Revelation 9

Ilonggo (Ang Biblia (1982))

← Chapter 8 Jump to: Chapter 10 →

1Kag ang ikalima nga manugtunda nagpatonog sang iya budyong, kag nakita ko ang bitoon gikan sa langit nga naholog sa duta, kag ginhatag sa iya ang yabi sang boho sang kadadalman;

2ginbuksan niya ang boho sang kadadalman, kag nagtub-ok ang aso gikan sa boho subong sang aso sang dakung horno, kag ang adlaw kag ang kahawaan nagdulum bangud sang aso sang boho.

3Niyan gikan sa aso naggowa ang mga apan sa ibabaw sang duta, kag ginhatagan sila sing gahum subong sa gahum sang mga iwiiwi sang duta;

4ginsilingan sila nga indi nila pagsamaron ang hilamon sang duta ukon bisan ano nga butang nga hilaw kag bisan ano nga kahoy, kondi yadtong mga tawo lamang nga walay pat-in sang Dios sa ila mga agtang;

5gintugutan sila sa pagsakit sa ila sing lima ka bulan, apang indi sa pagpatay sa ila, kag ang pagsakit nila subong sang pagsakit sang iwiiwi, kon magkutut ini sa tawo.

6Kag sa sadtong mga adlaw ang mga tawo magapangita sang kamatayon kag indi makita ini; magahandum sila nga mapatay, kag ang kamatayon nagapalagyo gikan sa ila.

7Ang dagway sang mga apan kaangay sang mga kabayo nga nahanda sa inaway; sa ila mga olo may daw mga purungpurung nga bulawan; ang ila mga nawung subong sang mga nawung sang tawo,

8ang ila bohok subong sang bohok sang mga babayi, kag ang ila mga ngipon subong sang ila sang mga leon;

9may mga dughan sila nga daw mga limbutong nga salsalon, kag ang lagapak sang ila mga pakpak subong sang kagahud sang madamung kangga nga may mga kabayo nga nagadalagan sa pag-away;

10may mga ikog sila kaangay sang mga iwiiwi, kag mga sudlot, kag sa ila mga ikog yara ang ila gahum sa pagsamad sa mga tawo sing lima ka bulan.

11May ila sila subong nga hari ang manugtunda sang kadadalman; ang iya ngalan sa Hebreo si Abaddon, kag sa Griego si Apolion.

12Ang nahaunang kailo nagligad; yari karon, duha pa ka kailo ang magaabut.

13Niyan ang ikan-um nga manugtunda nagpatonog sang iya budyong, kag nabatian ko ang tingug gikan sa apat ka sungay sang halaran nga bulawan nga yara sa atubangan sang Dios,

14nga nagasiling sa ikan-um nga manugtunda nga may budyong, “Hubari ang apat ka manugtunda nga nagapus sa dakung suba nga Eufrates.”

15Gani ginhubaran ang apat ka manugtunda, nga naaman sa takna, sa adlaw, sa bulan, kag sa tuig, sa pagpatay sang ikatlong bahin sang mga tawo.

16Ang kadamuon sang mga hangaway nga manugkabayo duha ka gatus ka milyon; nabatian ko ang kadamuon nila.

17Kag sa among bagay nakita ko ang mga kabayo sa palanan-awon nakon: ang mga nagsakay sa ila may mga limbutong nga may duag sang kalayo kag sang jacinto kag sang azufre, kag ang mga olo sang mga kabayo subong sang mga olo sang mga leon, kag naggowa sa mga baba nila ang kalayo kag aso kag azufre.

18Ang ikatlong bahin sang mga tawo ginpatay paagi sining tatlo ka kalalat-an, sang kalayo kag aso kag azufre nga nagagowa sa ila mga baba.

19Kay ang gahum sang mga kabayo yara sa ila mga baba kag sa ila mga ikog; ang ila mga ikog kaangay sa mga man-ug, nga may mga olo, kag paagi sini nagapangsamad sila.

20Ang nabilin sang katawohan, nga wala mapatay sining mga kalalat-an, wala maghinulsul sang mga buhat sang ila mga kamut ukon nag-untat sa pagsimba sa mga yawa kag sa mga diosdios nga bulawan kag pilak kag saway kag bato kag kahoy, nga indi makakita ukon makabati ukon makalakat;

21kag wala sila maghinulsul sang ila mga pagpamatay ukon sang ila mga babaylan ukon sang ila pagkamakihilawason ukon sang ila mga pagpangawat.

← Chapter 8 Jump to: Chapter 10 →