Revelation 6

Ilonggo (Ang Biblia (1982))

← Chapter 5 Jump to: Chapter 7 →

1Karon nakita ko ang paghukas sang Cordero sang isa sang pito ka pat-in, kag nabatian ko ang isa sang apat ka sapat nga buhi nga nagasiling sa tingug nga subong sang daguub, “Kari!”

2Kag nakita ko, kag yari karon, ang kabayo nga maputi, kag ang nagasakay sa iya may pana; kag ginhatagan sia sing purungpurung, kag naglakat sia nga nagapangdaug kag sa pagdaug.

3Sang paghukas niya sang ikaduha nga pat-in, nabatian ko ang ikaduha nga sapat nga buhi nga nagasiling, “Kari!”

4Kag naggowa ang isa na man ka kabayo nga pula nga luto; ang nagasakay sa iya gintugutan sa pagkuha sang paghidait sa duta, agud nga ang mga tawo magpatyanay; kag ginhatagan sia sing dakung espada.

5Sang paghukas niya sang ikatlo nga pat-in, nabatian ko ang ikatlo nga sapat nga buhi nga nagasiling, “Kari!” Kag nakita ko, kag yari karon, ang kabayo nga maitum, kag ang nagasakay sa sini may timbangan sa iya kamut;

6kag nabatian ko ang daw tingug sa tunga sang apat ka sapat nga buhi nga nagasiling, “Isa ka sukub sang trigo tungud sa isa ka denario, kag tatlo ka sukub sang sebada tungud sa isa ka denario; apang ang lana kag ang alak dili mo pagtistisan!”

7Sang paghukas niya sang ikap-at nga pat-in, nabatian ko ang tingug sang ikap-at nga sapat nga buhi nga nagasiling, “Kari!”

8Kag nakita ko, kag yari karon, ang kabayo nga maluspad, kag ang nagasakay sa sini ginahingalanan Kamatayon, kag ang Hades nagasonod sa iya; kag ginhatagan sila sing pagbulut-an sa ikap-at nga bahin sang duta, sa pagpamatay sa espada kag sa tiggulutum kag sa kamatay kag paagi sa mga sapat nga mapintas sang duta.

9Sang paghukas niya sang ikalima nga pat-in, nakita ko sa idalum sang halaran ang mga kalag sang mga ginpamatay tungud sa polong sang Dios kag tungud sa pagpamatuud nga ila gin-antus;

10nagsinggit sila sa mabaskug nga tingug, “O Gamhanan nga Ginoo, balaan kag matuud, tubtub pa bala san-o nga hukman mo kag balusan ang amon dugo sa mga nagapuyo sa duta?”

11Niyan ginhatagan ang tagsa sa ila sing malaba nga panapton nga maputi kag ginsilingan nga magpahuway sila anay sing diotay nga tion, tubtub nga matuman ang kadamuon sang ila masigkaulipon kag mga kauturan, nga patyon subong sa ila.

12Sang paghukas niya sang ikan-um nga pat-in, nagtolok ako, kag yari karon, may dakung linog; kag ang adlaw nag-itum subong sang sako nga panapton, kag ang ugsad nga bulan nanginsubong sang dugo,

13kag ang mga bitoon sang langit naholog sa duta subong sang higuera nga nagataktak sang iya mga linghod nga higos kon ginauyug sang mabaskug nga hangin;

14ang langit nagtaliwan subong sang tolon-an nga ginalokot, kag ang tagsa ka bukid kag pulo ginhalin gikan sa iya duug.

15Niyan ang mga hari sang duta kag ang mga kadalagkuan kag ang mga heneral kag ang mga manggaranon kag ang mga makusug, kag ang tagsa ka ulipon kag hinilway nagpanago sa mga lungib kag sa mga igang sang kabukiran,

16nga nagasiling sa mga bukid kag mga igang, “Tiphag kamo sa amon kag tagoa kami sa nawung sang nagalingkod sa trono, kag sa kasingkal sang Cordero;

17kay nag-abut ang dakung adlaw sang ila kasingkal, kag sin-o bala ang sarang makabatas sini?”

← Chapter 5 Jump to: Chapter 7 →