1 Kings 4

Kamba (Mbivilia) 1956

← Chapter 3 Jump to: Chapter 5 →

1Na mũsumbĩ Solomoni aĩ mũsumbĩ wa Isilaeli onthe.

2Na aa nĩmo anene me mbee ũsumbĩnĩ ala waĩ nao: Asalia mwana wa mũthembi Nzatoki;

3Eliolevu na Aiya, ana ma Sisa, aandĩki; Yeosavati mwana wa Ailuti, mũandĩki wa maũndũ;

4na Mbenaia mwana wa Yeoiata aĩ mũnene wa nguthu; na Nzatoki na Aviathali maĩ athembi;

5na Asalia mwana wa Nathani aĩ ĩũlũ wa anene; na Nzavuti mwana wa Nathani aĩ mũnene ũsumbĩkinĩ, na mũnyanyae wa mũsumbĩ;

6na Aisali aĩ mũnene wa andũ ma nyũmba; na Atonilamu mwana wa Avata aĩ mũnene wa andũ ala matethethaw’a wĩa wa vinya.

7Na Solomoni aĩ na anene ĩkũmi na elĩ ĩũlũ wa Isilaeli onthe, ala maetae lĩu wa mũsumbĩ na andũ ma nyũmba yake: kĩla mũndũ aetae lĩu wa mwei ũmwe katĩ wa mwaka.

8Na aa nĩmo masyĩtwa moo: Mbeni‐uulu wa nthĩ yĩ iĩma ya Evalaimu;

9na Mbeni‐ndekeli wa ku Makasi, na Saalivimu, na Mbethi‐semesi, na Elonimbethi‐aanani;

10na Mbeni‐eseti, ku Aluvothi (Soko yaĩ yake na nthĩ yonthe ya Eeveili);

11na Mbeni‐avinatavu ku ũtũlunĩ w’onthe wa Ndoli (nake atwaĩte Tavathi mwĩĩtu wa Solomoni);

12na Mbaana mwana wa Ailuti, ku Taanaki na Mekito, na Mbethi‐seani yonthe ĩla yĩ ũtee wa Nzalethani, ĩtheo wa Yesileeli, kuma Mbethi‐seani kũvika Aveli‐meola, o kũvĩtĩla Yokimeamu;

13na Mbeningeveli, ku Lamothi‐ngileati (tũtũla twa Yaili mwana wa Manase, tũla twĩ Ngileati twaĩ twake; o na nthĩ ya Alikovu yaĩ yake, ĩla yĩ Mbasani, yĩ ndũa nene mĩongo thanthatũ syĩ na maũvai na ivingi sya ũthuku);

14na Ainatavu mwana wa Ito, ku Maanaimu;

15na Aimaasi, ku Navitali (nake nĩwatwaie Mbasemathi mwĩĩtu wa Solomoni);

16na Mbaana mwana wa Usiai, ku Aseli na Mbealothi;

17na Yeosavati mwana wa Valua, ku Isakali;

18na Simei mwana wa Ela, ku Mbenyamini;

19na Ngeveli mwana wa Uli, ku nthĩ ya Ngileati, o nthĩ ya Sioni mũsumbĩ wa Aamoli na ya Oku mũsumbĩ wa Mbasani; nake aĩ mũnene e weka ũla waĩ nthĩ ĩsu.

20Yuta na Isilaeli maĩ aingĩ o ta kĩthangathĩ kĩla kĩ ũtee wa ũkanga kwingĩva, makĩĩsaa na kũnyusaa na kũtanaa.

21Na Solomoni asumbĩkĩte mosumbĩ onthe kuma ũla Ũsĩ kũvika nthĩ ya Avilisiti, na kũvika mũvakanĩ wa Misili: maetae mũvothi na mamũthũkũmaa Solomoni mĩthenya yonthe ya thayũ wake.

22Na lĩu wa Solomoni wa mũthenya ũmwe waĩ ithimi mĩongo ĩtatũ sya mũtu mũvinyu, na ithimi mĩongo thanthatũ sya mũtu ũte mũvinyu,

23na ng’ombe nou ĩkũmi, na ng’ombe mĩongo ĩlĩ kuma isesinĩ, na malondu ĩana, vamwe na ndaatai nzamba, na ilong’a, na nthwaia nga, na ngũkũ nou.

24Nũndũ nĩwasumbĩkĩte nthĩ yonthe yĩ mũingo ũũ wa ũla Ũsĩ, kuma Tivisa o na kũvika Ngasa, o na asumbĩ onthe ala maĩ mũingo ũũ wa ũla Ũsĩ: na aĩ na mũuo ngalĩ syonthe ila syamũthyũlũlũkĩte.

25Na Yuta na Isilaeli mekalaa vate mũisyo, kĩla mũndũ ĩtina wa mũsavivũ wake na ĩtina wa mũkũyũ wake, kuma Ndani kũvika Mbeeli‐sieva, mĩthenya yonthe ya Solomoni.

26Na Solomoni aĩ na itũũ ngili mĩongo ĩna sya mbalasi kwondũ wa makasya make, na andũ ngili ĩkũmi na ilĩ ala matũlaa mbalasi.

27Na anene asu maetae, kĩla mũndũ mwei wake, lĩu wa mũsumbĩ Solomoni, na wa onthe ala maĩsaa mesanĩ ya mũsũmbĩ Solomoni; matyaaeka kĩndũ kĩoleke.

28Maetae mbaale nayo na ũa vu vala vaĩ anene kwondũ wa mbalasi na mbalasi syĩ maũũ, kĩla mũndũ kwĩanana na wĩaĩo wake.

29Na Ngai amũnenga Solomoni ũĩ na ũmanyi mwingĩ mũno, na ngoo mbaamu, o ta kĩthangathĩ kĩ ũtee wa ũkanga.

30Na ũĩ wa Solomoni wavĩtũkĩte ũĩ wa ana onthe ma wumilonĩ wa syũa, na ũĩ w’onthe wa Misili.

31Nũndũ aĩ mũĩ kwĩ andũ onthe; kwĩ Ethani Mũesalai, na Emani, na Kalikoli, na Ndalita, ana ma Maoli: na nguma yake yavikĩa mbaĩ syonthe ila syaĩ ngalĩ syonthe.

32Na aneena nthimo ngili itatũ; na mbathi syake syaĩ ngili na itano.

33Na aneena ũvoo wa mĩtĩ, kuma mũkũũ ũla wĩ Levanoni kũvika ĩsovo yĩla yĩmeaa ũvainĩ: o na aneena ũvoo wa nyamũ, na nyũnyi, na tũsamũ tũla tũtambũkaa, na makũyũ.

34Na andũ ma mbaĩ syonthe mooka mew’e ũĩ wa Solomoni, kuma kwa asumbĩ onthe ma nthĩ, ala meew’ĩte ũvoo wa ũĩ wake.

← Chapter 3 Jump to: Chapter 5 →