2 Chronicles 15

Kamba (Mbivilia) 1956

← Chapter 14 Jump to: Chapter 16 →

1Na Veva wa Ngai ooka ĩũlũ wa Asalia mwana wa Oteti:

2na aumaala akomane na Asa, na amwĩa, Mbĩthukĩĩsya, Asa, na Yuta na Mbenyamini onthe: Yeova e nenyu, yĩla mwĩ nake; na ethĩwa nĩmũũmũmantha, akooneka kwenyu; ĩndĩ ethĩwa nĩmũũmũtia, akamũtia.

3Na ĩndĩ ĩvinda ĩasa Isilaeli matyaĩ na Ngai wa w’o, na matyaĩ na mũthembi wa kũmanyĩsya, na matyaĩ na mĩao:

4ĩndĩ yĩla mamwĩthyũũĩa Yeova, Ngai wa Isilaeli me thĩnanĩ na mamũmantha, nĩwonekie kwoo.

5Na mavinda asu kũtyaĩ mũuo kwa ũla waumaalaa kana kwa ũla wasyokaa; ĩndĩ mathĩna manene maĩ andũnĩ onthe ala matwĩe i nthĩ.

6Na nĩmavevenziwe mbaĩ nĩ mbaĩ, na ndũa nĩ ndũa; nũndũ Ngai nĩwamathĩnisye na thĩna w’onthe.

7Ĩndĩ ĩthĩwai na vinya, na moko menyu matikaleele; nũndũ wĩa wenyu ũkatuvwa.

8Na yĩla Asa wewie ndeto isu, na wathani wa mwathani Oteti, eethĩwa na ũkũmbaũ, na aveta mothatyo onthe nthĩ yonthe ya Yuta na Mbenya mini, na ndũanĩ ila wakwatie nthĩ yĩ iĩma ya Evalaimu; na atũngĩĩa kĩthembeo kya Yeova, kĩla kyaĩ ngali ya mbee ya valasya wa Yeova.

9Na oomban’ya Yuta na Mbenyamini onthe, na ala mekalaa ũeni kwoo kuma kwa Evalaimu na Manase, na kuma kwa Simeoni: nũndũ nĩmasyokie ngalĩ ĩla yake me aingĩ mũno kuma kwa Isilaeli, yĩla moonie kana Yeova Ngai wake e vamwe nake.

10Na ĩndĩ moombana Yelusaleme mwei wa katatũ, mwaka wa ĩkũmi na ĩtano wa kũsumbĩka kwa Asa.

11Na mamũthembea Yeova mũthenya ũsu ng’ombe maana mũonza na malondu ngili mũonza, sya mũtavo ũla maetie.

12Na matianĩa ũtianĩo mamũmanthe Yeova, Ngai wa aaĩthe moo, na ngoo syoo syonthe na thayũ woo w’onthe;

13na o ũla ũtakamũmantha Yeova, Ngai wa Isilaeli, akooawa, ethĩwa nĩ mũnini kana mũnene, ethĩwa nĩ mũndũ mũũme kana mũndũ mũka.

14Na mamwĩavĩa Yeova na wasya mũnene, na wasya mũtũlu, na masoo, na masoo makelemu.

15Na Yuta onthe matanĩa kĩla kĩavo; nũndũ nĩmeeavie na ngoo syoo syonthe, na mamũmantha na kwenda kwoo kw’onthe; nake ooneka kwoo: na Yeova amanenga kũthũmũa ngalĩ syonthe.

16O na Maaka, inyia wa mũsumbĩ Asa, amumya ndakethĩwe ũnenenĩ wa kĩũsumbĩ, nũndũ nĩwaseũvĩthĩtye mũvw’anano wa kũthatya wĩthĩwe wa Asela; na Asa atemanga mũvw’anano wake, na ootw’ĩkĩthya kĩtoo, na oovĩvĩsya kalũsĩnĩ ketawa Kitiloni.

17Ĩndĩ kũla kũndũ kũtũlu kũtyaavetwa katĩ wa Isilaeli: ĩndĩ o na ũu ngoo ya Asa yaĩ mbĩanĩu mĩthenya yake yonthe.

18Na aete nyũmbanĩ ya Ngai syĩndũ ila ĩthe wake waivathĩte syĩthĩwe ntheu, na ila we mwene wavathĩte syĩthĩwe ntheu, vetha, na thaavu, na mĩio.

19Na kũtyaĩ kaũ ĩngĩ kũvika mwaka wa mĩongo ĩtatũ na ĩtano wa kũsumbĩka kwa Asa.

← Chapter 14 Jump to: Chapter 16 →