1 Kings 10

Kamba (Mbivilia) 1956

← Chapter 9 Jump to: Chapter 11 →

1Na yĩla mũsumbĩ mũndũ mũka wa ku Sieva wewie nguma ya Solomoni ũndũ wa syĩtwa ya Yeova, ooka kũmũtata na mokũlyo me vinya.

2Na ooka Yelusaleme e na ũkondo mũnene mũno, e na ngamĩle ila ikuĩte mĩtĩ ĩla ĩnyungaa nesa, na thaavu mwingĩ mũno, na tũvila twĩ thooa mũnene; na yĩla wavikie kwa Solomoni, aneena nake ũvoo w’onthe ũla waĩ ngoonĩ yake.

3Na Solomoni amũsũngĩa mokũlyo make onthe: vati ũndũ waamwaĩa mũsumbĩ ũla ũtaamũtavya.

4Na yĩla mũsumbĩ mũndũ mũka wa ku Sieva wonie ũĩ w’onthe wa Solomoni, na nyũmba ĩla wakie,

5na lĩu ũla waĩsawa mesanĩ yake, na mwaĩkalo ma athũkũmi make, na ũngamĩi wa athũkũmi make, na ngũa syoo, na anengani make ma mbinyu, na wambatĩlo wake ũla wambataa naw’o nyũmbanĩ ya Yeova; veva wake waaa vinya.

6Na amwĩa mũsumbĩ, Ũvoo ũla neewie nĩ nthĩ yakwa mwene, ũndũ wa meko maku na ũndũ wa ũĩ waku, waĩ wa w’o.

7Ĩndĩ ndyaaĩtĩkila i ndeto, kũvika nĩnooka, na metho makwa nĩmawonete: na, sisya, ndyaatavw’a nyunzu; ũĩ waku na kũathimĩka kwaku nĩkũvĩtũkĩte nguma ĩla neewie.

8Andũ maku nĩ atanu, na athũkũmi aa maku nĩ atanu, ala maũngamaa ĩvinda yonthe mbee waku, na mew’aa ũĩ waku.

9Yeova Ngai waku nataĩwe, ũla wendeew’e nue, akwĩkalye kĩvĩlanĩ kya ũsumbĩ kya Isilaeli: nĩkwĩthĩwa Yeova nĩwendie Isilaeli tene na tene, kwondũ wa ũu akũtw’ĩkĩthya mũsumbĩ, wĩkae ũsili wa katĩ na ũlũngalu.

10Na amũnenga mũsumbĩ talendi ĩana na mĩongo ĩlĩ sya thaavu, na mĩtĩ ĩla ĩnyungaa nesa mingĩ mũno, na tũvila twĩ thooa mũnene: kũtyaaetwe ĩngĩ mĩtĩ ĩla ĩnyungaa nesa yingĩvĩte ta ĩsu ĩla mũsumbĩ mũndũ mũka wa ku Sieva wanengie mũsumbĩ Solomoni.

11O na kĩkundi kya ngalawa sya Ilamu, ila syaetie thaavu kumya nthĩ ya Ovilu, nĩkyaetie kuma Ovilu mĩtĩ ya mĩsandali mingĩ mũno na tũvila twĩ thooa mũnene.

12Na mũsumbĩ aseũvĩthya ituĩ na mĩsandali ĩsu kwondũ wa nyũmba ya Yeova, na kwondũ wa nyũmba ya mũsumbĩ, o na mbeve na inanda sya aini: kũtyaaetwe mĩsandali ĩilyĩ ta ĩsu, o na kũtyaaoneka kũvika ũmũnthĩ.

13Na mũsumbĩ Solomoni anenga mũsumbĩ mũndũ mũka wa ku Sieva kyonthe kĩla wendie, o kĩla wetisye, eka ila Solomoni wamũnengie kuma ũlaunĩ wake wa kĩũsumbĩ. Na ĩndĩ eetulũla na asyoka nthĩ yake mwene, we na athũkũmi make.

14Na ĩndĩ ũito wa thaavu ũla waeteawe Solomoni mwaka ũmwe waĩ talendi maana thanthatũ na mĩongo thanthatũ na thanthatũ sya thaavu,

15eka ũla waeteawe nĩ atandĩthya, na ũtandĩthyo wa athoosya, na wa asumbĩ onthe ma nthĩ ya Alavu, na wa makavana ma ĩ nthĩ.

16Na mũsumbĩ Solomoni aseũvĩthya ngao maana elĩ sya thaavu mũtue; sekeli maana thanthatũ sya thaavu syaĩ sya ngao ĩmwe.

17Na aseũvĩthya tũkalo maana atatũ twa thaavu mũtue; latili itatũ sya thaavu syaĩ sya kakalo kamwe: na mũsumbĩ asia nyũmbanĩ ya mũtitũ wa Levanoni.

18O na ĩngĩ mũsumbĩ aseũvĩthya na maeo ma nzou kĩvĩla kĩnene kya ũsumbĩ, na akĩvw’ĩka thaavu mũtheu mũno mbee.

19Kwaĩ matambya thanthatũ ma kwambata kĩvĩlanĩ kyu kya ũsumbĩ, na mũthya wa ĩũlũ wa kĩvĩla kyu waĩ mũkumbe ngalĩ ya mũongonĩ; na kwaĩ kw’oko ngalĩ ĩno na ngalĩ ĩno vakuvĩ na vandũ va kwĩkalĩla, na mĩnyambũ ĩlĩ ĩũngamĩte ũtee wa moko asu.

20Na mĩnyambũ ĩkũmi na ĩlĩ yaũngeme vo ngalĩ ĩno na ngalĩ ĩla ĩngĩ matambyanĩ asu thanthatũ: kũtyaĩ kĩndũ kyaseũvĩtw’e ũu ũsumbĩnĩ o na wĩva.

21Na mĩio yonthe ya mũsumbĩ Solomoni ya kũnyw’a nayo yaĩ ya thaavu, na mĩio yonthe ya nyũmba ya mũtitũ wa Levanoni yaĩ ya thaavu mũtheu: vatyaĩ ũmwe wa vetha; na ũu ndwaatalwa ta ũndũ mĩthenyanĩ ya Solomoni.

22Nũndũ mũsumbĩ aĩ na kĩkundi kya ngalawa sya Talisisi ũkanganĩ vamwe na kĩkundi kya ngalawa sya Ilamu: kĩla myaka ĩtatũ kĩkundi kya ngalawa sya Talisisi kĩisyoka ĩmwe, ikĩete thaavu, na vetha, na maeo ma nzou, na sokwe, na tausi.

23Na ĩndĩ mũsumbĩ Solomoni amakĩla asumbĩ onthe ma nthĩ na ũthwii na ũĩ.

24Na nthĩ yonthe yenda kũvika kwa Solomoni, yĩw’e ũĩ wake, ũla Ngai wekĩie ngoonĩ yake.

25Na maete kĩla mũndũ mũvothi wake, mĩio ya vetha, na mĩio ya thaavu, na ngũa, na mĩio ya kaũ, na mĩtĩ ĩla ĩnyungaa nesa, na mbalasi, na nyũmbũ, syĩanĩe kĩla mwaka.

26Na Solomoni oomban’ya makasya ma kaũ na andũ ma kũtũlaa mbalasi: na aĩ na makasya ngili na maana ana, na andũ ma ũtũlaa mbalasi ngili ĩkũmi na ilĩ, ala wamaiĩte ndũanĩ sya makasya, na vala ve mũsumbĩ Yelusaleme.

27Na mũsumbĩ atw’ĩkĩthya vetha weethĩwa ta mavia ku Yelusaleme ũndũ wa kwingĩva, o na mĩkũũ yeethĩwa ta mĩkũyũ ĩla yĩ nthĩ ndindimalu.

28Na mbalasi ila Solomoni waĩ nasyo syaetawe kuma Misili; na atandĩthya ma mũsumbĩ manengawe ndĩthya, ndĩthya, kĩla ndĩthya kwa thooa wayo.

29Na ĩkasya yambatw’a kuma Misili ya thooa wa sekeli maana thanthatũ sya vetha, na mbalasi ya sekeli ĩana na mĩongo ĩtano; na o ta ũu mamaumĩasya asumbĩ onthe ma Aititi, na asumbĩ ma Silia, na moko moo.

← Chapter 9 Jump to: Chapter 11 →