1 Kings 15

Kamba (Mbivilia) 1956

← Chapter 14 Jump to: Chapter 16 →

1Na ĩndĩ mwaka wa ĩkũmi na nyanya wa kũsumbĩka kwa Yelovoamu mwana wa Nevati, Aviyamu ambĩlĩlya kũsumbĩka Yuta.

2Asumbĩka myaka ĩtatũ Yelusaleme: na syĩtwa ya inyia wake eetawa Maaka, mwĩĩtu wa Avisalomu.

3Na nĩwaendaa naĩnĩ syonthe sya ĩthe wake, ila wekĩte mbee wake; na ngoo yake ndĩaĩ mbĩanĩu kwa Yeova Ngai wake, o tondũ ngoo ya Ndaviti ĩthe wake yailyĩ.

4Ĩndĩ kwondũ wa Ndaviti Yeova Ngai wake amũnenga taa ku Yelusaleme, akĩũngamya mwana wake ĩtina wake, na kũlũlũmĩlya Yelusaleme;

5nĩkwĩthĩwa Ndaviti nĩweekaa ũla Yeova wonaa wĩ ũseo, na ndaaĩthyũũa na kũtia ũndũ o na wĩva ũla wamwĩaĩe mĩthenya yonthe ya thayũ wake, ate o ũndũnĩ wa Ulia Mũititi.

6Na kwaĩ kaũ katĩ wa Leovoamu na Yelovoamu mĩthenya yonthe ya thayũ wake.

7Na meko ala angĩ ma Aviyamu, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Yuta? Na kwaĩ kaũ katĩ wa Aviyamu na Yelovoamu.

8Na Aviyamu akoma na aaĩthe make; na mamũthika ndũanĩ ya Ndaviti: na Asa mwana wake asumbĩka vandũ vake.

9Na mwaka wa mĩongo ĩlĩ wa kũsumbĩka kwa Yelovoamu mũsumbĩ wa Isilaeli Asa ambĩlĩlya kũsumbĩka Yuta.

10Na asumbĩka Yelusaleme myaka mĩongo ĩna na ũmwe: na syĩtwa ya inyia wake eetawa Maaka mwĩĩtu wa Avisalomu.

11Na Asa eekaa ũla Yeova wonaa wĩ ũseo, o tondũ ĩthe wake Ndaviti wekaa.

12Na alũngya aũme ala meekaa naĩ na aũme angĩ maume ĩ nthĩ, na aveta mĩvw’anano yonthe ĩla ĩthe wake waseũvĩtye.

13O na aumya Maaka inyia wake ndakethĩwe ũnenenĩ wa kĩũsumbĩ, nũndũ nĩwaseũvĩtye mũvw’anano wa kũthatya wĩthĩwe wa Asela; na Asa atemanga mũvw’anano wa inyia wake, na oovĩvĩsya kalũsĩnĩ ketawa Kitiloni.

14Ĩndĩ kũla kũndũ kũtũlu kũtyaavetwa: ĩndĩ ngoo ya Asa yaĩ mbĩanĩu kwa Yeova mĩthenya yake yonthe.

15Na aete nyũmbanĩ ya Yeova syĩndũ ila ĩthe wake wavathĩte syĩthĩwe ntheu, na syĩndũ ila we mwene wavathĩte syĩthĩwe ntheu, vetha, na thaavu, na mĩio.

16Na kwaĩ kaũ katĩ wa Asa na Mbaasa mũsumbĩ wa Isilaeli mĩthenya yoo yonthe.

17Na Mbaasa mũsumbĩ wa Isilaeli ambata okite na Yuta, na aaka Lama, nĩ kana ndakaeke mũndũ o na wĩva kumaala kana kũsyoka vala ve Asa mũsumbĩ wa Yuta.

18Nĩvo ĩndĩ Asa waumaalilye vetha w’onthe na thaavu ũla watialĩtwe wa mothwii maie ma nyũmba ya Yeova, na mothwii maie ma nyũmba ya mũsumbĩ, na oonengane mokonĩ ma athũkũmi make; na mũsumbĩ Asa amũtwaĩa Mbeni‐aatati, mwana wa Tavilimoni, mwana wa Esioni, mũsumbĩ wa Silia, ũla watwie Ndamasiku, akĩmwĩa,

19Kwĩ wĩw’ano katĩ wakwa naku, o ta katĩ wa ĩthe wakwa na ĩthe waku: sisya, nĩnakũetee mũthĩnzĩo wa vetha na thaavu; enda, wanange wĩw’ano waku na Mbaasa mũsumbĩ wa Isilaeli, nĩ kana aume vala nĩĩ.

20Na Mbeni‐aatati amwĩthukĩĩsya mũsumbĩ Asa, na atũma makavuteni ma ita syake mokite na ndũa sya Isilaeli, na makũna Iyoni, na Ndani, na Aveli‐mbethimaaka, na Kinelothi yonthe, vamwe na nthĩ yonthe ya Navitali.

21Na kweethĩwa, yĩla Mbaasa wewie ũu, aeka kwaka Lama, na atũa Tilisa.

22Nĩvo ĩndĩ mũsumbĩ Asa watavanisye Yuta kw’onthe; vati ũmwe ũtaathi wĩanĩ: na makua mavia ma Lama, na mĩtĩ yayo, ĩla Mbaasa wakĩte nayo; na mũsumbĩ Asa aaka nayo Ngeva ya Mbenyamini, na Misiva.

23Na ĩndĩ meko ala angĩ onthe ma Asa, na vinya wake w’onthe mũnene, na w’onthe ũla wekaa, na ndũa ila wakie ti, maandĩke ĩvukunĩ ya maũndũ ma mavinda ma asumbĩ ma Yuta? Ĩndĩ ĩvinda ya kũtumĩa kwake awaa maũũ.

24Na Asa akoma na aaĩthe make, na athikwa vamwe na aaĩthe make ndũanĩ ya Ndaviti ĩthe wake; na Yeosavati mwana wake asumbĩka vandũ vake.

25Na Natavu mwana wa Yelovoamu ambĩlĩlya kũsumbĩka Isilaeli mwaka wa kelĩ wa kũsumbĩka kwa Asa mũsumbĩ wa Yuta; na asumbĩka Isilaeli myaka ĩlĩ.

26Na eekaa ũla Yeova wonaa wĩ ũthũku, na aendaa mũendelenĩ wa ĩthe wake, na naĩnĩ yake ĩla wavĩtĩthisye Isilaeli nayo.

27Na Mbaasa mwana wa Aiya, wa nyũmba ya Isakali amũsamĩa; na Mbaasa amũkũnĩa ku Ngivethoni, ĩla yaĩ ya Avilisiti; nũndũ Natavu na Isilaeli onthe nĩmathyũlũlũkĩte Ngivethoni mamĩtw’ĩkanĩsye.

28O mwaka wa katatũ wa kũsumbĩka kwa Asa mũsumbĩ wa Yuta Mbaasa amũaa Natavu, na asumbĩka vandũ vake.

29Na kweethĩwa, o yĩla watw’ĩkie mũsumbĩ, akũnu nyũmba yonthe ya Yelovoamu: ndaamũtiĩa Yelovoamu ũmwe ũla ũnũkũveva, kũvika amũmina vyũ; kwĩanana na ndeto ya Yeova, ĩla waneenie na kanyw’a wa mũthũkũmi wake Aiya Mũsilo;

30nũndũ wa naĩ sya Yelovoamu ila wavĩtisye, na ila wavĩtĩthisye Isilaeli nasyo, nũndũ wa ũthatyo wake ũla wamũthatisye Yeova, Ngai wa Isilaeli, naw’o.

31Na ĩndĩ meko ala angĩ ma Natavu, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Isilaeli?

32Na kwaĩ kaũ katĩ wa Asa na Mbaasa mũsumbĩ wa Isilaeli mĩthenya yoo yonthe.

33Mwaka wa katatũ wa kũsumbĩka kwa Asa mũsumbĩ wa Yuta Mbaasa mwana wa Aiya ambĩlĩlya kũsumbĩka Isilaeli onthe ku Tilisa, na asumbĩka myaka nĩomgo ĩlĩ na ĩna.

34Na eekaa ũla Yeova wonaa wĩ ũthũku, na aendaa mũendelenĩ wa Yelovoamu, na naĩnĩ yake ĩla wavĩtĩthisye Isilaeli nayo.

← Chapter 14 Jump to: Chapter 16 →