2 Chronicles 34

Kamba (Mbivilia) 1956

← Chapter 33 Jump to: Chapter 35 →

1Yosia aĩ wa myaka nyanya yĩla wambĩlĩlye kũsumbĩka; na asumbĩka myaka mĩongo ĩtatũ na ũmwe ku Yelusaleme.

2Na eekaa ũla Yeova wonaa wĩ ũseo, na aendaa mĩendelenĩ ya Ndaviti ĩthe wake, na ndaaathũka ũtee ngalĩ ya kw’oko kwa aũme kana kwa aka.

3Nũndũ mwaka wa nyanya wa kũsumbĩka kwake, o yĩla waĩ mũnini, nĩwambĩlĩlye kũmantha Ngai wa Ndaviti ĩthe wake; na mwaka wa ĩkũmi na ĩlĩ ambĩlĩlya kũthesya Yuta na Yelusaleme aiveta kũla kũndũ kũtũlu, na Aselimu, na mĩvw’anano myasũvye, na mĩvw’anano yaseũvĩtw’e na syĩndũ ila matwekethisye.

4Na maananga ithembeo sya Mbaalimu e vo; na amĩtemanga mĩvw’anano ya syũa ĩla yaĩ ĩũlũ wasyo yavalũka; na Aselimu, na mĩvw’anano myasũvye, na mĩvw’anano yaseũvĩtw’e na syĩndũ ila matwekethisye, amĩtũlanga ilungu, na amĩtw’ĩkĩthya kĩtoo, na akĩnyaĩĩkya mbũanĩ sya ala mamĩthembeaa.

5Na avĩvĩsya mavĩndĩ ma athembĩ ithembeonĩ syoo, na athesya Yuta na Yelusaleme.

6Na eeka ũu ndũanĩ sya Manase na Evalaimu na Simeoni, o kũvika Navitali, moombokunĩ masyo ngalĩ syonthe.

7Na aananga ithembeo, na atumbatumba Aselimu na mĩvw’anano myasũvye yatw’ĩka ta kĩtoo, na atemanga mĩvw’anano yonthe ya syũa nthĩ yonthe ya Isilaeli yavalũka, na asyoka Yelusaleme.

8Na ĩndĩ mwaka wa ĩkũmi na nyanya wa kũsumbĩka kwake, yĩla waminĩte kũthesya ĩ nthĩ na nyũmba, atũma Savani mwana wa Asaliia, na Maaseia ngavana wa ndũa, na Yoa mwana wa Yoaasi mũandĩki wa maũndũ, matũngĩĩe nyũmba ya Yeova Ngai wake.

9Na mooka kwa Ilikia mũthembi mũnene, na manengane mbesa ila syaetiwe nyũmbanĩ ya Ngai, ila Alivai, asũvĩi ma myalyonĩ, maĩ manoomban’ya kuma kw’okonĩ kwa Manase na Evalaimu, na kuma kwa ũtialo w’onthe wa Isilaeli, na kwa onthe ma Yuta na Mbenyamini, na kwa ala matwĩe Yelusaleme.

10Na mainengane mokonĩ ma athũkũmi ala masiasya nyũmba ya Yeova; na athũkũmi ala matethasya wĩa nyũmbanĩ ya Yeova mainengane sya kũseũvya na kũtũngĩĩa nyũmba:

11mainenga aseũvya ma mbwaũ na aki nao, mathooe mavia masũvye, na mĩtĩ ya ũkwatan’ya, na ya mĩamba ya nyũmba ila asumbĩ ma Yuta maanangĩte.

12Na andũ asu matethasya wĩa na kĩthito: na asyaĩĩsya moo maĩ Yaathi na Ovatia, Alivai, ma ana ma Melali; na Nzekalia na Mesulamu, ma ana ma Akoathi, ma kũtwaĩĩa wĩa na mbee; na angĩ ma Alivai, onthe ala maĩ ma ũtũĩka wa kũinga syĩndũ sya kũinga.

13O na maĩ asyaĩĩsya ma ala makuaa mĩio, na matwaĩa na mbee onthe ala matethasya wĩa wa kĩla mũthemba wa ũthũkũmi: na ma Alivai kwaĩ aandĩki, na anene, na asũvĩi ma mĩomonĩ.

14Na yĩla maumisye mbesa ila syaetiwe nyũmbanĩ ya Yeova, mũthembi Ilikia oona ĩvuku ya mĩao ya Yeova, ĩla yanenganiwe nĩ Mose.

15Na Ilikia asũngĩa amwĩa mũandĩki Savani, Nĩnoona yĩla ĩvuku ya mĩao nyũmbanĩ ya Yeova. Na Ilikia amũnenga Savani yĩla ĩvuku.

16Na Savani amũtwaĩa mũsumbĩ ĩvuku, o na ĩngĩ amũtũngĩa mũsumbĩ ũvoo, akĩmwĩa, W’onthe ũla wameaĩe athũkũmi maku nĩmekwĩka.

17Na nĩmatulũlĩte mbesa ila syoonekie nyũmbanĩ ya Yeova, na mainenganĩte kw’okonĩ kwa asyaĩĩsya, na kw’okonĩ kwa athũkũmi.

18Na mũandĩki Savani amũtavya mũsumbĩ, akĩmwĩa, Mũthembi Ilikia nũnengete ĩvuku. Na Savani ayĩsomea mbee wa mũsumbĩ.

19Na kweethĩwa, yĩla mũsumbĩ waminie kwĩw’a ndeto sya mĩao, atembũanga ngũa syake.

20Na mũsumbĩ eeaĩa Ilikia, na Aikamu mwana wa Savani, na Avitoni mwana wa Mika, na mũandĩki Savani, na Asaia mũthũkũmi wa mũsumbĩ, akĩmea,

21Endai, mũkakũlye Yeova kwondũ wakwa, na kwondũ wa ala matialile ma Isilaeli na Yuta, ũndũ wa ndeto sya ĩvuku yĩla yonekete; nũndũ ũthilĩku wa Yeova nĩ mũnene ũla ũtwonoesye, nĩkwĩthĩwa aaĩthe maitũ matyaasũvĩa ndeto ya Yeova, makeka kwĩanana na w’onthe ũla ũandĩkĩtwe ĩvukunĩ yĩĩ.

22Kwondũ wa ũu Ilikia, na ala meeaĩwe nĩ mũsumbĩ, maenda kwa mwathani Ulita kĩveti kya Salumu mwana wa Tokathi, mwana wa Asala, mũsũvĩi wa ngũa (nake atwĩe Yelusaleme ũtũinĩ wa kelĩ); na maneena nake ũu.

23Na amea, Ũũ nĩw’o Yeova, Ngai wa Isilaeli, ũnũkwasya: Mũtavyei mũndũ ũla ũmũtũmie kwakwa,

24Ũũ nĩw’o Yeova ũnũkwasya, Sisya, ngaetee vandũ vaa ũthũku, na andũ ala matwĩe vaa, o iumo syonthe ila iandĩkĩtwe ĩvukunĩ yĩla manasomee mbee wa mũsumbĩ wa Yuta.

25Nĩkwĩthĩwa nĩmandiĩte, na nĩmatoeesye ngai ingĩ ũvani, nĩ kana manthatye na mawĩa onthe ma moko moo; kwondũ wa ũu ũthilĩku wakwa nĩ mwonosye ĩũlũ wa vandũ vaa, na ndũkavoeka.

26Ĩndĩ mũsumbĩ wa Yuta, ũla ũmũtũmie mũkũlye kwa Yeova, ũũ nĩw’o mwĩmwĩa, Ũũ nĩw’o Yeova, Ngai wa Isilaeli, ũnũkwasya: Ũndũ wa ndeto ila wĩw’ĩte,

27nĩkwĩthĩwa ngoo yaku ĩnaĩ mbololo, na weenyivya vala ve Ngai, yĩla ũneewie ndeto syake ĩũlũ wa vandũ vaa, na ĩũlũ wa andũ ala matwĩe vaa, na nĩwĩnyivĩtye vala nĩĩ, na nũtembũangĩte ngũa syaku, na kũĩa mbee wakwa; o nakwa nĩnĩkwĩw’ĩte, easya ũu Yeova.

28Sisya, ngakũmban’ya wĩthĩwe vamwe na aaĩthe maku, na ũkoombanw’a mbũanĩ yaku na mũuo, o na metho maku matikona ũthũku w’onthe ũla ngaete ĩũlũ wa vandũ vaa, na ĩũlũ wa ala mavatwĩe. Na mamũtũngĩa mũsumbĩ ũvoo.

29Nĩvo ĩndĩ mũsumbĩ watũmanie na oomban’ya atumĩa onthe ma Yuta na Yelusaleme.

30Na mũsumbĩ ambata nyũmbanĩ ya Yeova, na andũ onthe ma Yuta na ala matwĩe Yelusaleme, na athembi, na Alivai, na andũ onthe, anene o na anini: na asoma matũnĩ moo ndeto syonthe sya ĩvuku ya ũtianĩo yĩla yĩnoonekie nyũmbanĩ ya Yeova.

31Na mũsumbĩ aũngama vandũ vake, na atianĩa ũtianĩo vu mbee wa Yeova, kana akamũatĩĩa Yeova, na kũsũvĩaa mĩao yake, na mokũsĩ make, na myamũlo yake, na ngoo yake yonthe, na thayũ wake w’onthe, eke ndeto sya ũtianĩo ila iandĩkĩtwe ĩvukunĩ yĩĩ.

32Na atuma onthe ala moonekie Yelusaleme na nthĩ ya Mbenyamini mooũngamĩa. Na ala matwĩe Yelusaleme meekie kwĩanana na ũtianĩo wa Ngai, Ngai wa aaĩthe moo.

33Na Yosia aveta mothatyo onthe nthĩ syonthe ila syaĩ sya ana ma Isilaeli, na onthe ala moonekie nthĩnĩ wa Isilaeli amathũkũmĩthya, mathũkũmae Yeova Ngai woo. Mĩthenyanĩ yake yonthe matyaatia Yeova, Ngai wa aaĩthe moo.

← Chapter 33 Jump to: Chapter 35 →