Revelation 14

Ilonggo (Ang Biblia (1982))

← Chapter 13 Jump to: Chapter 15 →

1Niyan nagtolok ako, kag yari karon, ang Cordero nagatindug sa Bukid nga Sion, kag kaupud niya ang isa ka gatus kag kap-atan kag apat ka libo nga may ila sang iya ngalan kag sang ngalan sang iya Amay nga nasulat sa ila mga agtang.

2Kag nabatian ko ang tingug gikan sa langit subong sang tonog sang madamung tubig kag subong sang tonog sang mabaskug nga daguub; ang tingug nga nabatian ko subong sang tonog sang mga manug-arpa nga nagakutingkuting sang ila mga arpa,

3kag nagaamba sila sing bag-ong ambahanon sa atubangan sang trono kag sa atubangan sang apat ka sapat nga buhi kag sang mga tigulang. Walay tawo nga makahibalo sang ambahanon kondi ang isa ka gatus kag kap-atan kag apat ka libo nga tinubus gikan sa duta.

4Ini sila amo ang wala magdagta sang ila kaugalingon sa mga babayi, kay mga putli sila; ini amo ang nagasonod sa Cordero bisan diin sia nagakadto; ini mga tinubus gikan sa mga tawo subong nga nahaunang mga bunga nga sa Dios kag sa Cordero,

5kag walay butig nga nasapwan sa ila baba, kay sila walay dagta.

6Niyan nakita ko ang isa na man ka manugtunda nga nagalupad sa tunga sang langit, nga may maayong balita nga dayon nga ibantala sa mga nagapuyo sa duta, sa tagsa ka pungsud kag kabikahan kag hambal kag katawohan;

7kag nagsiling sia sa mabaskug nga tingug, “Kahadluki ninyo ang Dios kag hatagi sia sing himaya, kay nag-abut na ang takna sang iya paghukom; kag simbaha sia nga naghimo sang langit kag duta, sang dagat kag mga tuburan sang tubig.”

8Ang ikaduha na man nga manugtunda nagsonod, nga nagasiling, “Napukan, napukan ang dakung Babilonia, nga nagpainum sang tanan nga pungsud sang alak sang iya mahigko nga pagkamakihilawason.”

9Kag ang ikatlo na man nga manugtunda nagsonod, nga nagasiling sa mabaskug nga tingug, “Kon ang bisan sin-o nagasimba sa sapat kag sa larawan sini, kag nagabaton sing pat-in sa iya agtang ukon sa iya kamut,

10sia man magainum sang alak sang kasingkal sang Dios, nga gin-aman nga walay simbug sa tagayan sang iya kaakig, kag sakiton sia sa kalayo kag azufre sa atubangan sang mga manugtunda nga balaan kag sa atubangan sang Cordero.

11Kag ang aso sang ila kasakit nagatub-ok sa katuigan kag katuigan; kag wala sila sing pahuway sa adlaw ukon gab-i, sila nga nagasimba sa sapat kag sa larawan sini, kag ang bisan sin-o nga nagabaton sang pat-in sang iya ngalan.”

12Yari ang panawag nga sa pagpailub sang mga balaan, sila nga nagabantay sang mga sogo sang Dios kag sang pagtoo ni Jesus.

13Kag nabatian ko ang tingug gikan sa langit nga nagasiling, “Isulat mo: Bulahan ang mga patay nga nagakamatay kutub karon sa Ginoo.” “Bulahan sa pagkamatuud,” nagasiling ang Espiritu, “agud nga magpahuway sila sa ila mga pagpangabudlay, kay ang ila mga binuhatan nagasonod sa ila!”

14Niyan nagtolok ako, kag yari karon, ang panganud nga maputi, kag sa ibabaw sang panganud nagalingkod ang isa nga kaangay sang anak sang tawo, nga may purungpurung nga bulawan sa iya olo, kag galab nga matalum sa iya kamut.

15Kag ang isa na man ka manugtunda naggowa sa templo, nga nagasinggit sa mabaskug nga tingug sa iya nga nagalingkod sa panganud, “Gamita ang imo galab, kag mag-ani ka, kay nag-abut na ang takna sang pag-ani, kay ang alanyon sang duta luntay na.”

16Gani sia nga nagalingkod sa panganud naghabyog sang iya galab sa duta, kag gin-ani ang duta.

17Kag ang isa na man ka manugtunda naggowa sa templo nga didto sa langit, kag sia man may galab nga matalum.

18Niyan ang isa na man ka manugtunda naggowa gikan sa halaran, sia nga may gahum sa kalayo, kag nagtawag sia sa mabaskug nga tingug sa iya nga may matalum nga galab, “Gamita ang imo galab nga matalum, kag gutlaba ang mga pinongpong sang uvas sang duta, kay loto na ang iya mga uvas.”

19Gani ginhabyog sang manugtunda ang iya galab sa duta kag gintipon ang mga uvas sang duta, kag ginpilak niya ini sa dakung linasan sang kasingkal sang Dios;

20kag ang linasan sang uvas ginlinasan sa gowa sang banwa, kag nag-ilig ang dugo gikan sa linasan, tubtub sa busal sang kabayo sa kataason, sa kalayoon nga isa ka libo kag anum ka gatus ka estadio.

← Chapter 13 Jump to: Chapter 15 →