1 Kings 21

Kamba (Mbivilia) 1956

← Chapter 20 Jump to: Chapter 22 →

1Na kweethĩwa ĩtina wa maũndũ asu, Navothi Mũyesileeli aĩ na mũũnda wa mĩsavivũ, ũla waĩ Yesileeli, vakuvĩ mũno na nyũmba nene mbanakavye ya Aavu mũsumbĩ wa Samalia.

2Na Aavu aneena na Navothi, akĩmwĩa, Nenga mũũnda waku wa mĩsavivũ nĩ kana nĩthĩwe naw’o wĩthĩwe mũũnda wa nyũnyi, nĩkwĩthĩwa wĩ vakuvĩ na nyũmba yakwa; na vandũ vaw’o ngakũnenga mũũnda mũseo wa mĩsavivũ kwĩ w’o: kana ethĩwa nũkwona nĩ ũseo, ngakũnenga mbesa sya thooa waw’o.

3Na Navothi amwĩa Aavu, Yeova ndakandeke nĩkũnenge ũtiĩwa ũla natiĩwe nĩ aaĩthe makwa.

4Na Aavu alika nyũmbanĩ yake atakinyĩkya na e na woo nũndũ wa ndeto ila Navothi Mũyesileeli wamũtavya; nũndũ nĩwasya, Ndikũnenga ũtiĩwa ũla natiĩwe nĩ aaĩthe makwa. Na akoma ũkomonĩ wake, na athyũũa ũthyũ wake, na alea kũya lĩu.

5Ĩndĩ Yeseveli kĩveti kyake kyamũkĩa na kyamũkũlya, Nũndũ wa kĩ veva waku wĩ na woo, ũndũ ũũlea kũya lĩu?

6Nake amwĩa, Nũndũ nĩnĩneenie na Navothi Mũyesileeli, na namwĩa, Nenga mũũnda waku wa mĩsavivũ ũndũ wa mbesa; kana ngũnenge mũũnda ũngĩ vandũ vaw’o, ethĩwa ũũ nũkwendeesya: na asũngĩa, Ndikũnenga mũũnda wakwa wa mĩsavivũ.

7Na Yeseveli kĩveti kyake kyamũkũlya, Yu nũkũsumbĩka ũsumbĩ wa Isilaeli? Ũkĩla, ũye lĩu, na tana ngoo yaku: ngakũnenga mũũnda wa mĩsavivũ wa Navothi Mũyesileeli.

8Na ĩndĩ aandĩka mavalũa syĩtwanĩ ya Aavu, na amasiĩla na ũsiĩlo wake, na amatwaĩa atumĩa, na anene me ndaĩa ala maĩ ndũanĩ yake, na ala matwĩe vamwe na Navothi, mavalũa asu.

9Na aandĩka mavalũa asu, akyasya, Tavan’yai kũtĩĩa ũya, na mwiei Navothi okĩlĩtw’e katĩ wa andũ:

10na iai andũ elĩ mbee wake, andũ athe, na nĩmamũkũsĩĩe, makyasya, Nĩwamũuma Ngai na mũsumbĩ. Na ĩndĩ mũmumaalyei nza, na mũimũkima na mavia akw’e.

11Na andũ ma ndũa yake, o atumĩa na anene me ndaĩa ala matwĩe ndũanĩ yake, meeka o tondũ Yeseveli watũmanĩte kwoo, kwĩanana na ũndũ kwaandĩkĩtwe mavalũanĩ ala wamatwaĩĩte.

12Matavan’ya kũtĩĩa ũya, na maia Navothi okĩlĩtw’e katĩ wa andũ.

13Na ala andũ elĩ, ala athe, malika na mekala nthĩ mbee wake: na andũ asu athe makũsĩĩa, o ĩũlũ wa Navothi, andũ mene, makyasya, Navothi nũmũumĩte Ngai na mũsumbĩ. Na ĩndĩ mamumaalya ũtee wa ndũa, na mamũkimanga na mavia akw’a.

14Nĩvo ĩndĩ matũmanie kwa Yeseveli, makĩmwĩa, Navothi nĩwakimangwa na mavia, na nĩ mũkw’ũ.

15Na kweethĩwa, yĩla Yeseveli wewie Navothi nĩwakimangwa na mavia, na akw’a, Yeseveli amwĩa Aavu, Ũkĩla, wose mũũnda wa mĩsavivũ wa Navothi Mũyesileeli wĩthĩwe waku, ũla waleile ũkũnenga kwondũ wa mbesa; nũndũ Navothi nde thayũ, ĩndĩ nĩ mũkw’ũ.

16Na kweethĩwa, yĩla Aavu wewie atĩ Navothi nĩ mũkw’ũ, Aavu ookĩla atheee mũũndanĩ wa mĩsavivũ wa Navothi Mũyesileeli, awose wĩthĩwe wake.

17Na ndeto ya Yeova yamũkĩa Eliya Mũtisivi, ĩkĩmwĩa,

18Ũkĩla, ũtheee ũkomane na Aavu mũsumbĩ wa Isilaeli, ũla ũtwĩe Samalia: sisya, e mũũndanĩ wa mĩsavĩvũ wa Navothi, vala ũtheeete awose wĩthĩwe wake.

19Na ũkaneene nake, ũkĩmwĩa, Ũũ nĩw’o Yeova ũnũkwasya, Nĩwũaĩte, o na kwosa? Na ũkaneene nake, ũkĩmwĩa, Ũũ nĩw’o Yeova ũnũkwasya, Vandũ vala ngitĩ ĩnalambalambĩlye nthakame ya Navothi, vo ngitĩ ikalambalambĩlya nthakame yaku, o yaku.

20Na Aavu amũkũlya Eliya, Nũmbonete, we mũmaitha wakwa? Na asũngĩa, Nĩnĩkwonete, nĩkwĩthĩwa nĩwĩthooetye wĩke ũla Yeova wonaa wĩ ũthũku.

21Sisya, ngakũetee ũthũku, na ngakũtuta vyũ na ngaveta kwa Aavu kĩla mwana mũũme, na ũla wĩĩthĩwa e mwove na ũla wĩĩthĩwa ate mwove nthĩnĩ wa Isilaeli:

22na ngatw’ĩkĩthya nyũmba yaku ta nyũmba ya Yelovoamu mwana wa Nevati, na ta nyũmba ya Mbaasa mwana wa Aiya nũndũ wa ũthatyo ũla wanthatĩtye naw’o, na ũla wamavĩtĩthĩtye Isilaeli naw’o.

23O na Yeova aneena ũndũ wa Yeseveli, akyasya, Ngitĩ ikaĩĩa Yeseveli vakuvĩ na ũvai mũlũmu wa Yesileeli.

24Ũla wa Aavu ũla ũkakw’ĩa ndũanĩ ngitĩ ikaya; na ũla ũkakw’ĩa kĩthekanĩ nyũnyi sya yayaya ikaya.

25(Ĩndĩ kũtyaĩ mũndũ o na wĩva wailyĩ Aavu, ũla weethooisye eke ũla Yeova wonaa wĩ ũthũku, ũla Yeseveli kĩveti kyake kyamũthokoanisye.

26Na eeka ũla ũthatasya akĩatĩĩa mĩvw’anano, kwĩanana na w’onthe ũla Aamoli meekaa, ala Yeova wamalũngilye mbee wa ana ma Isilaeli.)

27Na kweethĩwa, yĩla Aavu wewie ndeto isu, atembũanga ngũa syake, na eevw’ĩka makunia mwĩĩ wake, na atĩĩa ũya, na akomea makunia, na aenda eyondetye.

28Na ndeto ya Yeova yamũkĩa Eliya Mũtisivi, ĩkĩmwĩa,

29Nĩwene ũndũ Aavu ũkwĩnyivya mbee wakwa? Nũndũ nũkwĩnyivya mbee wakwa, ndikaete ũthũku ũsu mĩthenyanĩ yake; ĩndĩ mĩthenyanĩ ya mwana wake ngaete ũthũku ũsu nyũmbanĩ yake.

← Chapter 20 Jump to: Chapter 22 →