2 Chronicles 7

Kamba (Mbivilia) 1956

← Chapter 6 Jump to: Chapter 8 →

1Na ĩndĩ Solomoni amina kũvoya, mwaki watheea kuma ĩtunĩ na wavĩvya nthembo ya kũvĩvw’a na nthembo sya kũtonywa; na ũtheu mũtisu wa Yeova wausũa nyũmba.

2Na athembi matyaatonya kũlika nyũmbanĩ ya Yeova, nĩkwĩthĩwa ũtheu mũtisu wa Yeova wausũa nyũmba ya Yeova.

3Na ana onthe ma Isilaeli meeloela, yĩla mwaki watheeie, na ũtheu mũtisu wa Yeova waĩ ĩũlũ wa nyũmba; na meekunamya mothyũ moo melekele nthĩ vandũ vaseũvye na mavĩa, na mathaitha, na mamũtũngĩa Yeova mũvea, makyasya, Nũndũ nĩ mũseo; nũndũ ũseo wake wĩ wendo nĩwĩkalaa tene na tene.

4Nĩvo ĩndĩ mũsumbĩ na andũ onthe mathembie nthembo vu mbee wa Yeova.

5Na mũsumbĩ Solomoni athemba nthembo ya ng’ombe ngili mĩongo ĩlĩ na ilĩ, na malondu ngili ĩana na mĩongo ĩlĩ. Ũu nĩw’o mũsumbĩ na andũ onthe mamĩvathie nyũmba ya Ngai yĩthĩwe ntheu.

6Na athembi maũngama, kwĩanana na mawĩa moo; Alivai nao me na syĩndũ sya kũinga sya Yeova, ila mũsumbĩ Ndaviti waseũvĩtye sya kũmũtũngĩa Yeova mũvea nasyo (nũndũ ũseo wake wĩ wendo nĩwĩkalaa tene na tene), yĩla Ndaviti wataĩie na ũthũkũmi wasyo: na athembĩ mavuvĩa masoo mbee woo; na Isilaeli onthe maũngama.

7Na ĩngĩ Solomoni avathan’ya vethĩwe vatheu vu nza katĩ ĩla yaĩ ngalĩ ya mbee ya nyũmba ya Yeova; nũndũ nĩwathembee vo nthembo sya kũvĩvw’a, na mathunya ma nthembo sya mũuo, nũndũ kĩthembeo kya ũthuku kĩla Solomoni waseũvisye kĩtyaĩ kĩtonya kwĩanĩa nthembo ya kũvĩvw’a, na nthembo ya mũtu, na mathunya.

8Na ĩndĩ Solomoni avoka mboka ĩvinda yĩu mĩthenya mũonza, na Isilaeli onthe vamwe nake, ũmbano mũnene mũno kuma ũlikĩlonĩ wa Amathi kũvika ũsĩ wa Misili.

9Na mũthenya wa nyanya maĩ na ũmbano ũkilĩtye: nũndũ nĩmalilikanile kũvathw’a kwa kĩthembeo kĩthĩwe kĩtheu mĩthenya mũonza, na mboka mĩthenya mũonza.

10Na mũthenya wa mĩongo ĩlĩ na ĩtatũ wa mwei wa mũonza oombũũkya andũ maende maeemanĩ moo, me na mũyo na me atanu ngoonĩ nũndũ wa ũseo ũla Yeova wamwonetye Ndaviti, na Solomoni, na Isilaeli andũ make.

11Ũu nĩw’o Solomoni waminie nyũmba ya Yeova, na nyũmba ya mũsumbĩ: na w’onthe ũla walikile ngoonĩ ya Solomonĩ aseũvye nyũmbanĩ ya Yeova, na nyũmbanĩ yake mwene, nĩwekie na ũathimĩku.

12Na Yeova amumĩlĩla Solomoni ũtukũ, na amwĩa, Nĩnĩw’ĩte kũvoya kwaku, na nĩnĩnyũvie vandũ vaa vethĩwe nyũmba yakwa ya kũthembeaa.

13Ethĩwa ngavinga matu matikausye mbua, kana ethĩwa ngeeaĩa ngie syanange nthĩ, kana ethĩwa ngaete mũimũ andũnĩ makwa;

14ethĩwa andũ makwa ala metanĩaw’a na syĩtwa yakwa, makeenyivya, na kũvoya, na kũmantha ũthyũ wakwa, na kwĩthyũũa matie mĩendele yoo mĩthũku; nĩvo ĩndĩ nĩĩw’a nĩ ĩtunĩ, na ngamaekea naĩ yoo, na kũvosya nthĩ yoo.

15Na ĩndĩ metho makwa makeethĩwa masalukĩtye, na matũ makwa meteete, mew’e kũvoya kũla kũkavoyewa vandũ vaa.

16Nũndũ yu nĩnĩnyuvĩte na nĩnĩmĩvathĩte nyũmba ĩno yĩthĩwe ntheu, nĩ kana syĩtwa yakwa yĩthĩwe vo tene na tene; na metho makwa na ngoo yakwa ĩkeethĩwa vo ĩndĩ yonthe.

17Na ngalĩ ĩ yaku, ethĩwa ũkakinyaa mbee wakwa o tondũ Ndaviti ĩthe waku wakinyaa, na kwĩkaa w’onthe ũla nĩkwĩaĩĩte, na ũkĩka myamũlo yakwa na motw’ĩo makwa;

18nĩvo ĩndĩ nĩlũlũmĩlya kĩvĩla kya ũsumbĩ waku, o kwĩanana na ũtianĩo ũla natianĩe na Ndaviti ĩthe waku, ngyasya, Ndũkaĩwa nĩ mũndũ wa kũsumbĩka Isilaeli.

19Ĩndĩ ethĩwa mũkeethyũũa, na kũtia myamũlo yakwa na mĩao yakwa ĩla niĩte mbee wenyu, na mũkathi na kũthũkũma ngai ingĩ, na kwithaitha;

20nĩvo ĩndĩ nĩmakũa na mĩi kũmaumya nthĩ yakwa ĩla nĩmanengete; na nyũmba ĩno, ĩla nĩtw’ĩte yĩthĩwe ntheu kwondũ wa syĩtwa yakwa, ngamĩkya vala ndatonya kũmyona na ngamĩtw’ĩkĩthya nthimo, na ya kũvũthĩĩwa ngonĩ syonthe sya andũ.

21Na nyũmba ĩno, ĩla ndũlu ũu, kĩla mũndũ ũla wĩvavĩtĩlaa akaseng’aa, na kwasya, Nĩkĩ Yeova wĩkĩte nthĩ ĩno, na nyũmba ĩno ũu?

22Na makasũngĩa, Nĩkwĩthĩwa nĩmamũtiie Yeova, Ngai wa aaĩthe moo, ũla wamaumisye nthĩ ya Misili, na makwatana na ngai ingĩ, na kwithaitha, na kwithũkũma: kwondũ wa ũu nũmaetee ũthũku ũũ w’onthe.

← Chapter 6 Jump to: Chapter 8 →