Revelation 15

Ilonggo (Ang Biblia (1982))

← Chapter 14 Jump to: Chapter 16 →

1Niyan nakita ko ang isa na man ka tanda sa langit, daku kag makatilingala, pito ka manugtunda nga may pito ka kalalat-an, nga mga kahingapsan, kay sa ila natapus ang kasingkal sang Dios.

2Kag nakita ko ang daw dagat nga salaming nga nasimbugan sing kalayo, kag ang mga nagdaug sang sapat kag sang iya larawan kag sang numero sang iya ngalan, nga nagatindug sa dagat nga salaming nga may mga arpa sang Dios sa ila mga kamut.

3Kag nagaamba sila sang ambahanon ni Moises, nga ulipon sang Dios, kag sang ambahanon sang Cordero, nga nagasiling, “Dalagku kag kalatingalahan ang imo mga binuhatan, O Ginoong Dios nga Makaako! Matarung kag matuud ang imo mga dalanon, O Hari sang katuigan!

4Sin-o bala ang indi mahadluk kag indi maghimaya sang imo ngalan, O Ginoo? Kay ikaw lamang ang balaan. Ang tanan nga pungsud magakari kag magasimba sa imo, kay ang imo mga paghukom napahayag.”

5Sa tapus sini nagtolok ako, kag ang templo sang kayangkayang sang pagpamatuud sa langit nabuksan,

6kag naggowa sa templo ang pito ka manugtunda nga may pito ka kalalat-an, nga napanaptan sing lino nga masili, lubus kag nawagkusan ang ila mga dughan sing mga wagkus nga bulawan.

7Kag ang isa sang apat ka sapat nga buhi naghatag sa pito ka manugtunda sing pito ka yahong nga bulawan nga puno sang kasingkal sang Dios nga nagakabuhi sa katuigan kag katuigan;

8kag ang templo napuno sang aso gikan sa himaya sang Dios kag sa iya gahum, kag walay bisan sin-o nga makasarang sa pagsulud sa templo tubtub nga matapus ang pito ka kalalat-an sang pito ka manugtunda.

← Chapter 14 Jump to: Chapter 16 →