Revelation 10

Ilonggo (Ang Biblia (1982))

← Chapter 9 Jump to: Chapter 11 →

1Niyan nakita ko ang isa pa ka makusug nga manugtunda nga nagakunsad gikan sa langit, nga napanaptan sing panganud, nga may balangaw sa iya olo, kag ang iya nawung subong sang adlaw, kag ang iya mga tiil subong sang mga haligi nga kalayo.

2Sia may tolon-an nga linokot nga diotay nga nabukad sa iya kamut. Kag gintapak niya ang iya tiil nga too sa dagat, kag ang wala sa duta,

3kag nagtawag sa mabaskug nga tingug, subong sang pagngurub sang leon; sang nagtawag sia, ang pito ka daguub nagtonog.

4Kag sang nakatonog ang pito ka daguub, buut na ako kuntani magsulat, apang nabatian ko ang tingug gikan sa langit nga nagasiling, “Pat-ini ang ginmitlang sang pito ka daguub, kag dili pag-isulat ini.”

5Kag ang manugtunda nga nakita ko nga nagatindug sa dagat kag sa duta nagbayaw sang iya kamut nga too sa langit

6kag nagsumpa bangud sa iya nga nagakabuhi sa katuigan kag katuigan, nga nagtuga sang langit kag sang yara sa sini, kag sang duta kag sang mga butang nga yara sa sini, kag sang dagat kag sang mga butang nga yara sa sini, nga wala na sing paglantang pa,

7kondi nga sa mga adlaw sang pagtawag sang budyong nga patonggon sang ikapitong manugtunda, ang tinago sang Dios, sono sa ginpahibalo niya sa iya mga ulipon nga mga manalagna, matuman.

8Niyan ang tingug nga akon nabatian gikan sa langit nagpakighambal liwat sa akon, nga nagasiling, “Lakat, kuhaa ang tolon-an nga linokot nga nabukad sa kamut sang manugtunda nga nagatindug sa dagat kag sa duta.”

9Gani nagkadto ako sa manugtunda kag nagsiling sa iya nga ihatag niya sa akon ang tolon-an nga linokot nga diotay; kag nagsiling sia sa akon, “Kuhaa ini kag kaona; mangin-mapait ini sa imo tiyan, apang sa imo baba matam-is ini subong sang dugus.”

10Kag ginkuha ko ang tolon-an nga linokot nga diotay sa kamut sang manugtunda kag ginkaon ini; matam-is ini sa akon baba subong sang dugus, apang sang nakaon ko ini nagpait ang akon tiyan.

11Kag ginsilingan ako, “Dapat ka magpanagna liwat nahanungud sa madamung katawohan kag pungsud kag hambal kag hari.”

← Chapter 9 Jump to: Chapter 11 →