1 Kings 19

Kamba (Mbivilia) 1956

← Chapter 18 Jump to: Chapter 20 →

1Na Aavu amũtavya Yeseveli w’onthe ũla Eliya wĩkie, o na ũndũ wũaie athani onthe na ũvyũ.

2Nĩvo ĩndĩ Yeseveli watũmie mũtũmwa vala ve Eliya, akĩmwĩa, Ngai nimbĩke ũu, o na mbee, ethĩwa nditw’ĩkĩthya thayũ waku ta thayũ wa ũmwe wa asu ũnĩ ta yu.

3Na yĩla wonie ũu, ookĩla, na aenda atangĩĩe thayũ wake, na avika Mbeeli‐sieva, ĩla ya Yuta, na amũtia mũthũkũmi wake kw’o.

4Ĩndĩ we mwene athi kyalo kya mũthenya ũmwe weũnĩ, na avika na ekala nthĩ ĩtina wa mũtĩ wa mũlutemu: na eevoyea akw’e, na asya, Nũu; yu, ame Yeova, osa thayu wakwa; nũndũ ndi mũseo kwĩ aaĩthe makwa.

5Na akoma too ĩtina wa mũtĩ wa mũlutemu; na, sisya, mũlaĩka amũkiita, na amwĩa, Ũkĩla ũye.

6Na asisya, na, kaĩ, kwaĩ kamũtũ kakaangĩwe makaanĩ, o na sũva wa manzĩ mũtwenĩ wake. Na aya na anyw’a, na akoma ĩngĩ.

7Na mũlaĩka wa Yeova ooka ĩngĩ ya kelĩ, na amũkiita, na amwĩa, Ũkĩla ũye, nũndũ kyalo nĩ kĩvĩtũku vinya waku.

8Na ookĩla, na aya na anyw’a, na aenda na vĩnya wa lĩu ũsu mĩthenya mĩongo ĩna na matukũ mĩongo ĩna kũvika Olevu kĩĩma kya Ngai.

9Na avika vau ngunganĩ, na akoma vo; na, sisya, ndeto ya Yeova yamũkĩa, na amũkũlya, Wĩĩka ata vaa, Eliya?

10Na asũngĩa, Nĩnaĩ na kĩwĩu kingĩ kwondũ wa Yeova, Ngai wa nguthu; nũndũ ana ma Isilaeli nĩmatiĩte ũtianĩo waku, na maomboangĩte ithembeo syaku, na moaĩte athani maku na ũvyũ: na nyie, o nyie nĩ nyioka, nĩtialĩte; na nĩmeũmantha thayũ wakwa, movete.

11Na asya, Umaala, noiũngama kĩĩmanĩ mbee wa Yeova. Na, sisya, Yeova avĩta, na kĩseve kĩnene na kĩ vinya kyaatũa iĩma, na kyaatũanga mavia ilungu mbee wa Yeova; ĩndĩ Yeova ndaĩ kĩsevenĩ: na ĩtina wa kĩseve kwaĩ kĩtetemo kya nthĩ; ĩndĩ Yeova ndaĩ kĩtetemonĩ kya nthĩ:

12na ĩtina wa kĩtetemo kya nthĩ kwaĩ mwaki; ĩndĩ Yeova ndaĩ mwakinĩ: na ĩtina wa mwaki kwaĩ wasya mũnini mũuu.

13Na kweethĩwa, yĩla Eliya wawĩwie, alingĩla ũthyũ wake suka wake, na aumaala, na aũngama ũlikĩlonĩ wa ngunga. Na sisya, ookĩwa nĩ wasya, naw’o wasya, Wĩĩka ata vaa, Eliya?

14Nake asũngĩa, Nĩnaĩ na kĩwĩu kingĩ kwondũ wa Yeova, Ngai wa nguthu; nũndũ ana ma Isilaeli nĩmatiĩte ũtianĩo waku, na maomboangĩte ithembeo syaku, na moaĩte athani maku na ũvyũ; na nyie, o nyie nĩ nyioka, nĩtialĩte; na nĩmeũmantha thayũ wakwa, movete.

15Na Yeova amwĩa, Enda, syoka na nzĩa yaku ya weũnĩ wa Ndamasiku: na yĩla wĩvika kw’o, ũkamwĩtĩkĩsye Aasaeli mauta ethĩwe mũsumbĩ wa Silia;

16na ũkamwĩtĩkĩsye Yeu mwana wa Nimisi mauta ethĩwe mũsumbĩ wa Isilaeli; na ũkamwĩtĩkĩsye Elisa mwana wa Savati wa Avelimeola mauta ethĩwe mwathani vandũ vaku.

17Na kũkeethĩwa, ũla wĩvonoka ũvyũnĩ wa Aasaeli Yeu akamũaa; na ũla wĩvonoka ũvyũnĩ wa Yeu Elisa akamũaa.

18Ĩndĩ ngeetialĩlya ngili mũonza nthĩnĩ wa Isilaeli, ala ndu syoo syonthe itaatulĩlya Mbaali, na kĩla kanyw’a ũtaamĩmumunya.

19Na ĩndĩ auma vo, na oona Elisa mwana wa Savati, ũla wenzaa, e na syove ĩkũmi na ilĩ sya ng’ombe syĩ mbee wake, nake e o na kĩla kya ĩkũmi na ilĩ: na Eliya avĩtĩla vala ũĩ, na amwĩkĩsya suka wake.

20Na atia ng’ombe, na amũatĩĩa Eliya asembete, na asya, Nĩngũkwĩsũva, ndeka nĩende kũmamumunya nau na mwaitũ, na ĩndĩ ngakũatĩĩa. Na amwĩa, Syoka ĩngĩ; nũndũ nakwĩka ata?

21Na asyoka aeka ũmũatĩĩa, na oosa kyove kya ng’ombe, na asyũaa, na aua nyama syasyo na mĩio ya ila ng’ombe, na anenga andũ, na maya. Na ĩndĩ ookĩla, na amũvikĩla Eliya, na amũthũkũma.

← Chapter 18 Jump to: Chapter 20 →