1 Kings 9

Kamba (Mbivilia) 1956

← Chapter 8 Jump to: Chapter 10 →

1Na kweethĩwa, yĩla Solomoni waminĩte kwaka nyũmba ya Yeova na nyũmba ya mũsumbĩ, na kwenda kw’onthe kwa Solomoni kũla wendeew’e nĩ kwĩka,

2Yeova amumĩlĩla Solomoni ĩvinda ya kelĩ, o tondũ wamumĩlĩle Ngiveoni.

3Na Yeova amwĩa, Nĩnĩw’ĩte kũvoya kwaku na kwĩsũvana kwaku, kũla wĩsũvanĩte mbee wakwa: nĩnĩvathĩte nyũmba ĩno yĩthĩwe ntheu, ĩla wakĩte, nĩkalye syĩtwa yakwa vo tene na tene; na metho makwa na ngoo yakwa ikeethĩwa vo ĩndĩ yonthe.

4Na ngalĩ ĩ yaku, ethĩwa ũkakinyaa mbee wakwa, o tondũ Ndaviti ĩthe waku wakinyaa, wĩanĩunĩ wa ngoo, na ũlũngalunĩ, wĩke kwĩanana na w’onthe ũla nĩkwĩaĩĩte, na ũkĩsũvĩa myamũlo yakwa na motw’ĩo makwa;

5nĩvo ĩndĩ nĩlũlũmĩlya kĩvĩla kya ũsumbĩ kya ũsumbĩko waku ĩũlũ wa Isilaeli tene na tene, kwĩanana na ũndũ namwathie Ndaviti ĩthe waku, ngĩmwĩa, Ndũkaĩwa nĩ mũndũ kĩvĩlanĩ kya ũsumbĩ kya Isilaeli.

6Ĩndĩ ethĩwa mũkeethyũũa na kũeka kũngatĩĩa, inyw’ĩ kana syana syenyu, na kũeka kũkwata mĩao yakwa na myamũlo yakwa ĩla niĩte mbee wenyu, ĩndĩ mũkĩthi na kũthũkũma ngai ingĩ, na kwithaitha;

7nĩvo ĩndĩ nĩveta Isilaeli nthĩ ĩla nĩmanengete; na nyũmba ĩno ĩla nĩvathĩte yĩthĩwe ntheu kwondũ wa syĩtwa yakwa, ngamĩkya vala ndatonya kũmyona; na Isilaeli makeethĩwa nthimo na ma kũvũthĩĩw’a mbaĩnĩ syonthe.

8O na kau nyũmba ĩno nĩ ndũlu ũu, ĩndĩ kĩla mũndũ wĩvavĩtĩlaa akaseng’a, na akamĩtimba; na makasya, Nĩkĩ Yeova wĩkĩte nthĩ ĩno, na nyũmba ĩno ũu?

9Na makasũngĩa, Nĩkwĩthĩwa nĩmamũtiie Yeova Ngai woo, ũla waumisye aaĩthe moo nthĩ ya Misili, na makwatana na ngai ingĩ, na kwithaitha, na kwithũkũma: kwondũ wa ũu Yeova nũmaetee ũthũku ũũ w’onthe.

10Na kweethĩwa, myaka mĩongo ĩlĩ yathela, ĩla Solomoni wakĩte nyũmba isu syelĩ, nyũmba ya Yeova na nyũmba ya mũsumbĩ

11(na ĩndĩ Ilamu mũsumbĩ wa Tile nĩwamũnengete Solomoni mĩtĩ ya mĩkũũ na mĩtĩ ya mĩsonovali, vamwe na thaavu, kwĩanana na kwenda kwake kw’onthe), nĩvo mũsumbĩ Solomoni wamũnengie Ilamu ndũa mĩongo ĩlĩ nthĩ ya Ngalilii.

12Na Ilamu auma Tile asisye ndũa ila Solomoni wamũnengie; na ityaamwendeesya.

13Na asya, Nĩ ndũa myaũ ii ila ũnengete, mwana‐a‐asa? Na asyĩta nthĩ ya Kavuli kũvika ũmũnthĩ.

14Na Ilamu amũtwaĩa mũsumbĩ talendi ĩana na mĩongo ĩlĩ sya thaavu.

15Na ũũ nĩw’o ũvoo wa andũ ma kũtethethw’a wĩa ala mũsumbĩ Solomoni waumisye, ma kwaka nyũmba ya Yeova, na nyũmba yake mwene, o na Milo, na ũvai wa Yelusaleme, na Asoli, na Mekito, na Ngeseli.

16Valao mũsumbĩ wa Misili aĩ anambata, na kũkwata ndũa ya Ngeseli, na akamĩvĩvya na mwaki, na akoaa Akanaani ala matwĩe ndũanĩ ĩsu, na akamĩnenga mwĩĩtu wake, kĩveti kya Solomoni, yĩthĩwe kĩanda kyake.

17Na Solomoni aaka Ngeseli, na Mbethi‐oloni ĩla yĩ ngalĩ ya ĩtheo,

18na Mbaalathi, na Tamali ku weũnĩ, nthĩ ĩsu,

19na ndũa syonthe sya kwia mĩio ila Solomoni waĩ nasyo, na ndũa kwondũ wa makasya make ma kaũ, na ndũa sya andũ make ala matũlaa mbalasi, na kĩla Solomoni wendie kwaka kwondũ wa kwĩtanĩthya kwake Yelusaleme, na Levanoni, na nthĩ yonthe ya ũsumbĩko wake.

20Na ũndũ wa andũ onthe ala matialile ma Aamoli, na Aititi, na Avelisi, na Aivi, na Ayevusi, ala mataĩ ma ana ma Isilaeli;

21syana syoo ila syatialile ĩtina woo nthĩ ĩsu, ila ana ma Isilaeli mataatonya kwimina vyũ, imwe sya isu Solomoni asyumisye sya kũtethethaw’a wĩa wa ũkombo kũvika ũmũnthĩ.

22Ĩndĩ ma ana ma Isilaeli Solomoni ndaamatw’ĩkĩthya ngombo: ĩndĩ asu maĩ andũ ma kaũ, na athũkũmi make, na anene me mbee ũsumbĩnĩ wake, na makavuteni make, na anene ma makasya make ma kaũ na ma andũ make ala matũlaa mbalasi.

23Asu maĩ anene mbee ĩũlũ wa wĩa wa Solomoni, maana atano na mĩongo ĩtano, ala masumbĩkaa andũ ala matethasya wĩa.

24Ĩndĩ mwĩĩtu wa Valao ambata kuma ndũanĩ ya Ndaviti aende nyũmbanĩ yake ĩla Solomoni wamwakĩe: na ĩndĩ aaka Milo.

25Na Solomoni nĩwathembaa nthembo sya kũvĩvw’a na nthembo sya mũuo kĩthembeonĩ kĩla wamwakĩe Yeova katatũ kĩla mwaka, aitoeanĩsya ũvani vamwe nasyo, kĩthembeonĩ kĩla kyaĩ mbee wa Yeova. Aminie ĩla nyũmba ũu.

26Na mũsumbĩ Solomoni aseũvĩsya kĩkundi kya ngalawa ku Esioni‐ngeveli, ĩla yĩ vakuvĩ na Elothi, ngũkanĩ ya Ũkanga Mũtune, nthĩ ya Etomu.

27Na i ngalawanĩ Ilamu atũma athũkũmi make, andũ ma ngalawa ala maĩ na ũmanyi wa ũkanga, vamwe na athũkũmi ma Solomoni.

28Na mavika Ovilu, na maumya kw’o thaavu, talendi maana ana na mĩongo ĩlĩ, na mooete kwa mũsumbĩ Solomoni.

← Chapter 8 Jump to: Chapter 10 →