1 Kings 14

Kamba (Mbivilia) 1956

← Chapter 13 Jump to: Chapter 15 →

1Ĩvinda yĩu Aviya mwana wa Yelovoamu awaa.

2Na Yelovoamu amwĩa mũka wake, Nĩngũkwĩsũva, ũkĩla noyĩyũlan’ya, nĩ kana ndũkamanyĩke wĩ kĩveti kya Yelovoamu; na enda Silo: sisya, mwathani Aiya e ku, ũla waneenie ũndũ wakwa kana ngeethĩwa mũsumbĩ wa andũ aa.

3Na kua imũtũ ĩkũmi, na tũmũtũ, na sũva wa ũkĩ wa nzũkĩ, noimũendea: akakũtavya ũndũ kwĩĩkĩka kwa mwana.

4Na kĩveti kya Yelovoamu kyeeka ũu, na kyookĩla, na kyathi Silo, na kyavika nyũmba kwa Aiya. Na ĩndĩ Aiya ndaĩ atonya kwona; nũndũ metho make nĩmaĩte mbindu nũndũ wa kũkũa.

5Na Yeova amwĩa Aiya, Sisya, kĩveti kya Yelovoamu nĩkyũkĩte ũkũkũlya ũndũ wa mwana wakyo; nũndũ nĩ mũwau: kĩtavye ũna na ũna; nũndũ kwĩĩthĩwa, yĩla kĩũtonyelela kĩĩyĩkalya ta kĩveti kĩngĩ.

6Na kweethĩwa, yĩla Aiya wewie matuu ma maũũ makyo, kĩkĩtonyelela mũomonĩ, akĩa, Lika, we kĩveti kya Yelovoamu; nũndũ wa kĩ ũkwĩyĩkalya ta ũngĩ? Nũndũ nĩtũmĩtwe kwaku na ũvoo mũito.

7Enda, ũmũtavye Yelovoamu, Ũũ nĩw’o Yeova, Ngai wa Isilaeli, ũnũkwasya: Nũndũ nĩnakũnenevisye ngĩkumya katĩ wa andũ, na nakũtw’ĩkĩthya mũnene wĩ mbee ũsumbĩnĩ wa andũ makwa Isilaeli,

8na navena nyũmba ya Ndaviti ũsumbĩ, na nakũnenga; ĩndĩ o na ũu ndwaaĩkala ta mũthũkũmi wakwa Ndaviti, ũla wakwataa mĩao yakwa, na wambikĩlile na ngoo yake yonthe, eke ũla nonaa wĩ ũseo w’oka,

9ĩndĩ nĩwĩkĩte ũthũku kũvĩtũka onthe ala maĩ mbee waku, na wathi na kwĩseũvĩsya ngai ingĩ, na mĩvw’anano ya syĩndũ ila ũtwekethetye, ũkĩnthatya, na nũmbĩkĩtye ĩtina waku:

10kwondũ wa ũu, sisya, ngamĩetee nyũmba ya Yelovoamu ũthũku, na ngaveta kwa Yelovoamu kĩla mwana mũũme, ũla wĩĩthĩwa e mwove na ũla wĩĩthĩwa ate mwove nthĩnĩ wa Isilaeli na ngatuta vyũ nyũmba ya Yelovoamu, o tondũ mũndũ ũtutaa vũũ, mũvaka yathela vyũ.

11Ũla wa Yelovoamu ũkakw’ĩa ndũanĩ ngitĩ ikaya; na ũla ũkakw’ĩa kĩthekanĩ nyũnyi sya yayaya ikaya; nũndũ Yeova nũneenete ũu.

12Ũkĩla ĩndĩ ũsyoke nyũmbanĩ kwaku: na yĩla maũũ maku melika ĩ ndũanĩ, mwana ethi ũkw’a.

13Na Isilaeli onthe makamũmetea, na makamũthika; nũndũ no ũsu weka wa Yelovoamu wĩthikwa mbũanĩ, nĩkwĩthĩwa nthĩnĩ wake nĩvekwonekete ũndũ ũseo welekele Yeova, Ngai wa Isilaeli, nyũmbanĩ ya Yelovoamu.

14Na ĩngĩ Yeova akeeyũkĩlĩlya mũsumbĩ wa Isilaeli, ũla ũkaveta nyũmba ya Yelovoamu mũthenya ũsu: ĩndĩ nata? O na yu.

15Nũndũ Yeova akakũna Isilaeli, o tondũ mũangi ũthingithangaw’a wĩ manzĩnĩ; na akakũanĩsya Isilaeli na mĩi kuma nthĩ ĩno nzeo ĩla wamanengie aaĩthe moo, na akamanyaĩĩkya mũingo wa ũla Ũsĩ, nĩkwĩthĩwa nĩmaseũvisye Aselimu syoo, makĩmũthatya Yeova.

16Na akaekana na Isilaeli nũndũ wa naĩ sya Yelovoamu, ila wĩkĩte, na ila wavĩtĩthĩtye Isilaeli nasyo.

17Na kĩveti kya Yelovoamu kyookĩla, na kyathi, na kyavika Tilisa: na kĩkĩvika mwalyonĩ wa nyũmba, mwana akw’a.

18Na Isilaeli onthe mamũthika, na mamũmetea, kwĩanana na ndeto ya Yeova, ĩla waneenie na kanyw’a wa mũthũkũmi wake Aiya.

19Na meko ala angĩ ma Yelovoamu, ũndũ wokitie kaũ, na ũndũ wasumbĩkie, sisya, nĩmaandĩkĩtwe ĩvukunĩ ya maũndũ ma mavinda ma Isilaeli.

20Na mĩthenya ĩla Yelovoamu wasumbĩkie nĩ myaka mĩongo ĩlĩ na ĩlĩ: na akoma na aaĩthe make, na Natavu mwana wake asumbĩka vandũ vake.

21Na Leovoamu mwana wa Solomoni asumbĩka Yuta. Leovoamu aĩ wa myaka mĩongo ĩna na ũmwe yĩla wambĩlĩlye kũsumbĩka, na asumbĩka myaka ĩkũmi na mũonza Yelusaleme, ndũa ĩla Yeova wanyuvĩte mbaĩnĩ syonthe sya Isilaeli, ekalye syĩtwa yake vo: na syĩtwa ya inyia wake eetawa Naama Mũamimoni.

22Na Yuta meekaa ũla Yeova wonaa wĩ ũthũku, na mamwĩkĩa kĩwĩu na naĩ syoo ila meekaa, kũvĩtũka syonthe ila aaĩthe moo meekaa.

23Nũndũ nao nĩmeeyakie kũndũ kũtũlu, na ituĩ, na Aselimu, kĩla kĩĩmanĩ kĩtũlu, na ĩtina wa kĩla mũtĩ mwĩũ;

24o na kwaĩ aũme ĩ nthĩ ala meekaa naĩ na aũme angĩ: nĩmeekaa kwĩanana na mothatyo onthe ma mbaĩ ila Yeova wailũngilye mbee wa ana ma Isilaeli.

25Na kweethĩwa mwaka wa katano wa kũsumbĩka kwa mũsumbĩ Leovoamu, Sisaki mũsumbĩ wa Misili ambata okite na Yelusaleme;

26na atwaa mothwii maie ma nyũmba ya Yeova, na mothwii maie ma nyũmba ya mũsumbĩ; o na atwaa onthe vyũ: na atwaa ngao syonthe sya thaavu ila Solomoni waseũvĩtye.

27Na mũsumbĩ Leovoamu aseũvya ngao sya ũthuku mweũ vandũ va isu, na asia mokonĩ ma makavuteni ma nguthu ya asũvĩi, ala masũvĩaa mũomonĩ wa nyũmba ya mũsumbĩ.

28Na kweethĩwa, o yĩla mũsumbĩ walikaa nyũmbanĩ ya Yeova, asũvĩi makikua, na makitũnga kasũmbanĩ ka asũvĩi.

29Na ĩndĩ meko ala angĩ ma Leovoamu, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

30Na kwaĩ kaũ katĩ wa Leovoamu na Yelovoamu mavinda onthe.

31Na Leovoamu akoma na aaĩthe make, na athikwa na aaĩthe make ndũanĩ ya Ndaviti: na syĩtwa ya inyia wake eetawa Naama Mũamimoni. Na Aviyamu mwana wake asumbĩka vandũ vake.

← Chapter 13 Jump to: Chapter 15 →