

1Sa tapus sini nakita ko ang apat ka manugtunda nga nagatindug sa apat ka pamusud sang duta, nga nagapugung sang apat ka hangin sang duta, agud nga walay hangin nga maghuyup sa duta ukon sa dagat ukon sa bisan ano nga kahoy.

2Niyan nakita ko nga nagakayab ang isa na man ka manugtunda gikan sa sidlangan, nga nagadala sang pat-in sang Dios nga buhi, kag nagsinggit sia sa mabaskug nga tingug sa apat ka manugtunda nga sa ila ginhatag ang gahum sa pagsamad sang duta kag dagat,

3nga nagasiling, “Dili ninyo pagsamara ang duta ukon ang dagat ukon ang kakahoyan, tubtub nga mapat-inan namon ang mga ulipon sang aton Dios sa ila mga agtang.”

4Kag nabatian ko ang kadamuon sang mga napat-inan, isa ka gatus kag kap-atan kag apat ka libo ang ginpamat-inan, gikan sa tagsa ka kabikahan sang mga anak sang Israel,

5sa kabikahan ni Juda napulog duha ka libo ang ginpat-inan, sa kabikahan ni Ruben napulog duha ka libo, sa kabikahan ni Gad napulog duha ka libo,

6sa kabikahan ni Aser napulog duha ka libo, sa kabikahan ni Neftali napulog duha ka libo, sa kabikahan ni Manases napulog duha ka libo,

7sa kabikahan ni Simeon napulog duha ka libo, sa kabikahan ni Levi napulog duha ka libo, sa kabikahan ni Issacar napulog duha ka libo,

8sa kabikahan ni Zabulon napulog duha ka libo, sa kabikahan ni Jose napulog duha ka libo, sa kabikahan ni Benjamin napulog duha ka libo ang ginpat-inan.

9Sa tapus sini nagtolok ako, kag yari karon, ang dakung kadam-an nga walay tawo nga makaisip, gikan sa tagsa ka pungsud, gikan sa tanan nga kabikahan kag katawohan kag hambal, nga nagatindug sa atubangan sang trono kag sang Cordero, nga napanaptan sing malaba nga mga panapton nga maputi, nga may mga paklang sa ila mga kamut,

10kag nagasinggit sila sa mabaskug nga tingug, “Ang kaluwasan iya sang aton Dios nga nagalingkod sa trono, kag sang Cordero!”

11Kag ang tanan nga manugtunda nagtindug sa palibut sang trono kag palibut sang mga tigulang kag sang apat ka sapat nga buhi, kag nagyaub sila sa atubangan sang trono kag nagsimba sa Dios,

12nga nagasiling, “Kabay pa! Ang pagpakamaayo kag himaya kag kaalam kag pagpasalamat kag dungug kag gahum kag kusug manginsa aton Dios sa katuigan kag katuigan! Kabay pa.”

13Niyan naghambal ang isa sang mga tigulang, nga nagasiling sa akon, “Sin-o bala ini sila, nga nagapanaput sing malaba nga mga panapton nga maputi, kag diin sila maghalin?”

14Nagsiling ako sa iya, “Ginoo ko, ikaw nakahibalo.” Kag nagsiling sia sa akon, “Ini amo sila ang naggowa sa dakung kangitngitan; ginbunakan nila ang ila mga panapton nga malaba kag ginpaputi sila sa dugo sang Cordero.

15Busa yara sila sa atubangan sang trono sang Dios, kag ginaalagad nila sia sa adlaw kag gab-i sa iya templo; kag sia nga nagalingkod sa trono magapahandong sa ila sa iya pagtambong.

16Indi na sila paggutumon, ukon pag-uhawon pa; ang adlaw indi na magsilak sa ila, ukon ang bisan ano pa nga kasingkal sang init.

17Kay ang Cordero nga yara sa tunga sang trono mangin-ila manugpahalab, kag magatuytuy sa ila sa mga tuburan sang tubig nga nagahatag sing kabuhi; kag ang Dios magapahid sang tagsa ka luha sa ila mga mata.”

← Chapter 6 Jump to: Chapter 8 →