Revelation 2

Ilonggo (Ang Biblia (1982))

← Chapter 1 Jump to: Chapter 3 →

1“Sa manugtunda sang iglesia sa Efeso isulat: ‘Ang mga polong sang nagauyat sang pito ka bitoon sa iya kamut nga too, nga nagalakat sa tunga sang pito ka candelero nga bulawan.

2“‘Nakilala ko ang imo mga buhat, ang imo pagpangabudlay kag mapailubon nga pagbatas, kag nga indi ka makaantus sang malaut nga mga tawo apang nakatilaw sang mga nagatawag sang ila kaugalingon nga mga pinadala apang indi sila amo, kag nasapwan sila nga dimatuud;

3nakilala ko nga nagaantus ka sing mapailubon kag nagabatas tungud sa akon ngalan, kag wala ikaw paglapyoa.

4Apang amo ini ang akon pamatok sa imo, nga ginbayaan mo ang imo nahaunang gugma.

5Dumduma niyan kon gikan diin ka mapukan, maghinulsul kag magbuhat sang nahaunang mga buluhaton. Kon indi, makara ako sa imo kag magakuha sang imo candelero sa iya duug, luwas kon maghinulsul ka.

6Apang may imo ka sini, nga ginadumtan mo ang mga buhat sang mga Nicolaita, nga ginadumtan ko man.

7Ang may idulungug, magpamati sia sang ginasiling sang Espiritu sa mga iglesia. Ang nagadaug pakaonon ko sang kahoy sang kabuhi, nga yara sa sulud sang paraiso sang Dios.’

8“Kag sa manugtunda sang iglesia sa Smirna isulat: ‘Ang mga polong sang nahauna kag katapusan, nga napatay kag nabuhi.

9“‘Nakilala ko ang imo mga kangitngitan kag ang imo kaimolan (apang manggaranon ka) kag ang pagpasipala sang mga nagasiling nga sila mga Judio kag indi sila, kondi sila sinagoga ni Satanas.

10Dili pagkahadluki ang dali na lang nimo antuson. Yari karon, ang yawa dali na lang magsulud sang iban sa inyo sa bilanggoan, agud nga matilawan kamo, kag may kangitngitan kamo sing napulo ka adlaw. Magpakatutum ka tubtub sa kamatayon, kag hatagan ko ikaw sang purungpurung sang kabuhi.

11Ang may idulungug, magpamati sang ginasiling sang Espiritu sa mga iglesia. Ang nagadaug indi masamad sang ikaduhang kamatayon.’

12“Kag sa manugtunda sang iglesia sa Pergamo isulat: ‘Ang mga polong sang may espada nga matalum nga duha sing sulab.

13“‘Nakilala ko kon diin ka nagapuyo, diin ang trono ni Satanas; ginahuptan mo ang akon ngalan kag wala mo pag-ipanghiwala ang akon pagtoo bisan sa mga adlaw ni Antipas nga akon saksi nga matutum, nga ginpatay sa tunga ninyo, diin nagapuyo si Satanas.

14Apang may pila ka butang ako batok sa imo: may dira sa imo nga nagahuput sang pagtolon-an ni Balaam, nga nagtudlo kay Balac sa pagbutang sing kasandaran sa atubangan sang mga anak sang Israel, sa pagkaon sang kalan-on nga ginhalad sa mga diosdios kag sa pagkamakihilawason.

15Subong man may imo ka nga nagahuput sang pagtolon-an sang mga Nicolaita.

16Maghinulsul ka niyan. Kon indi, makara ako sa imo sing madali kag awayon ko sila sang espada sang akon baba.

17Ang may idulungug, magpamati sang ginasiling sang Espiritu sa mga iglesia. Ang nagadaug hatagan ko sang mana nga tinago, kag hatagan ko sia sing bato nga maputi, nga sa bato nasulat ang bag-ong ngalan nga walay nakahibalo kondi ang nagabaton sini.’

18“Kag sa manugtunda sang iglesia sa Tiatira isulat: ‘Ang mga polong sang Anak sang Dios, nga ang iya mga mata kaangay sang dabdab sang kalayo, kag ang iya mga tiil kaangay sang ginpahining nga saway.

19“‘Nakilala ko ang imo mga buhat, ang imo gugma kag pagtoo kag pag-alagad kag ang mapailubon nga pagbatas, kag ang imo katapusan nga mga buhat labi pa sa mga nahauna.

20Apang amo ini ang akon pamatok sa imo, nga ginatugutan mo ang babayi nga si Jezebel, nga nagatawag sa iya kaugalingon nga manalagna kag nagatudlo sia kag nagapatalang sa akon mga ulipon sa pagkamakihilawason kag sa pagkaon sang kalan-on nga ginhalad sa mga diosdios.

21Ginhatagan ko sia sing tion sa paghinulsul, apang indi sia buut maghinulsul sang iya pagkamakihilawason.

22Yari karon, pamasakiton ko sia sa higdaan, kag ang mga nagpakighilahi kaupud niya paantuson ko sa dakung kangitngitan, kon indi sila maghinulsul sang mga buhat niya;

23kag pagapatyon ko ang iya mga anak. Kag ang tanan nga iglesia makahibalo nga amo ako ang nagapangusisa sang hunahuna kag tagiposoon, kag hatagan ko ang tagsa sa inyo sono sa inyo mga buhat.

24Apang nagasiling ako sa inyo nga nabilin sa Tiatira, nga wala sining pagtolon-an, nga wala makatoon sang ginatawag sang iban nga madalum nga mga butang ni Satanas, sa inyo nagasiling ako, wala ako nagapapas-an sa inyo sing iban nga lulan;

25lamang hupti ninyo ang yara sa inyo, tubtub nga ako magkari.

26Ang nagadaug kag ang nagabantay sang akon mga buhat tubtub sa katapusan, sa iya ihatag ko ang pagbulut-an sa kapungsuran,

27kag magadumala sia sa ila sa bilogon nga salsalon, subong nga ang mga suludlan sang maninihon ginadugmok, subong nga ako man nakabaton sing gahum sa akon Amay;

28kag hatagan ko sia sang kabugwason.

29Ang may idulungug, magpamati sang ginasiling sang Espiritu sa mga iglesia.’

← Chapter 1 Jump to: Chapter 3 →