Revelation 16

Ilonggo (Ang Biblia (1982))

← Chapter 15 Jump to: Chapter 17 →

1Niyan nabatian ko ang mabaskug nga tingug gikan sa templo nga nagasiling sa pito ka manugtunda, “Lakat kamo kag iula ninyo ang pito ka yahong sang kasingkal sang Dios sa duta.”

2Gani naglakat ang nahaunang manugtunda kag nag-ula sang iya yahong sa duta, kag nag-abut ang mga hubag nga malaut kag malala sa mga tawo nga may pat-in sang sapat kag nagsimba sa iya larawan.

3Ang ikaduhang manugtunda nag-ula sang iya yahong sa dagat, kag nahimo ini nga dugo subong sang iya sang tawong patay, kag nagkamatay ang tagsa ka butang nga buhi nga yara sa dagat.

4Ang ikatlong manugtunda nag-ula sang iya yahong sa mga suba kag sa mga tuburan sang tubig kag nahimo sila nga dugo.

5Kag nabatian ko ang manugtunda sang tubig nga nagasiling, “Matarung ka sa sining mga paghukom nimo, ikaw nga amo karon kag amo anay, O Balaan.

6Kay gin-ula sang mga tawo ang dugo sang mga balaan kag mga manalagna, kag ginpainum mo sila sing dugo. Ini nagakaigo sa ila!”

7Kag nabatian ko ang halaran nga nagasiling, “Hoo, Ginoong Dios nga Makaako, matuud kag matarung ang imo mga paghukom!”

8Ang ikap-at nga manugtunda nag-ula sang iya yahong sa adlaw, kag ginhatag sa iya ang pagpaso sang mga tawo sa kalayo;

9nagkapaso ang mga tawo sa dakung kainit, kag ginpakamalaut nila ang ngalan sang Dios nga may gahum sa sining mga kalalat-an, kag wala sila maghinulsul kag maghatag sa iya sing himaya.

10Ang ikalimang manugtunda nag-ula sang iya yahong sa trono sang sapat, kag ang iya ginharian nagdulum; gin-usap sang mga tawo ang ila mga dila sa kasakit

11kag ginpakamalaut nila ang Dios sang langit bangud sang ila kasakit kag mga hubag, kag wala sila maghinulsul sang ila mga binuhatan.

12Ang ikan-um nga manugtunda nag-ula sang iya yahong sa dakung suba nga Eufrates, kag ang tubig sini nahubas, sa pag-aman sang dalan tungud sa mga hari gikan sa sidlangan.

13Kag nakita ko, nga nagagowa sa baba sang dragon kag sa baba sang sapat kag sa baba sang dimatuud nga manalagna, ang tatlo ka espiritu nga mahigko nga daw mga paka;

14kay mga espiritu sila sang mga yawa, nga nagahimo sing mga tanda, nga nagakadto sa mga hari sa bug-os nga kalibutan, sa pagtipon sa ila sing tingub sa inaway sang dakung adlaw sang Dios nga Makaako.

15(“Yari karon, nagakari ako subong sang makawat! Bulahan ang nagamata, nga nagatipig sang iya mga panapton agud nga indi sia maglakat nga hublas kag makita nga hubo!”)

16Kag gintipon nila sila sing tingub sa duug nga ginatawag sa Hebreo Armagedon.

17Ang ikapitong manugtunda nag-ula sang iya yahong sa kahawaan, kag naggowa ang mabaskug nga tingug sa templo, gikan sa trono, nga nagasiling, “Nahimo na!”

18Kag may mga idlab sang kilat, mabaskug nga mga kagahud, mga tonog sang daguub, kag dakung linog nga wala pa gid sing subong kutub nga may mga tawo sa duta, kay daku gid yadtong linog.

19Ang dakung banwa nabahin sing tatlo, kag ang mga banwa sang mga pungsud napukan, kag ang dakung Babilonia nadumduman sang Dios, sa pagpainum sa iya sang tagayan sang kapintas sang iya kasingkal.

20Kag ang tagsa ka pulo nagpalagyo, kag wala makit-i ang kabukiran;

21kag naholog gikan sa langit sa mga tawo ang dakung ulan nga hielo, nga ang binato subong sang isa ka talanton, tubtub nga ginpakamalaut sang mga tawo ang Dios bangud sang kalalat-an sang ulan nga hielo, kay tama ka makahaladluk yadtong kalalat-an.

← Chapter 15 Jump to: Chapter 17 →