Revelation 20

Ilonggo (Ang Biblia (1982))

← Chapter 19 Jump to: Chapter 21 →

1Niyan nakita ko ang manugtunda nga nagakunsad gikan sa langit, nga may yabi sang kadadalman kag dakung talikala sa iya kamut.

2Kag gindakup niya ang dragon, yanang dumaan nga man-ug, nga amo ang Yawa kag Satanas, kag gingapus sia sing isa ka libo ka tuig,

3kag gintagbung sia sa kadadalman, kag gintakpan ini kag ginpat-inan sa ibabaw niya, agud nga indi na niya pagdayaan ang mga pungsud, tubtub nga matapus ang isa ka libo ka tuig. Sa tapus sini kinahanglan sia paghubaran sa malip-ot nga tion.

4Niyan nakita ko ang mga trono, kag nagalingkod sa ila sila nga ginhatagan sang paghukom. Nakita ko man ang mga kalag sang mga napamugutan sing olo tungud sang pagpamatuud nila nahanungud kay Jesus kag tungud sang polong sang Dios, kag ang mga wala magsimba sa sapat ukon sa iya larawan kag wala magbaton sang pat-in sini sa ila mga agtang ukon sa ila mga kamut. Nagkabuhi sila liwat kag naghari kaupud kay Cristo sing isa ka libo ka tuig.

5Ang nabilin nga mga patay wala mabuhi liwat tubtub nga matapus ang isa ka libo ka tuig. Ini amo ang nahaunang pagkabanhaw.

6Bulahan kag balaan ang may bahin sa nahaunang pagkabanhaw! Sa ila sini walay gahum ang ikaduhang kamatayon, kondi manginsacerdote sila sang Dios kag ni Cristo, kag magahari sila kaupud niya sing isa ka libo ka tuig.

7Kag sang pagkatapus sang isa ka libo ka tuig, si Satanas hubaran gikan sa iya bilanggoan

8kag magagowa sa pagdaya sa mga pungsud sa apat ka pamusud sang duta, nga amo, ang Gog kag Magog, sa pagtipon sa ila sing tingub nga sa inaway; ang ila kadamuon subong sang balas sang dagat.

9Kag nagsaka sila sa kalaparan sang duta kag ginlibutan nila ang dologan sang mga balaan kag ang hinigugmang banwa; apang naholog ang kalayo gikan sa langit kag naglamon sa ila,

10kag ang yawa nga nagdaya sa ila gintagbung sa linaw nga kalayo kag azufre nga didto ang sapat kag ang manalagna nga dimatuud, kag sakiton sila sa adlaw kag gab-i sa katuigan kag katuigan.

11Niyan nakita ko ang dakung trono nga maputi kag sia nga nagalingkod sini; gikan sa iya atubangan ang duta kag langit nagpalagyo, kag walay nakita nga duug nga sa ila.

12Kag nakita ko ang mga patay, ang dalagku kag magamay, nga nagatindug sa atubangan sang trono, kag ang mga tolon-an ginbukad. Ang isa na man ka tolon-an ginbukad, nga amo ang tolon-an sang kabuhi. Kag ang mga patay ginhukman bangud sa nasulat sa mga tolon-an, sono sa ila binuhatan.

13Kag ginhatag sang dagat ang mga patay nga yara sa iya, ginhatag sang Kamatayon kag Hades ang mga patay nga yara sa ila, kag ginhukman ang tagsa ka tawo sono sa iya binuhatan.

14Niyan ang Kamatayon kag Hades gintagbung sa linaw nga kalayo. Ini amo ang ikaduhang kamatayon, ang linaw nga kalayo;

15kag kon ang bisan sin-o nga wala makita ang iya ngalan nga nasulat sa tolon-an sang kabuhi, gintagbung sia sa linaw nga kalayo.

← Chapter 19 Jump to: Chapter 21 →