1 Kings 8 — Kamba (Mbivilia) 1956

1Nĩvo ĩndĩ Solomoni wombanisye atumĩa ma Isilaeli, na atongoi onthe ma i mbaĩ, anene ma nyũmba sya aaĩthe ma ana ma Isilaeli, vala ve mũsumbĩ Solomoni Yelusaleme, mambatye ĩsandũkũ ya ũtianĩo ya Yeova kumya ndũanĩ ya Ndaviti, nayo nĩ Saioni.

5Na mũsumbĩ Solomoni na ũmbano w’onthe wa Isilaeli, ũla woombanĩte kwake, waĩ vamwe nake mbee wa ĩsandũkũ, ũkĩthemba malondu na ng’ombe, ila itaĩ italĩka kana kũtalwa nũndũ wa kwingĩva.

6Na athembi malikya ĩsandũkũ ya ũtianĩo ya Yeova nthĩnĩ vandũ vayo, nthĩnĩ wa vala vandũ va ũneenea va nyũmba, kũvika vala vandũ vatheu mbee, o ungu wa nthwau sya akeluvi.

7Nũndũ akeluvi matambũũkĩtye nthwau syoo ĩũlũ wa vala vandũ va ĩsandũkũ, na akeluvi mayĩvw’ĩkĩte ĩsandũkũ ĩũlũ na mĩtĩ yayo.

8Na ĩ mĩtĩ yaĩ mĩasa ũndũ mĩthya yayo nĩyenekee vala vandũ vatheu vu mbee wa vala vandũ va ũneenea; ĩndĩ ndĩaaoneka ũtee; na nĩvo ĩĩ kũvika ũmũnthĩ.

9Kũtyaĩ kĩndũ ĩsandũkũnĩ ate o ala masengea elĩ ma mavia ala Mose wamekĩĩe ku Olevu, yĩla Yeova watianĩe ũtianĩo na ana ma Isilaeli, yĩla maumie nthĩ ya Misili.

10Na kweethĩwa, yĩla athembi maĩ manauma vala vandũ vatheu, mũumbĩ wausũa nyũmba ya Yeova,

11mũvaka athembi matyaatonya kũũngama mathũkũme nũndũ wa mũumbĩ; nũndũ ũtheu mũtisu wa Yeova wausũĩte nyũmba ya Yeova.

12Nĩvo ĩndĩ Solomoni waneenie, Yeova aĩtye atĩ akekala kĩvindunĩ kya ngokomi.

13Nĩ w’o, nĩngwakĩĩte nyũmba ya kwĩkala, vandũ vaku va kwĩkalaa tene na tene.

14Na mũsumbĩ athyũũa ũthyũ wake, na aathima ũmbano w’onthe wa Isilaeli: na ũmbano w’onthe wa Isilaeli waũngama.

15Na asya, Nataĩwe Yeova, Ngai wa Isilaeli, ũla waneenie na kanyw’a wake na Ndaviti ĩthe wakwa, na nĩwĩanĩĩtye na kw’oko kwake, akyasya,

16Kuma mũthenya ũla naumisye andũ makwa Isilaeli nthĩ ya Misili, ndyaanyuva ndũa o na yĩva mbaĩnĩ syonthe sya Isilaeli nake nyũmba vo, nĩ kana syĩtwa yakwa yĩthĩwe vo; ĩndĩ nĩnĩnyuvĩte Ndaviti ethĩwe mũnene wa andũ makwa Isilaeli.

17Na ĩndĩ kwaĩ ngoonĩ ya ĩthe wakwa Ndaviti kwaka nyũmba kwondũ wa syĩtwa ya Yeova, Ngai wa Isilaeli.

18Ĩndĩ Yeova amwĩa Ndaviti ĩthe wakwa, Nĩkwĩthĩwa kwaĩ ngoonĩ yaku kwaka nyũmba kwondũ wa syĩtwa yakwa, nĩweekie nesa nũndũ kwaĩ ngoonĩ yaku:

19ĩndĩ ndũkaka nyũmba ĩsu; ĩndĩ mwana waku ũla ũkauma kĩnyunyunĩ kyaku, nĩwe ũkaka ĩ nyũmba kwondũ wa syĩtwa yakwa.

20Na Yeova nũlũlũmĩlye ndeto yake ĩla waneenie; nũndũ nyie nĩũngamĩte vandũ va Ndaviti ĩthe wakwa, na nĩnĩkalĩte kĩvĩlanĩ kya ũsumbĩ kya Isilaeli, o tondũ Yeova wathie, na nĩnakĩte nyũmba kwondũ wa syĩtwa ya Yeova, Ngai wa Isilaeli.

21Na nĩvo niĩte vandũ kwondũ wa yĩla ĩsandũkũ, yĩla nthĩnĩ wayo ve ũtianĩo wa Yeova, ũla watianĩe na aaĩthe maitũ, yĩla wamaumisye nthĩ ya Misili.

22Na Solomoni aũngama mbee wa kĩthembeo kya Yeova ũmbano w’onthe wa Isilaeli wene, na atambũũkya moko make melekele ĩtunĩ;

23na asya, Ame Yeova, Ngai wa Isilaeli, vati Ngai taku, ĩũlũ ĩtunĩ, kana ĩtheo nthĩ; ũla wĩanĩasya ũtianĩo na ũseo wĩ wendo kwa athũkũmi maku, ala maendaa mbee waku na ngoo syoo syonthe;

24ũla wĩanĩĩtye kwa mũthũkũmi waku Ndaviti ĩthe wakwa ũndũ wamwathie: ĩĩ, nĩwaneenie na kanyw’a waku, na nĩwĩanĩĩtye na kw’oko kwaku, o tondũ kũilyĩ ũmũnthĩ.

25Yu kwondũ wa ũu, ame Yeova, Ngai wa Isilaeli, ĩanĩsya kwa mũthũkũmi waku Ndaviti ĩthe wakwa ũndũ wamwathie, ũkĩmwĩa, Ndũkaĩwa nĩ mũndũ wa kwĩkalaa kĩvĩlanĩ kya ũsumbĩ kya Isilaeli mbee wakwa, ethĩwa syana syaku no ikasũvĩaa mũendele wasyo, ikinyae mbee wakwa o tondũ we wakinyaa mbee wakwa.

26Yu ĩndĩ, ame Ngai wa Isilaeli, nĩngũkũvoya, ndeto yaku nĩyĩanĩe w’o, ĩla waneenie na mũthũkũmi waku Ndaviti ĩthe wakwa.

27Ĩndĩ nĩ w’o, Ngai akekala kũũ nthĩ? Sisya, ĩtu na ĩtu yĩla yĩ ĩũlũ wa matu yĩtitonya ũkwĩanĩa; nyũmba ĩno ĩla nakĩte ĩtonya ata!

28Ĩndĩ elekela kũvoya kwa mũthũkũmi waku, na kwĩsũvana kwake, ame Yeova Ngai wakwa, wĩthukĩĩsye kĩĩo na kũvoya kũla mũthũkũmi waku ũnũũvoya e mbee waku ũmũnthĩ;

29nĩ kana metho maku methĩwe masalukĩtye melekele nyũmba ĩno ũtukũ na mũthenya, o kwelekela vandũ vala wawetie atĩĩ, Syĩtwa yakwa yĩkeethĩwa vo; wĩthukĩĩsye kũvoya kũla mũthũkũmi waku wĩvoya elekele vandũ vaa.

30Na ĩthukĩĩsye wĩsũvano wa mũthũkũmi waku, na wa andũ maku Isilaeli, yĩla mevoya melekele vandũ vaa: ĩĩ, wĩĩw’a wĩ ĩtunĩ ũtũonĩ waku; na weew’a, wĩekea.

31Ethĩwa mũndũ akavĩtanĩsya mũtũi wake, na akiĩwa kĩavo nĩ kana aavĩthw’e, nake akyũka na kwĩavĩa mbee wa kĩthembeo kyaku nyũmbanĩ ĩno;

32nĩvo ĩndĩ wĩĩthukĩĩsya wĩ ĩtunĩ, wĩke, noisilan’ya athũkũmi maku, ũkĩsilĩla ũla mũthũku, ũete mũendele wake ĩũlũ wa mũtwe wake mwene, na ũimũtalĩla ũlũngalu ũla mũlũngalu, ũmũnenge kwĩanana na ũlũngalu wake.

33Yĩla andũ maku Isilaeli makakũnwa mavalũkw’e nĩ mũmaitha, nĩkwĩthĩwa nĩmakũvĩtanĩsye; ethĩwa makakwĩthyũũĩa ĩngĩ, na kumbũla syĩtwa yaku, na kũvoya na ũkwĩsũvĩa nyũmbanĩ ĩno:

34nĩvo ĩndĩ wĩĩthukĩĩsya wĩ ĩtunĩ, noiekea naĩ ya andũ maku Isilaeli, na kũmatũnga ĩngĩ nthĩ ĩla wanengie aaĩthe moo.

35Yĩla ĩtu ĩvinge, na kũte mbua, nĩkwĩthĩwa nĩmakũvĩtanĩsye; ethĩwa makavoya melekele vandũ vaa, na kumbũla syĩtwa yaku, na kwĩthyũũa kũtia naĩ syoo, yĩla ũkamathĩn’ya:

36nĩvo ĩndĩ wĩĩthukĩĩsya wĩ ĩtunĩ, noiekea naĩ ya athũkũmi maku, na ya andũ maku Isilaeli, yĩla wĩmamanyĩasya nzĩa nzeo ĩla maĩle kũthi nayo; na wĩusya mbua nthĩ yaku, ĩla wamanengie andũ maku yĩthĩwe ũtiĩwa.

37Ethĩwa kũkeethĩwa yũa ĩ nthĩ, ethĩwa kũkeethĩwa mũimũ, ethĩwa kũkeethĩwa wũmanĩlu kana mbuka, ngie kana kĩthesa; ethĩwa mũmaitha woo akamathyũlũlũka amatw’ĩkanĩsye me nthĩ yĩ ndũa syoo; ũthĩn’yo o na wĩva, ũwau o na wĩva ũla ũkethĩwa;

38kũvoya na kwĩsũvana o na kwĩva kũla kũkavoywa nĩ mũndũ o na wĩva, kana nĩ andũ maku onthe Isilaeli, kĩla mũndũ o ũla ũkamanya ũthĩn’yo wa ngoo yake mwene, na akĩtambũũkya moko make melekele nyũmba ĩno:

39nĩvo ĩndĩ wĩĩthukĩĩsya wĩ ĩtunĩ ũtũonĩ waku, noiekea, na kwĩka, na kũmũnenga kĩla mũndũ kwĩanana na mĩendele yake yonthe, ũla wĩsĩ ngoo yake; (nũndũ we, o we wĩ weka, nĩwĩsĩ ngoo sya mbaa‐andũ onthe;)

40nĩ kana maũkĩe mĩthenya yonthe ĩla makekala nthĩ ĩla wamanengie aaĩthe maitũ.

41O na ĩngĩ ũvoo wa mũndũ wa nthĩ ĩngĩ, ũla ũte wa andũ maku Isilaeli, yĩla ũkoka kuma nthĩ yĩ kũasa kwondũ wa syĩtwa yaku

42(nũndũ makeew’a ũvoo wa syĩtwa yaku ĩnene, na wa kw’oko kwaku kwĩ vinya, na kw’oko kwaku kũtambũũku); yĩla ũkoka na kũvoya elekele nyũmba ĩno;

43wĩĩthukĩĩsya wĩ ĩtunĩ ũtũonĩ waku, nokĩka kwĩanana na w’onthe ũla mũndũ ũsu wa nthĩ ĩngĩ ũkakwĩtya; nĩ kana ngo syonthe sya andũ ma nthĩ matonye kũmanya syĩtwa yaku, maũkĩe, o tondũ andũ maku Isilaeli mekaa, na nĩ kana matonye kũmanya atĩ nyũmba ĩno ĩla nakĩte nĩyĩtanĩaw’a na syĩtwa yaku.

44Ethĩwa andũ maku makaumaala maende kũkita na mũmaitha woo, na nzĩa o na yĩva ĩla wĩmatũma maende nayo, na makavoya Ngai melekele ĩ ndũa ĩla ũnyuvĩte, na melekele nyũmba ĩno nakĩte kwondũ wa syĩtwa yaku;

45nĩvo ĩndĩ wĩĩthukĩĩsya wĩ ĩtunĩ kũvoya kwoo na kwĩsũvana kwoo, noimaseũvĩasya ũvoo woo.

46Ethĩwa makakũvĩtanĩsya (nũndũ vati mũndũ ũtavĩtasya), na ũkamathatĩa, na kũmanengane kwa mũmaitha, nao makamatwaa me atave nthĩ ya amaitha, yĩ kũasa kana vakuvĩ;

47ethĩwa ĩndĩ me nthĩ ĩsu vala matwaiwe me atave makalilikana, na kwĩthyũũa, na ũkwĩsũva me nthĩ ya asu ala mamatavie makyasya, Nĩtũvĩtĩtye, na nĩtwĩkĩte na ngũlũ nĩtwĩ kĩte ũthũku;

48ethĩwa makakũsyokea na ngoo syoo syonthe na thayũ woo w’onthe me nthĩ ya amaitha moo, ala mamatavie, na makakũvoya melekele nthĩ yoo, ĩla wanengie aaĩthe moo, na ndũa ĩla wanyuvie, na nyũmba ĩla nakĩte kwondũ wa syĩtwa yaku:

49nĩvo ĩndĩ wĩĩthukĩĩsya kũvoya kwoo na kwĩsũvana kwoo wĩ ĩtunĩ ũtũonĩ waku, noimaseũvĩsya ũvoo woo;

50noimaekea andũ maku ala makũvĩtanĩsye, na mavĩtyo moo onthe ala makũvĩtanĩsye; noĩmonea ĩnee kwa ala mamatwaie me atave, nĩ kana nao mamew’ĩe ĩnee

51(nũndũ nĩ andũ maku, na ũtiĩwa waku, ala wamaumisye nthĩ ya Misili, kuma ikonĩ ĩnene ya iaa);

52nĩ kana metho maku methĩwe masalukĩlye wĩsũvano wa mũthũkũmi waku, na wĩsũvano wa andũ maku Isilaeli, ũmethukĩĩsye o yĩla makakwĩkaĩla.

53Nũndũ nĩwamavathie kũmaumya ngonĩ syonthe sya andũ ma nthĩ, methĩwe ũtiĩwa waku, o tondũ waneenie na kanyw’a wa Mose mũthũkũmi waku, yĩla wamaumisye aaĩthe maitũ Misili, ame Mwĩaĩi Yeova.

54Na kweethĩwa yĩla Solomoni waminie kũmũvoya Yeova mboya ĩsu yonthe na wĩsũvano, ookĩla kuma mbee wa kĩthembeo kya Yeova, kuma kũtulya ndũnĩ kwake na moko make matambũũkĩte melekele ĩtunĩ.

55Na aũngama na ooathima ũmbano w’onthe wa Isilaeli na wasya mũnene, akyasya,

56Nataĩwe Yeova, ũla ũmathũmũĩtye andũ make Isilaeli, kwĩanana na w’onthe ũla wathie: kũtyaalea kwĩanĩw’a ndeto o na ĩmwe ya watho wake w’onthe mũseo, ũla wathie na kanyw’a wa Mose mũthũkũmi wake.

57Yeova Ngai waitũ nĩethĩwe vamwe naitũ, o tondũ waĩ vamwe na aaĩthe maitũ: ndakaatũeke, kana kũtũtia;

58nĩ kana elekelye ngoo sitũ vala ũĩ, tũendae nzĩanĩ syake syonthe na kũkwataa mĩao yake, na myamũlo yake, na motw’ĩo make, ala wameaĩe aaithe maitũ.

59Na ndeto iĩ syakwa ila namwĩsũva Yeova nasyo, nĩsyĩthĩwe vakuvĩ na Yeova Ngai waitũ mũthenya na ũtukũ, nĩ kana aseũvye ũvoo wa mũthũkũmi wake, na ũvoo wa andũ make Isilaeli, o tondũ kĩla mũthenya wĩan’ya vata;

60nĩ kana ngo syonthe sya andũ ma nthĩ imanye Yeova, kana nĩwe Ngai; vati ũngĩ.

61Kwondũ wa ũu ngoo syenyu nĩsyĩthĩwe mbĩanĩu kwa Yeova Ngai waitũ, mũendae myamũlonĩ yake na kũkwataa mĩao yake, o tondu kũilyĩ ũmũnthĩ.

62Na mũsumbĩ, na Isilaeli onthe vamwe nake, mathemba nthembo vu mbee wa Yeova.

63Na Solomoni athemba nthembo ya nthembo sya mũuo, ila wamũthembee Yeova, ng’ombe ngili mĩongo ĩlĩ na ilĩ, na malondu ngili ĩana na mĩongo ĩlĩ. Ũu nĩw’o mũsumbĩ na ana onthe ma Isilaeli mamĩvathanisye nyũmba ya Yeova yĩthĩwe ntheu.

64Mũthenya o ũsu mũsumbĩ avathan’ya vethĩwe vatheu vu nza katĩ ĩla yaĩ mbee wa nyũmba ya Yeova; nũndũ nĩwathembee vo nthembo ya kũvĩvw’a, na nthembo ya mũtu, na mathunya ma nthembo sya mũuo, nũndũ kĩthembeo kya ũthuku kĩla kyaĩ mbee wa Yeova kyaĩ kĩnini ũndũ kĩtatonya kwĩanĩa nthembo ya kũvĩvw’a, na nthembo ya mũtu, na mathunya ma nthembo sya mũuo.

65Ũu nĩw’o Solomoni wavokie mboka ĩvinda yĩu, na Isilaeli onthe vamwe nake, ũmbano mũnene, kuma ũlikĩlonĩ wa Amathi kũvika kalũsĩ ka Misili, me mbee wa Yeova Ngai waitũ, mĩthenya mũonza na mĩthenya mũonza, o mĩthenya ĩkũmi na ĩna.

66Mũthenya wa nyanya oombũũkya andũ; na mamũtaĩa mũsumbĩ, na mathi maeemanĩ moo me na ũtanu na mũyo ngoonĩ nũndũ wa ũseo w’onthe ũla Yeova ũmwonetye Ndaviti mũthũkũmi wake, na Isilaeli andũ make.