Revelation 21

Ilonggo (Ang Biblia (1982))

← Chapter 20 Jump to: Chapter 22 →

1Niyan nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat.

2Kag nakita ko ang banwang balaan, ang bag-ong Jerusalem, nga nagapanaug halin sa langit gikan sa Dios, nga naaman subong sang nobya nga napunihan nga sa iya bana;

3kag nabatian ko ang mabaskug nga tingug gikan sa trono nga nagasiling, “Yari karon, ang kayangkayang sang Dios upud sa mga tawo. Magapuyo sia kaupud nila, kag sila mangin-iya katawohan, kag ang Dios gid magaupud sa ila;

4pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa, kay ang nahaunang mga butang nagtaliwan.”

5Kag ang nagalingkod sa trono nagsiling, “Yari karon, ginabag-o ko ang tanan nga butang.” Nagsiling man sia, “Isulat ini, kay ining mga polong masaligan kag matuud.”

6Kag nagsiling sia sa akon, “Ang tanan natuman na! Ako ang Alpha kag ang Omega, ang ginsuguran kag ang katapusan. Ang may kauhaw paimnon ko sa tuburan sang tubig sang kabuhi sa walay bayad.

7Ang nagadaug magapanubli sini, kag ako mangin-iya Dios kag sia mangin-akon anak.

8Apang sa mga matalaw, ang dimatinoohon, ang nadagtaan, sa mga manugpatay, mga makihilawason, mga manugbabaylan, mga diwatahan, kag ang tanan nga butigon, ang ila bahin manginsa linaw nga nagadabdab sing kalayo kag azufre, nga amo ang ikaduhang kamatayon.”

9Niyan nag-abut ang isa sang pito ka manugtunda nga may pito ka yahong nga puno sang pito ka katapusan nga kalalat-an, kag nagpakighambal sia sa akon, nga nagasiling, “Kari ka, ipakita ko sa imo ang Nobya, ang asawa sang Cordero.”

10Kag sa Espiritu gindala niya ako sa daku nga mataas nga bukid, kag ginpakita sa akon ang balaan nga banwang Jerusalem nga nagapanaug halin sa langit gikan sa Dios,

11nga may himaya sang Dios, ang iya kapawa kaangay sa labing bilidhon nga uluyason, nga daw jaspe, nga matin-aw subong sang katya.

12Ini may kuta nga daku kag mataas, nga may napulog duha ka gawang, kag sa mga gawang napulog duha ka manugtunda, kag sa mga gawang nasulat ang mga ngalan sang napulog duha ka kabikahan sang mga anak sang Israel;

13sa sidlangan may tatlo ka gawang, sa aminhan tatlo ka gawang, sa bagatnan tatlo ka gawang, kag sa katundan tatlo ka gawang.

14Kag ang kuta sang banwa may napulog duha ka sadsaran, kag sa ila ang napulog duha ka ngalan sang napulog duha ka pinadala sang Cordero.

15Kag ang nagpakighambal sa akon may inugtakus nga tabun-ak nga bulawan sa pagtakus sang banwa kag mga gawang kag mga kuta sini.

16Ang banwa kasilo, ang iya kalaba subong sang iya kasangkad; kag gintakus niya sang tabun-ak ang banwa, napulog duha ka libo ka estadio; ang iya kalaba kag ang kataas kag ang kasangkad alangay.

17Gintakus man niya ang iya kuta, isa ka gatus kag kap-atan kag apat ka maniko sono sa takus sang tawo, kon sayoron, sang manugtunda.

18Ang kuta jaspe, samtang ang banwa bus-og nga bulawan, matin-aw kaangay sang salaming.

19Ang mga sadsaran sang kuta sang banwa napunihan sang tagsa ka uluyason; ang nahauna jaspe, ang ikaduha zafiro, ang ikatlo calcedonia, ang ikap-at esmeralda,

20ang ikalima sardonica, ang ikan-um cornalina, ang ikapito crisolito, ang ikawalo berilo, ang ikasiam topacio, ang ikapulo crisopraso, ang ikapulog isa jacinto, ang ikapulog duha amatista.

21Kag ang napulog duha ka gawang mga napulog duha ka mutya, ang tagsa sang mga gawang isa ka mutya, kag ang dalan sang banwa bus-og nga bulawan, masilang subong sang salaming.

22Kag wala ako sing nakita nga templo sa sulud sang banwa, kay ang Ginoong Dios nga Makaako kag ang Cordero amo ang iya templo.

23Kag ang banwa walay kinahanglan sang adlaw ukon sang bulan nga magsilak sa iya, kay ang himaya sang Dios amo ang iya kasanag, kag ang iya suga amo ang Cordero.

24Ang mga pungsud magalakat sa kasanag sini; kag ang mga hari sang duta magadala sang ila himaya sa sini,

25kag ang mga gawang sini indi nga mas-a pagtakpan sa adlaw—kag walay gab-i didto;

26dalhon nila ang himaya kag ang dungug sang mga pungsud sa sini.

27Apang walay makasulud sini nga bisan anong dimatinlo, ukon nagahimo sing kangil-aran kag butig, kondi sila lamang nga nasulat sa tolon-an sang kabuhi sang Cordero.

← Chapter 20 Jump to: Chapter 22 →