2 Chronicles 22

Kamba (Mbivilia) 1956

← Chapter 21 Jump to: Chapter 23 →

1Na ala matwĩe Yelusaleme mamũsũmbĩkya Aasia mwana wake wa ĩlumaita vandũ vake; nũndũ nguthu ya andũ ala mookie na Alavu mwakonĩ wa maeema nĩmoaĩte onthe ala akũũ. Na ĩndĩ Aasia mwana wa Yeolamu mũsumbĩ wa Yuta asumbĩka.

2Aasia aĩ wa myaka mĩongo ĩna na ĩlĩ yĩla wambĩlĩlye kũsumbĩka; na asumbĩka mwaka ũmwe Yelusaleme: na syĩtwa ya inyia wake eetawa Athalia mwĩĩtu wa Omili.

3Nake nĩwaendaa mĩendelenĩ ya nyũmba ya Aavu; nũndũ inyia wake aĩ mũtai wake wa ũmwĩkĩthya naĩ.

4Na nĩwekaa ũla Yeova wonaa wĩ ũthũku, o tondũ nyũmba ya Aavu yekaa; nũndũ maĩ atai make ĩtina wa kĩkw’ũ kya ĩthe wake, kũvika aanangĩka.

5O na aendaa aatĩĩe ũtao woo, na aendaa na Yeolamu mwana wa Aavu mũsumbĩ wa Isilaeli okite na Aasaeli mũsumbĩ wa Silia ku Lamothi‐ngileati: na Asilia mamũkita Yolamu.

6Na asyoka avoee ku Yesileeli mawũkite ala mamũkitĩe Lama, yĩla wokitaa na Aasaeli mũsumbĩ wa Silia. Na Asalia mwana wa Yeolamu mũsumbĩ wa Yuta atheea kũsisya Yeolamu mwana wa Aavu ku, Yesileeli, nũndũ aĩ mũwau.

7Na ĩndĩ wanangĩko wa Aasĩa waumie kwa Ngai, nũndũ nĩwaendie kwa Yolamu: nũndũ yĩla wavikie, aumaala na Yeolamu mokite na Yeu mwana wa Nimisi, ũla Yeova wamwĩtĩkĩsye mauta avete nyũmba ya Aavu.

8Na kweethĩwa, yĩla Yeu wasilĩlaa nyũmba ya Aavu, eethĩa anene me mbee ũsumbĩnĩ ma Yuta na ana ma ana‐a‐ĩthe ma Aasia, makĩthũkũma Aasia, na amoaa.

9Na amantha Aasia, na mamũkwata (na eevithĩte ku Samalia), na mamũete kwa Yeu na mamũaa; na mamũthika, nũndũ maisye, Nĩ mwana wa Yeosavati, ũla wamũmanthie Yeova na ngoo yake yonthe. Na nyũmba ya Aasĩa ndĩaĩ na ũtonyi wa kũlũmya ũsumbĩ.

10Na yĩla Athalia inyia wa Aasia wonie kana mwana wake nĩ mũkw’ũ, ookĩla na amina ũsyao w’onthe wa kĩũsumbĩ wa nyũmba ya Yuta.

11Ĩndĩ Yeosaveathi, mwĩĩtu wa mũsumbĩ, oosa Yoasi mwana wa Aasia, na amũya kũmumya ananĩ ma mũsumbĩ ala mooaawa, na amwĩkĩa e na mũei wake kasũmbanĩ ka ũkoma. Ũu nĩw’o Yeosaveathi mwĩĩtu wa mũsumbĩ Yeolamu, kĩveti kya mũthembi Yeoiata (nũndũ aĩ mwĩĩtu‐ainyia wa Aasia), wamũvithie Athalia ndakamwone, na ĩndĩ ndaamũaa.

12Na aĩ nao avithĩtwe nyũmbanĩ ya Ngaĩ myaka thanthatũ: na Athalia asumbĩka ĩ nthĩ.

← Chapter 21 Jump to: Chapter 23 →