2 Chronicles 23

Kamba (Mbivilia) 1956

← Chapter 22 Jump to: Chapter 24 →

1Na mwaka wa mũonza Yeoiata eeyĩkĩa vinya, na atianĩa ũtianĩo na makavuteni ma maana, Asalia mwana wa Yeloamu, na Isumaeli mwana wa Yeoanani, na Asalia mwana wa Oveti, na Maaseia mwana wa Ataia, na Elisavati mwana wa Nzikili.

2Na manganga nthĩ ya Yuta na moomban’ya Alivai kuma ndũanĩ syonthe sya Yuta na atongoi ma nyũmba sya aaĩthe ma Isilaeli, na mooka Yelusaleme.

3Na ũmbano w’onthe watianĩa ũtianĩo na mũsumbĩ nyũmbanĩ ya Ngai. Na amea, Sisyai, mwana wa mũsumbĩ akasumbĩka, o tondũ Yeova ũneenete ũndũ wa ana ma Ndaviti.

4Ũũ nĩw’o ũla mwĩĩka: kĩlungu kya katatũ kya inyw’ĩ, ala mũkaa mũthenya wa savato, kya athembi na kya Alivai, mũkeethĩwa asũvĩi ma myalonĩ;

5na kĩlungu kĩngĩ kĩkeethĩwa nyũmbanĩ ya mũsumbĩ; na kĩlungu kĩngĩ mbingĩlonĩ ya wambĩlĩlyo: na andũ onthe makeethĩwa nza sya nyũmba ya Yeova.

6Ĩndĩ mũtikaeke mũndũ o na wĩva alike nyũmbanĩ ya Yeova, ate o athembi, na ala ma Alivai ala mathũkũmaa; nao makalika, nũndũ nĩ atheu: ĩndĩ andũ onthe makasũvĩa wĩaĩo wa Yeova.

7Na Alivai makathyũlũlũka mũsumbĩ ngalĩ syonthe, kĩla mũndũ akwete mĩio yake ya kaũ kw’okonĩ kwake; na o ũla wĩũka nyũmbanĩ, nĩoawe: na mwĩĩthĩwa na mũsumbĩ yĩla wĩlika, na yĩla wĩumaala.

8Na kwondũ wa ũu Alivai na Yuta onthe meeka kwĩanana na w’onthe ũla mũthembi Yeoiata weaĩte: na moosa kĩla mũndũ andũ make, ala maĩ ma ũlika mũthenya wa savato, na ala maĩ ma kumaala mũthenya wa savato; nũndũ mũthembi Yeoiata ndaaũmbũũkya ila nguthu.

9Na mũthembi Yeoiata amanenga makavuteni ma maana matumo, na tũkalo, na ngao, ila syaĩ sya mũsumbĩ Ndaviti, ila syaĩ nyũmbanĩ ya Ngai.

10Na aia andũ onthe, kĩla mũndũ akwete mũio wake wa kaũ kw’okonĩ kwake, kuma ngalĩ ya kw’oko kwa aũme kwa nyũmba kũvika ngalĩ ya kw’oko kwa aka kwa nyũmba, vakuvĩ na kĩthembeo na nyũmba, mathyũlũlũkĩte mũsumbĩ ngalĩ syonthe.

11Nĩvo ĩndĩ maumaalilye mwana wa mũsumbĩ, na mamwĩkĩa ĩla ngovia ya ũsumbĩ, na mamũnenga ũla ũkũsĩ, na mamũtw’ĩkĩthya mũsumbĩ: na Yeoiata na ana make mamwĩtĩkĩsya mauta; na masya, Mũsumbĩ nĩekale thayũ ĩvinda ĩasa.

12Na yĩla Athalia wewie kĩtuu kya andũ makĩsemba na makĩtaĩa mũsumbĩ, ooka vala ve andũ nyũmbanĩ ya Yeova:

13na asisya, na, kaĩ, mũsumbĩ aũngyĩ vakuvĩ na kĩtuĩ kyake ũlikĩlonĩ, na makavuteni na masoo vakuvĩ na mũsumbĩ; na andũ onthe ma ĩ nthĩ matana, na mavuva masoo; o na aini mainga syĩndũ sya kũinga, na matongoesya wininĩ wa ndaĩa. Nĩvo ĩndĩ Athalia watembũangie ngũa syake, na asya, Nĩ ũvinga! Nĩ ũvinga!

14Na mũthembi Yeoiata aumaalya makavuteni ma maana ala maiĩtwe ĩũlũ wa nguthu, na amea, Mumaalĩlyei katĩ wa mĩselele; na o ũla wĩmũatĩĩa, nĩoawe na ũvyũ: nũndũ mũthembi aisye, Mũtikamũaĩe nyũmbanĩ ya Yeova.

15Kwondũ wa ũu mamwathũkĩa; na athi ũlikĩlonĩ wa mbingĩlo ya mbalasi wa nyũmba ya mũsumbĩ: na mamũaĩa vo.

16Na Yeoiata atianĩa ũtianĩo katĩ wake, na andũ onthe, na mũsumbĩ, atĩ makeethĩwa andũ ma Yeova.

17Na andũ onthe mathi nyũmbanĩ ya Mbaali, na mamĩomboanga, na matũlanga ilungu ithembeo syayo na mĩvw’anano yayo, na mooaĩa Matani mũthembi wa Mbaali mbee wa ithembeo.

18Na Yeoiata aia anene ma nyũmba ya Yeova kw’okonĩ kwa athembi Alivai, ala Ndaviti waiĩte nyũmbanĩ ya Yeova, mathembae nthembo sya kũvĩvw’a sya Yeova, o tondũ kũandĩkĩtwe mĩaonĩ ya Mose, makĩtana na kwĩna, kwĩanana na ũtw’ĩo wa Ndaviti.

19Na aia asũvĩi ma mĩomonĩ mbingĩlonĩ sya nyũmba ya Yeova, nĩ kana kũikalike ũmwe ũla ũte mũtheu ũndũnĩ o na wĩva.

20Na oosa makavuteni ma maana, na anene me ndaia, na makavana ma andũ, na andũ onthe ma ĩ nthĩ, na amũete mũsumbĩ kuma nyũmbanĩ ya Yeova: na mavĩtĩla mbingĩlonĩ ya ngalĩ ya ĩũlũ kũvika nyũmba ya mũsumbĩ, na mekalya mũsumbĩ kĩvĩlanĩ kya ũsumbĩ.

21Na ĩndĩ andũ onthe ma ĩ nthĩ matana, na ndũa yausya. Na maĩ manamũaa Athalia na ũvyũ.

← Chapter 22 Jump to: Chapter 24 →