1 Kings 7 — Kamba (Mbivilia) 1956

1Na Solomoni aakie nyũmba ĩ yake myaka ĩkũmi na ĩtatũ, na amina nyũmba yake yonthe.

2Nũndũ aakie nyũmba ya mũtitũ wa Levanoni; ũasa wayo waĩ mĩkono ĩana, na ũthanthau wayo mĩkono mĩongo ĩtano, na ũtũlu wayo mĩkono mĩongo ĩtatũ, yĩ ĩũlũ wa mĩsoa ĩna ya ituĩ sya mĩkũũ, na mĩamba ya mĩkũũ ĩũlũ wa ituĩ.

3Na ĩũlũ yaĩĩwa mbwaũ sya mĩkũũ ĩũlũ wa ĩ mĩamba mĩongo ĩna na itano, ĩla yaĩ ĩũlũ wa ituĩ; ĩkũmi na itano mũsoanĩ ũmwe.

4Na kwaĩ mĩsoa ĩtatũ ya mĩamba, na mbũthi na mbũthi syelekanĩle mĩsoa ĩtatũ.

5Na mĩomo yonthe na mĩtĩ yĩ ndee syayo yaseũvĩtw’e yĩananĩtw’e na mĩamba: na mbũthi na mbũthi syelekanĩle mĩsoa ĩtatũ.

6Na aseũvya valasya na ituĩ; ũasa waw’o waĩ mĩkono mĩongo ĩtano, na ũthanthau waw’o waĩ mĩkono mĩongo ĩtatũ; na valasya mbee wasyo; na ituĩ na mwalyo wa mũomo mbee wasyo.

7Na aseũvya valasya wa kĩvĩla kya ũsumbĩ vala wĩsilĩlaa, o valasya wa sila: na waĩĩwa mbwaũ sya mĩkũũ kuma nthĩ kũvika ũvengeelonĩ.

8Na nyũmba yake vala wĩĩkala, o nza ĩla ĩngĩ yĩ nthĩnĩ wa valasya, yaseũvĩw’e o wĩa ta ũsu. O na aaka nyũmba ya mwĩĩtu wa Valao (ũla Solomoni watwaĩte ethĩwe mũka wake), yailyĩ valasya o ũsu.

9Isu syonthe syaĩ sya mavia ma thooa mũnene, o mavia masũvye, kwĩanana na kĩthimo, matile na mang’weli, ngalĩ ya nthĩnĩ na ya nza, o kuma wambĩlĩlyo kũvika mavia ala maumĩlangĩte ma ũminĩa, na o ta ũu ngalĩ ya ũtee kũvika nza ĩla nene.

10Na wambĩlĩlyo waĩ wa mavia ma thooa mũnene, o mavia manene mũno, mavia ma mĩkono ĩkũmi, na mavia ma mĩkono nyanya.

11Na ĩũlũ kwaĩ mavia ma thooa mũnene, o mavia masũvye, kwĩanana na kĩthimo, o na mbwaũ sya mĩkũũ.

12Na ĩla nza nene ĩla yathyũlũlũkĩte ngalĩ syonthe yaĩ na mĩsoa ĩtatũ ya mavia masũvye, na mũsoa wa mĩamba ya mĩkũũ; o ta nza ya nthĩnĩ ya nyũmba ya Yeova, na valasya wa ĩ nyũmba.

13Na mũsumbĩ Solomoni atũmana Ilamu aetwe kuma Tile.

14Aĩ mwana wa kĩveti ndiwa kya mbaĩ ya Navitali, na ĩthe wake aĩ mũndũ wa Tile, mũtwii wa ũthuku; na ausũĩtwe nĩ ũĩ na ũmanyi na ũtũĩka, atethasye mawĩa onthe na ũthuku. Na ooka kwa mũsumbĩ Solomoni, na amũtetheesya wĩa wake w’onthe.

15Nũndũ aseũvisye ituĩ ilĩ sya ũthuku, kĩla kĩmwe ũasa wakyo mĩkono ĩkũmi na nyanya: na ũthima na ũlii nĩ mĩkono ĩkũmi na ĩlĩ kũthyũlũlũka kĩla kĩmwe.

16Na aseũvya ngovia ilĩ sya ũthuku ũla matwekethetye, sya kwia mĩthyanĩ ya ituĩ: ũtũlu wa ngovia ĩmwe waĩ mĩkono ĩtano, na ũtũlu wa ngovia ĩla ĩngĩ waĩ mĩkono ĩtano.

17Kwaĩ seng’eng’e waseũvĩtw’e ũvĩlanganĩtw’e, na tũkanda tũvĩnde mũvĩndĩle wa mũnyoo, kwondũ wa ngovia isu ila syaĩ mĩthyanĩ ya ituĩ; mũonza ũndũ wa ngovia ĩmwe, na mũonza ũndũ wa ngovia ĩla ĩngĩ.

18Aseũvisye ituĩ ũu; na kwaĩ mĩsoa ĩlĩ ĩthyũlũlũkĩte ĩũlũ wa seng’eng’e ũmwe, ya kũvw’ĩka ngovia isu ila syaĩ mĩthyanĩ ya ituĩ: na now’o wekie ũndũ wa ngovia ĩla ĩngĩ.

19Na ngovia o isu ila syaĩ mĩthyanĩ ya ituĩ sya valasya syaseũvĩtw’e ta ĩlaa ya lili, sya mĩkono ĩna.

20O na kwaĩ ngovia ĩũlũ wa ila ituĩ ilĩ, vakuvĩ na ũkulumbenĩ ũla wĩ vakuvĩ na seng’eng’e: na makũngũmanga maĩ maana elĩ, me mĩsoa mathyũlũlũkĩte ngovia ĩla ĩngi.

21Na aũngamya ituĩ valasyanĩ wa ĩkalũ: na aũngamya kĩtuĩ kya ngalĩ ya kw’oko kwa aũme, na akĩta syĩtwa yakyo Yakini; na aũngamya kĩtuĩ kya ngalĩ ya kw’oko kwa aka, na akĩta syĩtwa yakyo Mboasi.

22Na mĩthyanĩ ya ituĩ kwaĩ mũseũvĩlye ta wa ĩlaa ya lili: na ĩndĩ wĩa wa ituĩ wathela.

23Na aseũvya ũkanga na syĩndũ ila matwekethetye wa mĩkono ĩkũmi kuma ũengo kũvika ũengonĩ ũla ũngĩ, wa kĩlingĩlĩ ngalĩ syonthe, na ũtũlu waw’o waĩ mĩkono ĩtano; na kũthima na ũlii nĩ mĩkono mĩongo ĩtatũ kũthyũlũlũka ngalĩ syonthe.

24Na ĩtheo wa ũengo waw’o ngalĩ syonthe kwaĩ mĩkauti ĩla yawĩlingĩle, ĩkũmi kwa kĩla mũkono, ĩthyũlũlũkĩte ũkanga ngalĩ syonthe; mĩkauti yaĩ mĩsoa ĩlĩ, yatuanĩw’e naw’o.

25Watũlĩtw’e ĩũlũ wa nzaũ ĩkũmi na ilĩ, itatũ isyaĩtye ngalĩ ya ĩũlũ, na itatũ isyaĩtye ũthũĩlonĩ wa syũa, na itatũ isyaĩtye ngalĩ ya ĩtheo, na itatũ isyaĩtye wumĩlonĩ wa syũa; na ũkanga wailĩĩlwe ĩũlũ wasyo, na itimba syasyo syonthe syeelekele ngalĩ ya nthĩnĩ.

26Na kĩemo kyaw’o kyaĩ ta kĩtaa kya kw’oko; na ũengo waw’o watuĩtwe ta ũengo wa kĩkombe, o ta ĩlaa ya lili: waĩ ũtonya kwĩanĩa ithimi sya vetha ngili ilĩ,

27Na aseũvya matina ĩkũmi ma ũthuku; ũasa wa ĩtina yĩmwe waĩ mĩkono ĩna, na ũthanthau waĩ mĩkono ĩna, na ũtũlu waĩ mĩkono ĩtatũ.

28Na mũseũvĩlye wa matina wailyĩ ũũ: maĩ na mavava; na kwaĩ mavava katĩ wa monyitĩku;

29na mavavanĩ ala maĩ katĩ wa monyitĩku kwaĩ mĩnyambũ, na nzaũ, na akeluvi; na monyitĩkunĩ kwaĩ katulĩ ngalĩ ya ĩũlũ; na ĩtheo wa mĩnyambũ na nzaũ kwaĩ mũseũvĩlye wa tũkanda tũvĩnde tũsũnzũlĩte.

30Na kĩla ĩtina yaĩ na ndĩa inya sya ũthuku, na tũmĩlamba twa ũkwatan’ya ndĩa twa ũthuku; na maũũ ana mayo maĩ na syĩndũ sya ũtw’ĩĩka; ungu wa kĩndũ kya kũthambĩa kwaĩ syĩndũ isu sya kũtw’ĩĩka syaseũviw’e na syĩndũ matwekethetye, syĩ na mũseũvĩlye wa tũmakanda tũvĩnde ũtee wa kĩla kĩmwe.

31Na kanyw’a wakyo nthĩnĩ na ĩũlũ wa ĩla ngovia waĩ mũkono ũmwe: na kanyw’a wakyo waĩ kĩlingĩlĩ ta mũseũvĩlye wa katulĩ, mũkono na nyunzu; o na kanyw’anĩ wakyo kwaĩ movane, na mavava masyo nĩmeanene ngalĩ inya, tĩ kĩlingĩlĩ.

32Na ila ndĩa inya syaĩ ungu wa mavava; na tũmĩlamba twa ndĩa twaĩ ĩtinanĩ: na ũtũlu wa ndĩa waĩ mũkono na nyunzu.

33Na mũseũvĩlye wa ndĩa isu wailyĩ mũseũvĩlye wa ndĩa ya ĩkasya ya kaũ: tũmĩlamba twasyo, na ndĩa, na mĩtĩ ya ndĩa, na matilinge ma ũkwatan’ya mĩtĩ ya ndĩa, syonthe syaseũvĩtw’e na syĩndũ ila matwekethetye.

34Na kwaĩ syĩndũ inya sya ũtw’ĩĩka ikotonĩ inya sya kĩla ĩtina: na syĩndũ isu syatuanĩw’e na ĩtina.

35Na ngalĩ ya ĩũlũ ya ĩtina kwaĩ kĩndũ kya kĩlingĩlĩ ũtũlu wakyo nyunzu ya mũkono; na ngalĩ ya ĩũlũ ya ĩtina ikwatũ syayo na mavava mayo syakwatene nayo.

36Na tũsengeanĩ twa ikwatũ syayo, na mavavanĩ mayo, avana akeluvi, na mĩnyambũ, na mĩtende, kwĩanana na ũthei wa kĩla kĩmwe, vamwe na mũseũvĩlye wa tũmakanda tũvĩnde tũthyũlũlũkĩte.

37Ũũ nĩw’o waseũvisye ala matina ĩkũmi: onthe maĩ ma mũtuĩle ũmwe, na kĩthimi kĩmwe, na wũmbĩle ũmwe.

38Na aseũvya syĩndũ ĩkũmi sya kũthambĩa sya ũthuku: kĩndũ kĩmwe kya kũthambĩa kyaĩ kĩtonya kwĩanĩa ithimi sya vathi mĩongo ĩna; na kĩla kĩndũ kya kũthambĩa kyaĩ kya mĩkono ĩna; na ĩũlũ wa kĩla ĩtina kwaĩ kĩndũ kĩmwe kya ũthambĩa.

39Na aia matina, atano ngalĩ ya kw’oko kwa aũme kwa nyũmba, na atano ngalĩ ya kw’oko kwa aka kwa nyũmba: na aia ũkanga ngalĩ ya kw’oko kwa aũme kwa nyũmba ngalĩ ya wumĩlonĩ wa syũa, kwelekela ngalĩ ya ĩtheo.

40Na Ilamu aseũvya syĩndũ sya ũthambĩa, na mĩko, o na masaani manene. Ũu nĩw’o Ilamu waminie wĩa w’onthe ũla wamũtetheesye mũsumbĩ Solomoni kwondũ wa nyũmba ya Yeova:

41ila ituĩ ilĩ, na ngulumbe ilĩ sya ngovia ila syaĩ mĩthyanĩ ya ituĩ; na ila seng’eng’e ilĩ sya kũvw’ĩka ila ngulumbe ilĩ sya i ngovia ila syaĩ mĩthyanĩ ya ituĩ;

42na makũngũmanga maana ana ũndũ wa ila seng’eng’e ilĩ; mĩsoa ĩlĩ ya makũngũmanga ũndũ wa kĩla seng’eng’e wa kũvw’ĩka ila ngulumbe ilĩ sya i ngovia ila syaĩ ĩũlũ wa ila ituĩ;

43na ala matina ĩkũmi, na ila syĩndũ ĩkũmi sya ũthambĩa syĩ matinanĩ;

44na ũkanga o ũsu ũmwe, na ila nzaĩĩ ĩkũmi na ilĩ syĩ ungu wa ũkanga;

45na mbisũ, na mĩko, na masaani manene: o mĩio ĩsu yonthe ya nyũmba ya Yeova, ĩla Ilamu wamũseũvĩsye mũsumbĩ Solomoni, yai ya ũthuku mũkute.

46Mũsumbĩ amĩtuĩe ũiĩnĩ wa Yolotani, nthĩ yĩ yũmba katĩ wa Sukothi na Nzalethani.

47Na Solomoni atia mĩio yonthe ĩte mĩthime, nĩkwĩthĩwa yaĩ mingĩ mũno: ũito wa ũthuku ndwaĩ ũtonya kũmanyĩka.

48Na Solomoni aseũvya mĩio yonthe ĩla yaĩ nyũmbanĩ ya Yeova: kĩthembeo kya thaavu, na mesa ĩla yaĩ na imũtũ ila syaiĩawa Yeova, ya thaavu;

49na syĩndũ ila syeekĩawa mataa, itano ngalĩ ya kw’oko kwa aũme, na itano ngalĩ ya kw’oko kwa aka, mbee wa vala vandũ va Ngai va ũneenea, sya thaavu mũtheu; na ala malaa, na mataa, na mĩveto, sya thaavu;

50na ikombe, na mĩkasi, na masaani manene, na syĩko, na tũvũngũlyũ twa ũkua makaa, sya thaavu mũtheu; na ikwati, sya mĩomo ya nyũmba ya nthĩnĩ, vala vandũ vatheu mbee, o na sya mĩomo ya nyũmba, ũu nĩ kwasya sya ĩkalũ, sya thaavu.

51Wĩa w’onthe ũla mũsumbĩ Solomoni watethisye wa nyũmba ya Yeova wathelile ũu. Na Solomoni alikya nthĩnĩ syĩndũ ila ĩthe wake Ndaviti wavathĩte syĩthĩwe ntheu, o vetha, na thaavu, na mĩio, na asia kũla kwiawa ũthwii wa nyũmba ya Yeova.