1 Kings 13

Kamba (Mbivilia) 1956

← Chapter 12 Jump to: Chapter 14 →

1Na, sisya, kwooka mũndũ wa Ngai kuma Yuta avike Mbethi‐eli kwondũ wa ndeto ya Yeova: na Yelovoamu aũngyĩ vakuvĩ na kĩthembeo atoeesye ũvani.

2Na atavya kĩthembeo na wasya mũnene kwondũ wa ndeto ya Yeova, na asya, We, kĩthembeo, kĩthembeo, ũũ nĩw’o Yeova ũnũkwasya: Sisya, kavĩsĩ kakasyawa nyũmbanĩ ya Ndaviti, syĩtwa yako kakeetwa Yosia; na ĩũlũ waku kakathemba athembi ma kũla kũndũ kũtũlu ala matoeeasya ũvani ĩũlũ waku, na makavĩvĩsya mavĩndĩ ma andũ ĩũlũ waku.

3Na anengane wonan’yo mũthenya o ũsu, akyasya, Ũũ nĩw’o wonan’yo ũla Yeova ũneenete: Sisyai, kĩthembeo kĩkaatũkana, na mũu ũla wĩ ĩũlũ wakyo ũketĩka.

4Na kweethĩwa, yĩla mũsumbĩ wewie ndeto sya ũ mũndũ wa Ngai, ila wakĩtavĩsye kĩthembeo ku Mbethi‐eli, Yelovoamu atambũũkya kw’oko kwake e kĩthembeonĩ, akyasya, Mũkwatei. Na kw’oko kwake, kũla wamũtambũũkĩsye, kwooma, ũndũ ũtatonya kũkũtũnga ĩngĩ.

5O na kĩthembeo kyaatũkana, na mũu wetĩka kuma kĩthembeonĩ, kwĩanana na wonan’yo ũla mũndũ wa Ngai wanengane kwondũ wa ndeto ya Yeova.

6Na mũsumbĩ asũngĩa na amwĩa mũndũ wa Ngai, Ĩsũvane yu ũseo wa Yeova Ngai waku, noĩmboyea, kw’oko kwakwa kũnzyokee ĩngĩ. Na ũla mũndũ wa Ngai amwĩsũva Yeova, na kw’oko kwa mũsumbĩ kwamũsyokea, na kwekala ũndũ kwĩĩilyĩ mbee.

7Na mũsumbĩ amwĩa mũndũ wa Ngai, Ũka twĩnũkan’ye, ũkevuũkye, na ngakũnenga mũthĩnzĩo.

8Na ũla mũndũ wa Ngai amwĩa mũsumbĩ, O na ũkanenga nyunzu ya nyũmba yaku, ndilika naku, o na ndiya lĩu kana kũnyw’a manzĩ vandũ vaa;

9nũndũ now’o nĩaĩĩtwe nĩ ndeto ya Yeova, ĩkĩmbĩa, Ndũkaye lĩu, kana kũnyw’a manzĩ, o na ndũkasyoke na nzĩa ĩla ũendie nayo.

10Kwondũ wa ũu athi na nzĩa ĩngĩ, na ndaasyoka na nzĩa ĩla wũkie Mbethi‐eli nayo.

11Na ĩndĩ ku Mbethi‐eli kwatwĩe mwathani mũkũũ; na ũmwe wa ana make athi na amũtavya mawĩa onthe ala mũndũ wa Ngai wĩkie mũthenya ũsu Mbethi‐eli: ndeto ila ũneenie na mũsumbĩ, o na isu mamũtavya ĩthe woo.

12Na ĩthe woo amakũlya, Aendie na nzĩa yĩva? Na ĩndĩ ana make nĩmoonete nzĩa ĩla mũndũ wa Ngai ũla ũnaumĩte Yuta ũendie nayo.

13Na amea ana make, Ndandĩkĩai ĩng’oi. Na ĩndĩ mamũtandĩkĩa ĩng’oi; na ayĩtũla.

14Na amũatĩĩa ũla mũndũ wa Ngai, na amwĩthĩa ekalĩte nthĩ ĩtina wa mũtĩ wa mwaloni; na amũkũlya, Nue mũndũ wa Ngai ũla ũnaumĩte Yuta? Nake asya, Ninyie.

15Nĩvo ĩndĩ wamwĩie, Ũka tũende kwakwa, ũye lĩu.

16Nake asya, Ndi na ũthei wa kũsyokan’ya naku, kana kũlika kwaku; o na ndiya lĩu kana kũnyusanĩa manzĩ naku vandũ vaa:

17nũndũ nataviw’e nĩ ndeto ya Yeova, Ndũkaye lĩu kana kũnyw’a manzĩ kw’o, kana kwĩthyũũa ũsyoke na nzĩa ĩla ũendie nayo.

18Na amwĩa, Nyie o nakwa nĩ mwathani o taku; na mũlaĩka aneenie nakwa na ndeto ya Yeova, akĩmbĩa, Mũtũngĩthye mũsyokan’ye wĩ nake nyũmbanĩ yaku, nĩ kana aye lĩu na kũnyw’a manzĩ. Ĩndĩ amũtavisye ũvũngũ.

19Na ĩndĩ asyokan’ya nake, na aya lĩu nyũmbanĩ yake, na anyw’a manzĩ.

20Na kweethĩwa, yĩla mailyĩ mesanĩ, ndeto ya Yeova yamũkĩa mwathani ũla wamũtũngĩthisye;

21na aneena na wasya mũnene na mũndũ wa Ngai ũla ũnaumĩte Yuta, akĩmwĩa, Ũũ nĩw’o Yeova ũnũkwasya, Nĩkwĩthĩwa ũleile kwĩw’a kanyw’a wa Yeova, na ndũnasũvĩa mwĩao ũla Yeova Ngai waku ũnakwĩaĩe,

22ĩndĩ wasyoka, na waya lĩu na wanyw’a manzĩ vandũ vala ũnakũtavisye ũndũ wa vo, Ndũkaye lĩu, na ndũkanyw’e manzĩ; kimba kyaku kĩtikathikwa ngunganĩ ya aaĩthe maku vala vathikawa akw’ũ.

23Na kweethĩwa ĩtina wa maya lĩu, na manyw’a, atandĩka ĩng’oi kwondũ wa mwathani, o mwathani ũla ũmũtũngĩthisye.

24Na yĩla waminie kũthi, mũnyambũ wakomana nake nzĩanĩ, na wamũaa: na kimba kyake kyavalũkw’a nzĩanĩ, na ĩng’oi yaũngama vakuvĩ nakyo; na mũnyambũ naw’o waũngama vakuvĩ na kimba.

25Na, sisya, andũ mavĩtĩla vo, na moona kimba kĩvalũkĩtw’e nzĩanĩ, na mũnyambũ ũũngamĩte ũtee wa kimba; na mooka na matavan’ya ũũ ndũanĩ vala watwĩe ũla mwathani mũkũũ.

26Na yĩla mwathani ũla ũmũtũngithisye nzĩanĩ wewie ũu, asya, Nĩ ũla mũndũ wa Ngai, ũla ũleile kwĩw’a kanyw’a wa Yeova: kwondũ wa ũu Yeova nũmũnenganie kwa mũnyambũ, ũla ũmũvũnyangie, na wamũaa, kwĩanana na ndeto ya Yeova, ĩla ũnaneenie nake.

27Na aneena na ana make, akĩmea, Ndandĩkĩai ĩng’oi. Na mayĩtandĩka.

28Na athi na eethĩa kimba kyake kĩvalũkĩtw’e nzĩanĩ, na yĩla ĩng’oi na mũnyambũ iũngamĩte ũtee wa kimba: mũnyambũ ndwĩĩ ũnaya kimba, kana kũvũnyanga ĩng’oi.

29Na ũla mwathani oosa kimba kya ũ mũndũ wa Ngai, na akĩtũlya ĩng’oinĩ, na akĩtũnga; na mwathani mũkũũ avika ndũanĩ yake, amũmetee, na kũmũthika.

30Na aia kimba kyake ngunganĩ yake mwene vala vathikawa akw’ũ; na mamũmetea, makyasya, Ĩiaa, mwana‐a‐asa!

31Na kweethĩwa, ĩtina wa kũmũthika, aneena na ana make, akĩmea, Nakw’a, mwĩnthika nyie ngunganĩ vala vathikawa akw’ũ vala mũndũ wa Ngai ũthikĩtwe; mwĩia mavĩndĩ makwa ũtee wa mavĩndĩ make.

32Nũndũ ndeto ila ũkĩneeneie kĩthembeo ku Mbethi‐eli kwondũ wa ndeto ya Yeova, o na nyũmba syonthe sya kũndũ kũtũlu kũla kwĩ ndũanĩ sya Samalia, ikeanĩw’a vate ndĩi.

33Ĩtina wa ũndũ ũsu Yelovoamu ndaaĩthyũũa kuma mũendelenĩ wake mũthũku, ĩndĩ o ĩngĩ kuma andũnĩ onthe amatw’a athembi ma kũla kũndũ kũtũlu: o ũla wendaa amũvathan’ya, nĩ kana vethĩwe athembi ma kũla kũndũ kũtũlu.

34Na ũndũ ũsu watw’ĩkie naĩ kwa nyũmba ya Yelovoamu, o ya kũmĩveta, na kũmyananga yume ĩũlũ wa nthĩ.

← Chapter 12 Jump to: Chapter 14 →