1 Kings 16

Kamba (Mbivilia) 1956

← Chapter 15 Jump to: Chapter 17 →

1Na ndeto ya Yeova yamũkĩa Yeu mwana wa Aanani ĩkĩmũneenea Mbaasa, ĩkĩmwĩa,

2Nĩkwĩthĩwa nĩnakũkĩlilye kuma kĩtoonĩ, na nakũtw’ĩkĩthya mũnene wĩ mbee ũsumbĩnĩ wa andũ makwa Isilaeli, naku nũendete na mũendele wa Yelovoamu, na wamavĩtĩthya andũ makwa Isilaeli, ũkĩnthatya na naĩ syoo;

3sisya, ngamina vyũ Mbaasa na nyũmba yake; na ngatw’ĩkĩthya nyũmba yaku ta nyũmba ya Yelovoamu mwana wa Nevati.

4Ũla wa Mbaasa ũkakw’ĩa ndũanĩ ngitĩ ikaya; na ũla wake ũkakw’ĩa kĩthekanĩ nyũnyi sya yayaya ikaya.

5Na ĩndĩ meko ala angĩ ma Mbaasa, na ũla wekaa, na vinya wake mũnene, ti maandĩke ĩvukuni ya maũndũ ma mavinda ma asumbĩ ma Isilaeli?

6Na Mbaasa akoma na aaĩthe make, na athikwa Tilisa; na Ela mwana wake asumbĩka vandũ vake.

7Na ũndũ ũngĩ ndeto ya Yeova yookie na kanyw’a wa mwathani Yeu mwana wa Aanani ĩkĩmũneenea Mbaasa, na nyũmba yake, nũndũ wa ũthũku w’onthe ũla wekaa Yeova ene, akĩmũthatya na wĩa wa moko make, ũndũ wa kwĩthĩwa ta nyũmba ya Yelovoamu, na nũndũ nĩwamũkũnie.

8Mwaka wa mĩongo ĩlĩ na thanthatũ wa kũsumbĩka kwa Asa mũsumbĩ wa Yuta Ela mwana wa Mbaasa ambĩlĩlya kũsumbĩka Isilaeli ku Tilisa, na asumbĩka myaka ĩlĩ.

9Na mũthũkũmi wake Nzimili, kavuteni wa nyunzu ya makasya make ma kaũ, amũsamĩa. Na aĩ Tilisa, anyw’ĩte akalooteka e nyũmbanĩ ya Alisa, ũla waĩ mũsyaĩĩsya wa andũ ma nyũmba ku Tilisa:

10na Nzimili alika na amũkũna, na amũaa, mwaka wa mĩongo ĩlĩ na mũonza wa kũsumbĩka kwa Asa mũsumbĩ wa Yuta, na asumbĩka vandũ vake.

11Na kweethĩwa, yĩla wambĩlĩlye kũsumbĩka, o ekala kĩvĩlanĩ kyake kya ũsumbĩ, akũna nyũmba yonthe ya Mbaasa: ndaamũtiĩa mwana mũũme o na ũmwe, wa andũ ma mbaĩ yake, o na wa anyanyae make.

12Nzimili aananga nyũmba yonthe ya Mbaasa o ta ũu, kwĩanana na ndeto ya Yeova, ĩla waneenee Mbaasa na kanyw’a wa mwathani Yeu,

13nũndũ wa naĩ syonthe sya Mbaasa, na naĩ sya Ela mwana wake, ila mavĩtisye, na ila mavĩtĩthisye Isilaeli nasyo, makĩmũthatya Yeova, Ngai wa Isilaeli, na maũndũ moo ma mana.

14Na ĩndĩ meko ala angĩ ma Ela, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Isilaeli?

15Mwaka wa mĩongo ĩlĩ na mũonza wa kũsumbĩka kwa Asa mũsumbĩ wa Yuta Nzimili asumbĩka mĩthenya mũonza ku Tilisa. Na ĩndĩ andũ maĩ manamba maeema moo mataũĩĩe Ngivethoni, ĩla yaĩ ya Avilisiti.

16Na andũ ala maĩ mwakonĩ wa maeema meew’a kũkyaw’a, Nzimili nũnamũsamĩe, o na nũnamũaie mũsumbĩ: kwondũ wa ũu Isilaeli onthe mũthenya ũsu mamũtw’a Omili, kavuteni wa nguthu, mũsumbĩ wa Isilaeli me ku mwakonĩ wa maeema.

17Na Omili ambata kuma Ngivethoni, na Isilaeli onthe vamwe nake, na mathyũlũlũka Tilisa mamĩtw’ĩkanĩsye.

18Na kweethĩwa, yĩla Nzimili wonie ndũa nĩyakwatwa, alika nthĩnĩ wa nyũmba nene yĩ kĩemo yĩ nyũmbanĩ ya mũsumbĩ, na amĩvĩvĩlya ĩla nyũmba ya mũsumbĩ ĩũlũ wake mwene, na akw’a,

19nũndũ wa naĩ syake ila wavitisye akĩka ũla Yeova wonaa wĩ ũthũku, kwondũ wa kũthi mũendelenĩ wa Yelovoamu, na naĩnĩ yake ĩla wekaa, amavĩtĩthye Isilaeli.

20Na ĩndĩ meko ala angĩ ma Nzimili, na ũvingan’yo wake ũla weekie, ti maandĩke ĩvukunĩ ya maũndũ ma mavinda ma asumbĩ ma Isilaeli?

21Nĩvo ĩndĩ andũ ma Isilaeli meeaanisye nguthu ilĩ: nyunzu ya andũ yamũatĩĩa Tivini mwana wa Nginathi, mamũtw’ĩkĩthye mũsumbĩ; na nyunzu yaatĩĩa Omili.

22Ĩndĩ andũ ala mamũatĩĩe Omili mamakĩlya vinya andũ ala mamũatĩĩe Tivini mwana wa Nginathi: kwondũ wa ũu Tivini akw’a, na Omili asumbĩka.

23Mwaka wa mĩongo ĩtatũ na ũmwe wa kũsumbĩka kwa Asa mũsumbĩ wa Yuta Omili ambĩlĩlya kũsumbĩka Isilaeli, na asumbĩka myaka ĩkũmi na ĩlĩ: asumbĩka myaka thanthatũ Tilisa.

24Na athooa kwa Semeli kĩĩma kya Samalia na thooa wa talendi ilĩ sya vetha; na aaka ku kĩĩmanĩ, na eeta syĩtwa ya ndũa ĩla wakie Samalia, kwĩtanĩsya na syĩtwa ya Semeli, mwene wa kĩĩma.

25Na Omili eekaa ũla Yeova wonaa wĩ ũthũku, na eekaa ũthũku kũvĩtũka onthe ala maĩ mbee wake.

26Nũndũ aendaa mũendelenĩ w’onthe wa Yelovoamu mwana wa Nevati, na naĩnĩ syake ila wamavĩtĩthisye Isilaeli nasyo, akĩthatya Yeova, Ngai wa Isilaeli, na maũndũ moo ma mana.

27Na ĩndĩ meko ala angĩ ma Omili ala wekaa, na vinya wake mũnene ũla wonanisye, ti maandĩke ĩvukunĩ ya maũndũ ma mavinda ma asumbĩ ma Isilaeli?

28Na ĩndĩ Omili akoma na aaĩthe make, na athikwa Samalia; na Aavu mwana wake asumbĩka vandũ vake.

29Na mwaka wa mĩongo ĩtatũ na nyanya wa kũsumbĩka kwa Asa mũsumbĩ wa Yuta Aavu mwana wa Omili ambĩlĩlya kũsumbĩka Isilaeli: na Aavu mwana wa Omili asumbĩka Isilaeli ku Samalia myaka mĩongo ĩlĩ na ĩlĩ.

30Na Aavu mwana wa Omili eekaa ũla Yeova wonaa wĩ ũthũku kũvĩtũka onthe ala maĩ mbee wake.

31Na kweethĩwa, o ta kaĩ waĩ ũndũ ũnini kwake kũendaa naĩnĩ sya Yelovoamu mwana wa Nevati, atĩ atwaa Yeseveli mwĩĩtu wa Ethimbaali mũsumbĩ wa Asitoni, na athi athũkũma Mbaali, na amĩthaitha.

32Na amyakĩa Mbaali kĩthembeo nyũmbanĩ ya Mbaali, ĩla wakĩte Samalia.

33Na Aavu aseũvya Asela; na Aavu ongeleela mũni mbee kũmũthatya Yeova, Ngai wa Isilaeli, kũvĩtũka asumbĩ onthe ma Isilaeli ala maĩ mbee wake.

34Mĩthenyanĩ yake Ieli Mũmbethi‐eli aaka Yeliko: akwatya wambĩlĩyo wayo na kũkw’ĩĩwa nĩ ĩkithathi yake, Avilamu, na aũngamya mbingĩlo syayo na kũkw’ĩĩwa nĩ ĩlumaita yake ya mũndũ mũũme, Sekuvu, kwĩanana na ndeto ya Yeova, ĩla waneenie na kanyw’a wa Yosua mwana wa Nuni.

← Chapter 15 Jump to: Chapter 17 →